Вы тут

На варце харчовай бяспекі


Яны ведаюць, колькі на самой справе каштуе хлеб, адказваюць за нашу харчовую бяспеку і за тое, каб на стале ў беларусаў заўсёды была свежая і высакаякасная прадукцыя. Работнікі сельскай гаспадаркі адзначаць сваё прафесійнае свята 19 лістапада. Міністр сельскай гаспадаркі і харчавання Леанід ЗАЯЦ нагадаў, што сельскагаспадарчая вытворчасць у нашай краіне з'яўляецца адным з найважнейшых прыярытэтаў дзяржаўнай палітыкі. На яго думку гэта сфера эканомікі ў значнай меры забяспечвае сацыяльную і палітычную стабільнасць у грамадстве. Пра тое, якія вынікі і перспектывы ў галіны, Леанід Заяц расказаў карэспандэнту «Звязды».


Фота: БЕЛТА

— Вынікі жніва сёлета былі даволі высокія. Нягледзячы на ўмовы надвор'я, аграрыі эфектыўна працавалі на палях. Як вы ацэньваеце становішча сельскай гаспадаркі ў гэтым годзе?

— Варта адразу адзначыць, што паводле статыстыкі па вытворчасці абсалютнай большасці відаў сельскагаспадарчай прадукцыі на душу насельніцтва наша краіна ўжо шмат гадоў запар істотна пераўзыходзіць гэтыя ж паказчыкі іншых краін СНД. Аналагічная сітуацыя і па спажыванні на душу насельніцтва асноўных відаў харчавання. А гэта найлепшыя індыкатары таго, што сфера развіваецца. Сёлета забяспечана станоўчая дынаміка развіцця АПК па выніках працы за студзень — верасень. Тэмп росту валавой прадукцыі ў сельскагаспадарчых арганізацыях склаў 102,3%, у тым ліку ў раслінаводстве — 101,5%, жывёлагадоўлі — 102,9%.

— Ці зменшылася сёлета колькасць стратных сельскагаспадарчых арганізацый?

— Безумоўна. Іх колькасць скарацілася ў 1,7 раза. Сума страты такіх арганізацый скарацілася ў 1,5 раза. Пры гэтым хачу падкрэсліць, што павелічэнне вытворчасці прадукцыі сельскай гаспадаркі дазволіла таксама забяспечыць рост прамысловай вытворчасці прадуктаў харчавання на 102%. Тэмп вытворчасці ў перапрацоўцы і кансерваванні мяса і вытворчасці мясной і мясазмяшчальнай прадукцыі склаў 104,1%, у вытворчасці малочных прадуктаў — 103,6%, гатовых кармоў для жывёл — 101,7%. Станоўчыя вынікі ў аграрнай галіне забяспечаны дзякуючы добрай рабоце як канкрэтных кіраўнікоў і працаўнікоў, так і эфектыўнаму ўзаемадзеянню працоўных калектываў у цэлым. Інавацыйны шлях развіцця нашай сельскай гаспадаркі, працавітасць беларускіх фермераў з году ў год дазваляюць гарантавана атрымліваць высокія вынікі ў вытворчасці жывёлагадоўчай і раслінаводчай прадукцыі.

— Якія перспектывы ў галіны ў найбліжэйшай будучыні? Якія плануюцца інавацыі?

— Міністэрства пастаянна працуе над паляпшэннем вытворчасці і павышэннем якасці прадукцыі. Асноўныя напрамкі — паглыбленне ўзроўню перапрацоўкі сельскагаспадарчай сыравіны, вытворчасць прадукцыі высокай якасці, запатрабаванай на ўнутраным і знешнім рынках. З гэтай мэтай пастаянна праводзіцца работа па тэхніка-тэхналагічным забеспячэнні цэхаў, мадэрнізацыі халадзільнай гаспадаркі, стварэнні сучасных упаковачных ліній, сертыфікацыі, укараненні сістэмы менеджменту бяспекі харчовых прадуктаў ІСО 22000, сістэмы кіравання якасцю прадукцыі ў адпаведнасці з патрабаваннямі міжнароднага стандарту ІСО 9001, НАССР. Важным напрамкам з'яўляецца тэхнічнае перааснашчэнне і мадэрнізацыя арганізацый малочнай прамысловасці, сыраробных цэхаў, сушыльных установак. У мясной прамысловасці паляпшаем існуючыя магутнасці мясакамбінатаў, кампрэсарных цэхаў і халадзільнікаў, будуем ачышчальныя збудаванні, мадэрнізуем кацельні, перааснашчаем каўбасныя і паўфабрыкатныя цэхі, павялічваем аб'ёмы выпуску мяса і гатовай мясной прадукцыі.

— А калі казаць пра экспарт, то якіх вынікаў мы ўжо дасягнулі сёлета?

— Арганізацыямі мясной і малочнай прамысловасці краіны выпускаюцца мясныя прадукты ў шырокім асартыменце. Больш за 50% вырабленых малочных прадуктаў і каля 30% мясных зараз рэалізуецца за мяжой Беларусі. Дзякуючы дзяржаўнай аграрнай палітыцы Беларусь сёння не толькі цалкам забяспечвае сябе ў харчовых адносінах, але і валодае значным экспартным патэнцыялам. Экспарт арганізацый Мінсельгасхарча ў студзені — жніўні 2017 года склаў 1,64 млрд долараў — 112,1% да адпаведнага ўзроўню 2016 года. Забяспечаны прырост валютнай выручкі ў аб'ёме 177 млн долараў за кошт росту экспартных цэн і экспарту ў натуральным выражэнні асобных відаў тавараў. Сёлета перад экспарцёрамі стаіць задача нарасціць экспарт прадукцыі не менш, чым на 11,5% у параўнанні з тым, што было летась.

Акрамя таго экспарцёры надаюць вялікую ўвагу дыверсіфікацыі гандлёва-эканамічных сувязяў з рознымі краінамі і рэгіёнамі пры захаванні і ўзмацненні пазіцый на традыцыйных рынках. Пашырана геаграфія экспарту тавараў арганізацый сістэмы Мінсельгасхарча з 56 (у 2016 годзе) да 63 краін свету, у тым ліку 25 краін з іх адносяцца да новых перспектыўных рынкаў — Блізкага Усходу, Азіі, Афрыкі.

Ілья КРЫЖЭВІЧ

krуzhеvісh@zvіаzdа.bу

Дадаць каментар

Выбар рэдакцыі

Грамадства

Школа заўтрашняга дня. У трэндзе — медыянавыкі, гейміфікацыя і сторытэлінг

Школа заўтрашняга дня. У трэндзе — медыянавыкі, гейміфікацыя і сторытэлінг

У мінулыя выхадныя сталічны бізнес-клуб «Імагуру» ўжо другі раз прымаў на сваіх плошчах педагагічную неканферэнцыю. 

Культура

Гісторыкі спадзяюцца знайсці дакладную дату заснавання Мірскага замка

Гісторыкі спадзяюцца знайсці дакладную дату заснавання Мірскага замка

Вызначыць дакладны час з'яўлення на Беларусі вядомага абарончага збудавання дагэтуль немагчыма, хоць розных гіпотэз існуе шмат.

Грамадства

«Ніколі не губляйце мару дзяцінства!»

«Ніколі не губляйце мару дзяцінства!»

Мы з Аленай Варановіч пазнаёміліся выпадкова, на вуліцы. Адразу разгаварыліся і знайшлі агульную мову. Тады за кубкам кавы яна сказала мне важныя словы: «Ніколі не губляй мару дзяцінства».

Спорт

Уладзімір Шантаровіч: Кажуць, я — геній, і мне гэта вельмі не падабаецца

Уладзімір Шантаровіч: Кажуць, я — геній, і мне гэта вельмі не падабаецца

Як трэнер пабудаваў сістэму, якая выхоўвае алімпійскіх чэмпіёнаў.