Дадзеная сустрэча адбылася па дзвюх прычынах, адзначыў Аляксандр Лукашэнка. Першая — гэта сур'ёзны попыт на адпаведную прадукцыю за мяжой. «Ясна, што гэта падакцызны тавар, што бюджэт атрымлівае велізарныя сродкі. У гэтым годзе мы чакаем 1 мільярд беларускіх рублёў, гэта значыць 0,5 мільярда долараў. Гэта вялікія падатковыя паступленні», — сказаў кіраўнік дзяржавы.
Прэзідэнт не ўхваляе таго, калі нехта ўжывае тытунёвыя вырабы або злоўжывае алкаголем. Аднак Аляксандр Лукашэнка згодны, што гэтая галіна ў Беларусі развіваецца актыўна не толькі ў сувязі з попытам: «У апошні час, як мяне інфармуюць, у нас попыт на гэты тавар стабілізаваны і росту ніякага няма. Гэта ўжо добра».
Іншая прычына нарады — прапановы некаторых беларускіх бізнесменаў па ўдасканаленні вытворчасці і рэалізацыі такой прадукцыі. Па словах кіраўніка дзяржавы, прадстаўнікі бізнес-супольнасці сцвярджаюць, што патэнцыял галіны не вычарпаны.
— Да мяне нават у апошні час звярнуліся замежныя прадпрымальнікі наконт таго, што нашы прадпрыемствы не хочуць прадаваць прадукцыю на экспарт. Ёсць вялікія нішы, нават у Еўрапейскім саюзе. Яны нам выгадныя. Таму, калі ёсць попыт, трэба прадаваць тытунёвыя вырабы. Не прададзім мы, прададуць іншыя. Рынкі будуць занятыя, — сказаў Прэзідэнт. Ён таксама дадаў, што выніковае рашэнне павінна адказваць выключна інтарэсам дзяржавы.
У параўнанні з паказчыкамі 2000 года вытворчасць тытунёвых вырабаў у Беларусі ўзрасла ў тры разы. Экспарт павялічыўся больш чым у 16 разоў, імпарт скараціўся больш чым у 25 разоў, а ўнутраны рынак больш чым на 95% забяспечваецца айчыннай прадукцыяй. Такія даныя прывёў віцэ-прэм'ер Міхаіл Русы.
Па выніках нарады ён таксама расказаў пра тое, што зараз абмяркоўваецца стварэнне адзінай тавараправоднай сеткі ў тытунёвай сферы. Зараз, калі буйная замежная кампанія хоча прыйсці на беларускі рынак, то яна павінна размясціць тут сваю вытворчасць, запусціць лінію і перадаць яе ва ўласнасць фабрыкі. Па такім прынцыпе асноўныя транснацыянальныя кампаніі інвеставалі прыкладна 26 мільёнаў долараў у развіццё свайго сектаральнага бізнесу.
— На сённяшні дзень мы разгледзелі новы крок — у гэтую сферу ўваходзіць і бізнес. Ствараецца адзіная тавараправодная сетка, якая будзе займацца рэалізацыяй тытунёвай прадукцыі як на ўнутраным рынку, так і на знешнім, — адзначыў віцэ-прэм'ер. — Інвестар (у якасці якога выступіць прыватная кампанія «Энерга Оіл») прывядзе інвестыцыі прыкладна ў 60 мільёнаў долараў — 122 мільёны беларускіх рублёў. Павялічацца магутнасці Гродзенскай тытунёвай фабрыкі.
Падобны крок прынясе значны прыбытак. Так, па мінімальных разліках рэалізацыя праекта за чатыры гады дасць 205—210 мільёнаў беларускіх рублёў дадатковых паступленняў, а патэнцыйна — да 400 мільёнаў. Нарматыўны дакумент будзе падрыхтаваны так, каб са студзеня 2018 года гэты праект пачаў паэтапна развівацца. «Завершыцца ён на першым этапе ў 2020 годзе. Далей будзем глядзець. Хоць мы ўсе гэтыя пытанні будзем суправаджаць. Гэта сур'ёзны крок да таго, каб у такія сферы ўваходзіў і бізнес. Але кантроль дзяржавы будзе вельмі сур'ёзны ў любым выпадку», — сказаў Міхаіл Русы.
Па словах віцэ-прэм'ера, цяпер вядзецца гаворка пра тое, каб інвестар устанавіў яшчэ дзве лініі, кожная коштам па 10 мільёнаў долараў. З іншага боку, дзяржава ў якасці ўласніка таксама павялічвае вытворчыя магутнасці. Некаторы час таму ўвялі адну лінію, у планах — устанавіць некалькі. Попыт за мяжой на айчынную прадукцыю ўзрос, таму вытворчасць працуе кругласутачна. Аднак паставіць на экспарт неабходны аб'ём, не агаліўшы ўнутраны рынак, на сёння немагчыма.
Па матэрыялах БЕЛТА
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».