Вы тут

Каманда «МАЗ-СПОРТаўта» возьме ўдзел у 40-м ралі-марафоне «Дакар-2018»


Каманда «МАЗ-СПОРТаўта» прыме ўдзел у 40-м ралі-марафоне «Дакар-2018», які пройдзе з 6 па 20 студзеня 2018 года ў Паўднёвай Амерыцы. На ралі па бездарожжы адправяцца тры экіпажы на гоначных МАЗах. Чакаецца, што юбілейны «Дакар» стане самай складанай гонкай за апошнія гады. Працягласць хуткасных участкаў складзе каля 4 тысяч км, што з'яўляецца рэкордным паказчыкам. Усяго ж удзельнікам на сваіх баявых машынах трэба будзе праехаць больш за 9 тысяч км. У праграме, як заўсёды, запланаваны этапы з дзюнамі, горнымі пераваламі і саланчакамі. Упершыню пасля шматгадовага перапынку марафон вернецца ў Перу, дзе пройдуць стартавыя этапы. Далей гонка працягнецца ў Балівіі і Аргенціне.


У беларускую каманду ўвайшлі гоншчыкі, якія ўжо прадстаўлялі краіну на папярэдніх заездах «Дакара» і «Шаўковага шляху». Баявыя машыны 503, 512, 518 былі нязначна мадыфікаваны: спецыялісты дадаткова папрацавалі над рухавікамі і трансмісіяй. Па словах начальніка каманды «МАЗ-СПОРТаўта» і пілота экіпажа машыны 512 Сяргея ВЯЗОВІЧА з кожным годам трасы ралі-рэйдаў становяцца складанейшыя. «Праціўнікі таксама адаптуюцца. Ужо даўно не толькі КАМАЗ з'яўляецца адной з самых складаных з пункту гледжання канкурэнцыі камандаў. Экіпажаў, якія прэтэндуюць трапіць у топ-3, каля 18. Ім па сілах пры пэўных абставінах дамагчыся добрых вынікаў. Паглядзім, што будзе ў Перу», — сказаў Сяргей Вязовіч.

Ён таксама падкрэсліў, што машыны да «Дакар» рыхтуюцца спецыфічна. Раскрываць усе нюансы ў зменах канструкцыі аўто да старту гонкі ён не стаў, але адзначыў, што гэтыя змены ёсць, хоць і неістотныя. «Магу запэўніць, што ў нашай камандзе механікі здольныя ліквідаваць любую праблему вельмі хутка. Мы тэхнічна ўжо гатовыя. Члены экіпажаў працягнуць трэніравацца, нам трэба будзе працаваць над фізічнай падрыхтоўкай, а таксама прайсці адаптацыю да ўмоў высакагор'я, якія чакаюць нас у Балівіі. На працягу ўсяго снежня мы будзем рыхтавацца», — сказаў пілот экіпажа.

Кажучы пра магчымасці МАЗаў, ён таксама паведаміў, што па чыстай хуткасці беларускія аўто могуць змагацца з любой камандай. Асноўнае пытанне — у складанасці падтрымання аўтамабіля ў аднолькавым стане ад старту да фінішу. «Але досвед, які мы назапашваем, ужо блізкі да таго, каб мы маглі ўсё ўлічыць. Задача заключаецца ў тым, каб прадбачыць паломку і памяняць яшчэ спраўную дэталь крыху раней, чым яна выйдзе са строю. Тут толькі вопыт і гады могуць дапамагчы», — рэзюмаваў Сяргей Вязовіч.

Намеснік генеральнага дырэктара — камерцыйны дырэктар Генадзь СКІТАЎ падкрэсліў, што, нягледзячы на тое, што завод МАЗ сёння працуе ўсё яшчэ не ў поўную сілу, каманду «МАЗ-СПОРТаўта» будзем развіваць і падтрымліваць. «Што датычыцца завода, то мы нарошчваем абароты. Прынята рашэнне адмяніць усе адпачынкі за свой кошт. На 2018 год па аўтобусах мы закантрактаваныя на бліжэйшыя чатыры месяцы. Спартыўная каманда дапамагае нам у рэалізацыі маркетынгавых задач, што станоўча ўплывае на продажы», — расказаў Генадзь Скітаў.

Сярод канкурэнтаў нашых гоншчыкаў вядомыя каманды. КАМАЗ выставіць на гонку адразу чатыры экіпажы. Таксама ў ралі прыме ўдзел каманда Реtrоnаs Іvесо, MАN, Tаtrа і Rеnаult.

Ілья КРЫЖЭВІЧ

krуzhеvісh@zvіаzdа.bу

Загаловак у газеце: МАЗ супраць бездарожжа Перу

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.