Вы тут

Лукашэнка сустрэўся з губернатарам Калінінградскай вобласці


З названым расійскім рэгіёнам у нас няма агульнай мяжы, але на самалёце ад Мінска да Калінінграда ляцець менш за гадзіну. У гэтай вобласці яшчэ з савецкіх часоў шмат беларусаў — хтосьці служыў там у арміі, а потым застаўся, кагосьці туды накіравалі на працу... Эканамічных сувязяў таксама шмат, праўда, у гэтым кірунку ёсць куды развівацца. Учора ў Палацы Незалежнасці Прэзідэнт Беларусі Аляксандр Лукашэнка абмеркаваў з губернатарам Калінінградскай вобласці Антонам Аліханавым шэраг перспектыўных кірункаў узаемадзеяння, цікавых для абодвух бакоў.


У ключы партнёрства

— Мы даўно змястоўна не сустракаліся з кіраўніцтвам Калінінградскай вобласці, — адзначыў беларускі лідар. — Так склалася, што мы вельмі блізкія. Беларусаў шмат там працавала, яны там засталіся і жывуць. Пастаўкі неабходнай прадукцыі заўсёды здзяйсняліся ў Калінінград і з Калінінграда да нас. Я заўсёды лічыў Калінінградскую вобласць роднай. Пасля развалу Савецкага Саюза былі часы, калі я ў сярэдзіне 90-х сказаў, што Калінінградскую вобласць мы ў крыўду не дадзім. Беларусы заўсёды адказвалі за гэтую вобласць і будуць адказваць. Але мы не прэтэндуем на тое, каб яна была ў складзе Беларусі.

Кіраўнік дзяржавы прызнаўся, што з вялікай надзеяй глядзіць на новую каманду, новага губернатара гэтай вобласці:

— Мы не дзелім Расію і Беларусь па межах, імкнёмся пабудаваць нешта агульнае — назвалі яго Саюзнай дзяржавай, — дай бог яе пабудаваць. Мы ад гэтага не адыходзім.

Простыя падыходы

У Беларусі і расійскага анклава шмат агульнага. У прыватнасці, падобнае геапалітычнае становішча: мы мяжуем не проста з краінамі Еўрасаюза, але і з актыўнымі членамі НАТА. Ды і ў эканоміцы, гандлі сітуацыя з супрацоўніцтвам з заходнімі партнёрамі ў нас падобная.

— Як бы тут ні абмяркоўвалі гэтыя пытанні, называлі нас празаходнімі, мы цудоўна разумеем, што гэта рыторыка, — заявіў кіраўнік нашай дзяржавы. — Канкрэтныя факты кажуць пра тое, што нам няма на каго разлічваць. Нам, беларусам, расіянам, трэба бачыць свой інтарэс, інтарэс сваіх народаў. І тут нашы інтарэсы супадаюць. Я гэта да таго, што вы заўсёды можаце разлічваць на Беларусь. У складаную хвіліну мы заўсёды падставім плячо.

Аляксандр Лукашэнка ўспомніў, што такія сітуацыі былі.

— Вы малайцы, што выйшлі на поўнае задавальненне патрэб у зерні, малаку. Малайцы, што многія прадукты харчавання вы вырабляеце на сто працэнтаў. Гэтага раней не было, і я памятаю, губернатар калісьці да мяне звяртаўся і прасіў тэрмінова даць хоць бы 100 тысяч тон мукі, таму што выпякаць хлеб няма з чаго. Мне прыйшлося падключацца па многіх пытаннях, і вы павінны ведаць: у любую хвіліну, пакуль вы дастукаецеся да Масквы і далей, вы заўсёды можаце знайсці падтрымку сваіх родных людзей тут у Беларусі. Я хачу, каб вы так разумелі ідэалогію нашых адносін, калі яна вам падыходзіць.

Для агульнай карысці

Антон Аліханаў з афіцыйным візітам наведвае нашу сталіцу ўпершыню, хоць дагэтуль, як ён прызнаўся, у Мінску бываць даводзілася. Беларускі лідар выказаў упэўненасць, што гэты візіт паслужыць развіццю нашых адносін з Калінінградскай вобласцю.

Пакуль што лічбы двухбаковага таваразвароту адносна невысокія, летась мы нагандлявалі прыкладна на 190 мільёнаў долараў.

— Мы разглядаем ваш рэгіён як вельмі перспектыўнага і блізкага нам гандлёва-эканамічнага партнёра. Няхай абсалютныя лічбы невялікія — дарэчы, ёсць куды расці, ёсць праекты, праграмы, па якіх мы можам супрацоўнічаць. Ёсць добрыя магчымасці для паглыблення прамысловай кааперацыі, узмацнення ўзаемадзеяння з аграрнай сферай, асабліва калі ў вас сельская гаспадарка ўвогуле на пад'ёме — па 8—9% прыбаўляе ў год. Гэта вельмі высокія тэмпы. Але я ведаю, што вы некалі, калі не зараз, уперліся ў нейкую «столь», і сельская гаспадарка ваша ў асноўным на нізкіх глебах. Меліярацыя і іншыя пытанні — ад гэтага нікуды не сыдзеш, — заўважыў Прэзідент.

Так, у нашай краіне гэта праблема ўжо ўзнікала, і нашы аграрыі, вучоныя працуюць над ёй ужо каля дзвюх пяцігодак. Такім чынам, мы можам у тым, што датычыцца гэтай тэмы, падзяліцца сваім вопытам з калінінградскімі калегамі.

Наcтупныя перспектыўныя сферы — прамысловасць і будаўніцтва.

— У нас у прамысловасці — і аўтамабілебудаванне, і станкабудаванне — ёсць магчымасці супрацоўніцтва, як мяне праінфармаваў урад. І ў плане будаўніцтва сельскагаспадарчых аб'ектаў, і ўвогуле будаўніцтва, таму што ў свой час Беларусь была такім маяком і ўзорам у будаўнічай галіне. Сюды прыязджалі з усяго Саюза вучыцца, як трэба будаваць. Кіраўніцтва Савецкага Саюза надавала гэтаму прыярытэтнае значэнне, — згадаў Аляксандр Лукашэнка.

Наша краіна змагла захаваць «старую школу». Амаль усе заводы будаўнічых матэрыялаў, буйныя трэсты захаваныя — нягледзячы на з'яўленне мноства прыватных кампаній:

— Мы ў любы пункт можам на працягу месяца перакінуць усе магутнасці — як мы Гарлык будавалі ў Туркменістане: велізарнае прадпрыемства пабудавалі ў пустыні пры 30—40-градуснай спёцы літаральна за тры-чатыры гады.

Пры гэтым кіраўнік дзяржавы падкрэсліў, што наш бок не ставіць сваёй мэтай пакласці паболей у кішэню, а глядзіць на перспектыву. Калі мы будуем добра і нядорага, то можам атрымаць і дадатковыя аб'ёмы.

Гатовы мы супрацоўнічаць і ў іншых сферах — напрыклад, у навуковай. Што да гуманітарнага супрацоўніцтва, то, упэўнены Прэзідэнт, кірункі тут вельмі прыстойныя.

— Галоўнае — гэта адукацыя. Вы ў Расіі вельмі прасунутыя ў гэтым плане. Наш міністр адукацыі нядаўна ў вас пабываў. Пра многае дамовіліся, мы будзем гэтыя кірункі таксама падтрымліваць, — запэўніў беларускі лідар.


У тэму

Антон АЛІХАНАЎ, губернатар Калінінградскай вобласці:

— Калінінград будзе дадаткова закупляць аўтобусы Мінскага аўтамабільнага завода пад чэмпіянат (чэмпіянат свету па футболе 2018 года. — Заўв. аўт.), таму што ў нас ёсць пэўны дэфіцыт, нягледзячы на нядаўнюю закупку 100 аўтобусаў. Мне здаецца, што ў нас адназначна ёсць неабходнасць скарыстацца рабочай сілай з боку Беларусі: тут вельмі добрыя кіроўцы. Нам трэба запрасіць беларускіх калег, каб яны падчас чэмпіянату свету, падчас пікавых нагрузак нам дапамаглі.

Надзея ЮШКЕВІЧ

yushkevich@zviazda.by

Загаловак у газеце: Даўнія сувязі — новыя мэты

Дадаць каментар

Выбар рэдакцыі

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Некалі ў нашых вёсках людзі былі маладзейшыя. Ва ўсякім разе амаль усе яны трымалі кароў. 

Грамадства

Чаму амаладжэнне навуковых кадраў прынцыпова важнае?

Чаму амаладжэнне навуковых кадраў прынцыпова важнае?

На якім этапе трэба распачынаць выхаванне будучага даследчыка: у аспірантуры, магістратуры або яшчэ ў школе? 

Грамадства

Малых пацыентаў з арытміяй аперыруюць на базе РНПЦ дзіцячай хірургіі

Малых пацыентаў з арытміяй аперыруюць на базе РНПЦ дзіцячай хірургіі

Праведзеныя аператыўныя ўмяшанні — гэта надзея на радыкальнае вылечванне для тых, хто зараз з прычыны свайго захворвання прымае сур'ёзныя лекавыя прэпараты.

Грамадства

Як на школьных уроках вучаць арыентавацца ў медыясвеце?

Як на школьных уроках вучаць арыентавацца ў медыясвеце?

Сваім вопытам дзеляцца чэшскія спецыялісты.