У 2016 годзе ў выдавецтве «Кнігазбор» пабачыла свет кніга паэзіі «Будзе ўсё наадварот» пінскай паэтэсы Алены Ігнацюк. Гэта ўжо трэці яе зборнік. Ранейшыя выйшлі з друку ў 2000 і 2006 гадах.
Алена Ігнацюк — даследчыца літаратуры, выкладае тэорыю і гісторыю сусветнай культуры ў Палескім універсітэце. І гэта адбіваецца на яе вершах: яны перанасычаны згадкамі імёнаў старажытных багінь і багоў, міфічных герояў, філосафаў, дзяржаўных дзеячаў, пісьменнікаў, святых далёкай мінуўшчыны. Хаця і нашай беларускай рэальнасці аўтарка не цураецца: сустракаюцца і назвы вёсак, і гарадоў, і апісанні айчынных краявідаў. Але ці атрымалася ў яе перанесці антычныя рэаліі на беларускую глебу? Давайце пройдзем услед за паэтычнай думкай Алены Ігнацюк. Вось верш з інтрыгоўнай назвай «Са мною Ляхі»:
Рака ніткай Арыядны
з лабірынта цягне час.
Бераг выцягнуты, ладны…
Дзень — што міфа пераказ.
Бы птушыныя галовы
ў жыхароў маіх мясцін:
сойм барочны ладзяць совы
— горнуць цела ў крэалін…
Рака ніткай Арыядны
з небам злучана здаля…
У мяне квіток мандатны:
выбіраюць караля —
людзі-совы… Можа, нагі?
Хто з іх дэман? Кожны — Бог?!
Я ж крычу: «Са мною Ляхі
правяць баль пад скокі блох!»
Цікавая метафара пра Арыядну ў самым пачатку верша знікае пад напластаваннем нейкіх хаатычных з’яў і паняццяў, што адсылаюць да іншых культур. Так, нагі — змеепадобныя стварэнні ў будызме і іудаізме; крэалін — хімічнае рэчыва, масляністая вадкасць цёмна-бурага колеру з рэзкім спецыфічным пахам, што выкарыстоўваецца ў ветэрынарыі для аховы жывёл ад шкодных членістаногіх; ляхі — слова з летапісу Нестара, якім першапачаткова называлі заходнеславянскія плямёны палян, люцічаў, мазаўшан і памаран. Такім чынам, аўтарка пакідае чытача ў поўным неўразуменні. У лепшым выпадку ён звернецца да слоўнікаў, а ў горшым палічыць свой інтэлектуальны ўзровень занадта нізкім, каб разумець падобныя шэдэўры, і больш зборнік не разгорне. Такі ж фінал магчымы і пасля прачытання слоўніка. Пытанняў не стане менш: якія могуць быць «скокі блох», калі іх атруцілі крэалінам? Хаця першае чатырохрадкоўе і два радкі пра Арыядну ў сярэдзіне верша былі шматабяцальныя, на іх аснове мог бы атрымацца цікавы твор, хай і менш мудрагелісты. І гэта тыповы прыклад з кнігі: тут можна згадаць вершы «На матыў Інгмара Бергмана», «Маім сном зацалаваны», «У тое чэрвеньскае лета» і іншыя. Аўтарка не намагаецца развіць адзін вобраз, які «трымаў» бы верш ды ўвагу чытача, а нібыта абтрасае ў розныя бакі пырскі са свайго паэтычнага пэндзля: на палатне атрымліваюцца рознакаляровыя плямы, некаторыя з іх прыцягваюць вока незвычайным адценнем, а іншыя толькі псуюць уражанне.
Сустракаюцца ў вершах і русізмы («ярасны» твар замест лютага, «падаркі» замест падарункаў, «блудлівы» пагляд замест юрлівага, «свечы» замест свечак, рукі ў «кольцах» — замест «у пярсцёнках»), і граматычныя памылкі («гуляла па саду» — трэба «па садзе», «з грошамі» — трэба «з грашыма», «да Пакровы» — правільна «да Пакравоў»). Часта ўжываецца «ў» пасля зычных для захавання патрэбнага рытму. Неахайнае стаўленне да слова? Альбо жаданне стварыць рыфму? Часта ў адказ на такія заўвагі можна пачуць, што, маўляў, гэта ў беларускай мове дапушчальна, бо сам Максім Багдановіч так рабіў. Але ж у часы Багдановіча наша літаратурная мова толькі стваралася, не была яшчэ ўнармаванай. Ды і варта дадаць, што Максім да канца сваіх дзён у 1917-м удасканальваў адзіны прыжыццёвы зборнік «Вянок», што пабачыў свет у 1913-м і быў ацэнены тагачаснымі крытыкамі на найвышэйшую адзнаку. Спадарыня Алена — не пачатковец, а паэт са стажам, кандыдат філалагічных навук.
Лірычная гераіня ў паэзіі Алены Ігнацюк сапраўдная жанчына (праўда, пры гэтым інфантыльная). Яна любіць пакакетнічаць («…я — як тая кіса-мурка — ў галактыцы жыву тваіх гадоў»), пагуляць («Я гуляла з сабою ў хованкі… І падглядвала за сабой… Нават вецер прыгожа-лёгенькі захапляўся такой гульнёй»), пакруціцца перад люстэркам («…З маім тварам? Мая мара? Цела — нібы аблачына… А прычоска — Гамаюнам, песняй з сонечнага раю… Я ў блакітным? Ці ў зялёным? То з’яўляюся… Знікаю…»). Адметна, што Гамаюн — міфалагічная птушка без крылаў і без ног, якая няспынна лётае пры дапамозе хваста, з’яўленне якой прадказвае няшчасце (але ў вершы яна, відаць, толькі для прыгажосці). Улічваючы паэтычны стаж аўтара, думаецца, перыяд самазахаплення ўсё ж мусіў застацца за спінай: тое, што ўнутры, — нашмат цікавей за вонкавае. Пагатоў, у зборніку ёсць вершы, дзе паэтка, адклаўшы ў бок люстэрка і забыўшыся на выявы розных хімер кшталту нагаў і гамаюнаў, зазірае ў сваю душу:
Смерць закахалася ў жыццё.
І перастала быць сабою.
(з верша «Смак жыцця»);
Мора Готланда — ўсё паэціцца.
Пералівамі хваляў свеціцца.
А на беразе людзі месцяцца —
Ловяць сонца-шар… Дзень карэціцца.
У таверне я. Час манеціцца.
(З верша «Мары Хельды»);
А ў апісанні дажджу можна ўбачыць і прыклад высокай паэзіі:
Людзі з дажджу: сілуэты як лініі —
Пад парасонамі доўжацца сінімі.
(з верша «У сюжэце намочанай раніцы»);
альбо:
Дождж абводзіў сілуэты,
Бы графітавым алоўкам.
(З верша «Дождж і мора»).
Вершы Алены Ігнацюк пераконваюць: паэтэса не пазбаўленая таленту, ёй уласцівае паэтычнае светабачанне, светаадчуванне, яна можа ствараць яркія неардынарныя вобразы, тропы. Але ж… каб спраўдзіць сябе як мастака, гэтага мала.
Праца і цярпенне — вось што можа дапамагчы ў станаўленні яўна адоранай і шмат у чым абазнанай паэтэсы, звычка адшліфоўваць свае творы да люстранога бляску, да ідэальнага гучання.
А па натхненне можна звярнуцца і да скарбонкі сусветнай культуры, і фільмы Бергмана паглядзець. Альбо тэарэму Ферма паспрабаваць даказаць разам з мужам (пра што лірычная гераіня распавядае ў творы «Фанцік “Алёнка”»). А ў чытача падчас чытання вершаў, мяркую, абудзілася моцнае жаданне павандраваць па тых краінах, што ствараюць геаграфію зборніка А. Ігнацюк.
P. S. Дарэчы, што тычыцца назвы: зялёны шакалад, як і ружовы, з’явіўся параўнаўльна нядаўна і ёсць плёнам хітрыкаў кандытараў, ужывання розных дадаткаў. Звычайна і какававае, і зрэдку кававае зерне, цэлае і здробненае, ужываецца засмажаным да хрусткасці, а значыць, зялёным быць ніяк не можа. Хоць аўтарка, вядома, можа тут гулліва заўпарціцца: маўляў, я так бачу…
Таццяна БУДОВІЧ-БАРАДУЛЯ
Мерапрыемства праводзіцца на добраахвотнай аснове.
Не выявіць ні секунды абыякавасці.
Каментары