Вы тут

Лідзія Ярмошына дала парады кандыдатам у дэпутаты


З датай выбараў вызначыліся яшчэ раней (18 лютага 2018 года), а ўчора ўдакладнілі план правядзення выбараў дэпутатаў мясцовых Саветаў 28-га склікання. Пра гэта падчас пасяджэння Цэнтральнай камісіі Рэспублікі Беларусь па выбарах і правядзенні рэспубліканскіх рэферэндумаў заявіла яе старшыня Лідзія ЯРМОШЫНА.


Фота: БЕЛТА

Тэрытарыяльныя выбарчыя камісіі ўсіх узроўняў павінны быць створаны не пазней за 24 лістапада. «Паколькі ў Беларусі 1309 мясцовых Саветаў (з улікам сельскіх), адпаведна 1309 тэрытарыяльных камісій павінна быць створана не пазней за 24 лістапада. Крайні тэрмін падачы дакументаў — 21 лістапада, — удакладніла Лідзія Ярмошына. — Акруговыя выбарчыя камісіі па выбарах дэпутатаў абласнога Савета і Мінскія раённыя камісіі (іх будзе 9) утворацца не пазней за 4 снежня». Не пазней за 29 лістапада ў друку павінны з'явіцца спісы выбарчых акруг — іх нумары, апісанне і найменне.

Участкі для галасавання ўтворацца не пазней за 16 снежня, участковыя выбарчыя камісіі — не пазней за 3 студзеня. «І гэта самы напружаны момант, бо апошні тэрмін падачы дакументаў аб вылучэнні ў склад участковых выбарчых камісій — 31 снежня гэтага года, прычым гэта нядзеля. Зразумела, павінна быць арганізавана дзяжурства», — адзначыла старшыня Цэнтрвыбаркама.

Не пазней за 7 лютага выбаршчыкам павінны быць накіраваны запрашэнні прыйсці на выбарчыя ўчасткі, а ўчастковыя выбарчыя камісіі павінны быць забяспечаны бюлетэнямі для галасавання не пазней за 12 лютага.

Вылучэнне кандыдатаў у дэпутаты будзе ажыццяўляцца з 10 снежня па 8 студзеня — апошні дзень здачы дакументаў на рэгістрацыю кандыдатаў у дэпутаты. Рэгістрацыя пройдзе з 9 па 18 студзеня. Пасля правядзення рэгістрацыі стартуе перыяд перадвыбарчай агітацыі, які працягнецца да 18 лютага ўключна.

«Цяпер каляндарны план дапаўняецца спецыяльным раздзелам, які датычыцца стварэння асабістых выбарчых фондаў кандыдатаў у дэпутаты. У ім прадугледжаны як тэрміны стварэння фондаў, якія адкрываюцца з дня рэгістрацыі кандыдатаў у дэпутаты, у асноўным пасля 18 студзеня, так і тэрміны справаздач, якія павінны быць прадастаўлены пасля выбарчай кампаніі», — паведаміла Лідзія Ярмошына. Пры гэтым яна заявіла журналістам, што, хутчэй за ўсё, фонды не стануць трэндам гэтай выбарчай кампаніі. І ўвогуле мясцовыя выбары можна правесці не ўкладаючы ўласных сродкаў: памяшканні для сходаў выдзяляюцца бясплатна, палітычныя партыі і грамадскія аб'яднанні таксама без грошай падтрымаюць сваіх кандыдатаў.

Патэнцыйным кандыдатам у дэпутаты старшыня ЦВК параіла, перш за ўсё, шукаць тых людзей, якія будуць збіраць за іх подпісы, альбо тыя працоўныя калектывы (у якіх, дарэчы, яны могуць і не працаваць), якія згодны іх вылучыць кандыдатамі ў дэпутаты. «На гэтых выбарах дзейнічае прынцып «глебы». Вылучацца кандыдатам у дэпутаты можна па тым мясцовым Савеце, дзе ён ці яна пражывае і (ці) працуе. Можна, вядома ж, не пражываць і не працаваць, але гэта для работнікаў асобных устаноў, якія абслугоўваюць сацыяльныя патрэбы рэгіёна, — паведаміла Лідзія Ярмошына. — Акрамя таго, кандыдатам у дэпутаты трэба ведаць, што яны маюць права адначасова абірацца па некалькі відах Саветаў». Калі, напрыклад, кандыдат пражывае на тэрыторыі сельскай мясцовасці, то ён можа выбірацца і ў абласны Савет, і ў раённы, і ў сельскі, але ў Саветы аднаго ўзроўню — нельга. Больш падрабязна тлумачэнні ЦВК дасць непасрэдна перад самім вылучэннем.

Вераніка ПУСТАВІТ

pustavіt@zvіazda.by

Загаловак у газеце: Вызначаны каляндарны план

Выбар рэдакцыі

Грамадства

Прамянёвая тэрапія: новыя магчымасці і рызыкі

Прамянёвая тэрапія: новыя магчымасці і рызыкі

 Прамянёвая тэрапія можа выкарыстоўвацца як у спалучэнні з хірургіяй і хіміятэрапіяй, так і як самастойны метад лячэння.

Калейдаскоп

Вясёлыя гісторыі чытачоў

Вясёлыя гісторыі чытачоў

Старэнькі «Запарожац» (цяпер такіх машын і не відаць ужо) старанна пыліў па дарозе...

Грамадства

Антарктыда чакае беларусак. Але яны пакуль туды не імкнуцца

Антарктыда чакае беларусак. Але яны пакуль туды не імкнуцца

Дванаццатая беларуская антарктычная экспедыцыя адправілася на ледзяны кантынент.