Зборную Расіі адхілілі ад зімовай Алімпіяды-2018

Выканкам Міжнароднага алімпійскага камітэта па выніках пасяджэння ў Лазане вырашыў адхіліць расійскую зборную ад зімовых Алімпійскіх гульняў у паўднёвакарэйскім Пхенчхане.

Расійскія спартсмены, не замяшаныя ва ўжыванні допінгу, змогуць выступіць пад нейтральным сцягам.

Выканкам пры гэтым палічыў магчымым "запрасіць асобных расійскіх спартсменаў на строгіх умовах на зімовыя Алімпійскія гульні ў Пхенчхане 2018 года".

"Запрошаныя спартсмены будуць удзельнічаць (у індывідуальных ці камандных спаборніцтвах) пад тытулам "Алімпійскі спартсмен з Расіі". Яны будуць спаборнічаць толькі пад гэтым імем і пад Алімпійскім сцягам. Алімпійскі гімн будзе выкананы на кожнай цырымоніі", гаворыцца ў прэс-рэлізе МАК.

Алімпійскі камітэт Расіі дыскваліфікаваны. У прэс-рэлізе МАК сказана, што высновы дакладу камісіі Сэмуэля Шміда з фактычнага і прававога пункту гледжання пацвярджаюць "сістэматычнае маніпуляванне сістэмай барацьбы з допінгам" у Расіі.

Спіс расійскіх спартсменаў, якія атрымаюць запрашэнні на Гульні ў Карэі, будзе складзены групай пад старшынствам Валеры Фурнерон. Яго павінен будзе зацвердзіць МАК.

Гэта першае ў гісторыі адхіленне ад Алімпіяды краіны за допінг. Яно азначае, што на Алімпіядзе-2018 не будзе расійскага сцяга і гімна, а расійскія спартсмены, чысціню якіх пацвердзіць Сусветнае антыдопінгавае агенцтва (ВАДА) і міжнародныя федэрацыі адпаведных відаў спорту, змогуць выступіць у Пхенчхане ў нейтральнай форме.

"Мы ніколі яшчэ не бачылі такога маштабу маніпуляцый і падману, і гэта нанесла велізарны ўрон алімпійскаму руху", - заявіў кіраўнік камісіі МАК Шмід.

Згодна з рашэннем МАК, ніводны з чыноўнікаў мінспорта Расіі не атрымае акрэдытацыю на Гульнях у Карэі. Паехаць у Пхенчхан не змогуць трэнеры і ўрачы, чые спартсмены калі-небудзь былі злоўлены на допінгу.

У прэс-рэлізе гаворыцца, што экс-міністр спорту, віцэ-прэм'ер Расіі Віталь Мутко і экс-намесніка міністр спорту Юрый Нагорных адхілены ад удзелу ва ўсіх будучых Алімпіядах. Кіраўнік аргкамітэта па правядзенні Алімпіяды-2014 у Сочы Дзмітрый Чарнышэнка, які ў дадзены момант ўзначальвае холдынг "Газпром-Медыя", адхілены ад удзелу ў каардынацыйнай камісіі МАК па зімовых Алімпійскіх гульняў-2022 у Пекіне.

Расія павінна пакрыць усе выдаткі, звязаныя з антыдопінгавым расследаваннем - 15 млн долараў, вырашыў выканкам МАК.

Ад Расіі на пасяджэнні выступілі кіраўнік Алімпійскага камітэта Расіі Аляксандр Жукаў, кіраўнік Незалежнай грамадскай антыдопінгавай камісіі (НВАК) Віталь Смірноў і двухразовая чэмпіёнка свету па фігурным катанні Яўгенія Мядзведзева. Жукаў страціў сваё месца ў МАК.

ВВС