6 лістапада ў Палацы мастацтваў завяршыўся трэці «Восеньскі салон з Белгазпрамбанкам», на які сёлета было пададзена каля 400 заявак. Мастакі з усёй Беларусі прадэманстравалі свае мастацкія творы і змагаліся за права быць лепшымі. 2 лістапада былі агучаны імёны пераможцаў «Восеньскага салона», якіх выбрала міжнароднае журы — эксперты мастацкага арт-рынку з Расіі, Украіны, Славакіі, Італіі і Літвы.
Першае месца атрымалі адразу чатыры беларускія мастакі: Сяргей Ашуха, Кацярына Шымановіч, Аляксандр Веледзімовіч і Наталля Кірылка. У якасці прыза аўтарам далі магчымасць выставіць свае творы на «Восеньскім салоне-2018» без удзелу ў конкурсе, таксама кожны атрымаў грашовы прыз — гадавую стыпендыю ў памеры дванаццаць тысяч беларускіх рублёў. Рашэннем экспертнага журы спецыяльнымі дыпломамі былі ўзнагароджаны Уладзімір Грамовіч («За мастацкае выказванне»), Наталля Кацуба і Уладзімір Сакалоўскі.
Не абышлося сёлета і без пераможцаў конкурсу глядацкіх сімпатый. Прыз атрымалі сямёра мастакоў. Першае месца, як і два папярэднія разы, гледачы аддалі Алесі Скорабагатай, на другім месцы апынуліся Аляксандр Бельскі і Васіль Пяшкун, трэцяе месца падзялілі Алег Манько, Павел Масленікаў, Зміцер Сухінін і Алесь Багданаў.
Старшыня праўлення Белгазпрамбанка Віктар Бабарыка, павіншаваўшы пераможцаў, падкрэсліў, што сёлета стаў відавочным рух наперад беларускіх мастакоў і мастацтва ў цэлым. Ён падзякаваў членам міжнароднага журы за прасоўванне беларускага мастацтва на еўрапейскім рынку.
Куратар праекта Аляксандр Зіменка, між іншым, дадаў, што цікавасць да трэцяга «Восеньскага салона» з боку публікі была большая, чым у папярэднія гады. За час работы экспазіцыі выстаўку наведалі каля дзесяці тысяч гледачоў. Атрымалася (няхай і не на шмат) павялічыць аб’ём продажу мастацкіх твораў: сёлета наведвальнікі набылі пяцьдзясят шэсць карцін.
На прэс-канферэнцыі некаторыя прадстаўнікі міжнароднага журы адзначылі, што канцэпцыя праекта стала больш зразумелая: беларускія мастакі паступова адмаўляюцца ад постсавецкага стылю і звяртаюцца да сучаснасці, іх выяўленчая мова становіцца зразумелай міжнароднай арт-супольнасці.
Вікторыя АСКЕРА, фота аўтара
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».