Учора падчас сустрэчы з губернатарам гэтага расійскага рэгіёна Аляксандрам Міхайлавым Прэзідэнт Беларусі Аляксандр Лукашэнка заклікаў больш актыўна развіваць супрацоўніцтва ў сельскай гаспадарцы, будаўніцтве, пашыраць прамысловую кааперацыю.
— На жаль, за папярэднія гады як з Расіяй, так і з рэгіёнам тавараабарот у нас знізіўся. Аднак пазітыўныя тэндэнцыі ў гэтым годзе даюць упэўненасць у тым, што сумеснымі намаганнямі мы можам выправіць сітуацыю і аднавіць аб'ёмы ўзаемнага гандлю, — заявіў кіраўнік Беларусі.
Адным з перспектыўных кірункаў з'яўляецца аснашчэнне Міхайлаўскага горна-абагачальнага камбіната кар'ернай тэхнікай БелАЗ. Гэта адзін з самых буйных у Расіі і СНД камбінатаў па здабычы і абагачэнні жалезнай руды. Таксама сярод удзельнікаў дэлегацый — прадстаўнікі буйных прадпрыемстваў Курскай вобласці, якіх цікавіць супрацоўніцтва з «Планарам» і Мінскім маторным заводам. Што датычыцца сельскай гаспадаркі, то расійскім гасцям могуць быць карыснымі сельскагаспадарчая тэхніка, пастаўкі элітнага насення збожжавых культур і агародніны, мінеральных угнаенняў.
Беларусь цікавая курскім партнёрам і сваімі дасягненнямі ў жыллёвым будаўніцтве. «У нас ёсць вопыт Мазырскага домабудаўнічага камбіната, які ўзводзіць у вас дамы. Ведаю, што ўжо ёсць кантракт на 2018 год па будаўніцтве дома. Калі патрэбна тут большая інтэнсіфікацыя, большыя аб'ёмы, мы гатовы разгледзець і падключыць іншыя трэсты», — паабяцаў Аляксандр Лукашэнка. Пры гэтым наш бок жадае, каб будаўнікі-беларусы ў Расіі працавалі калектывамі, а не паасобку. А праз пэўны час айчынныя спецыялісты вузкага профілю змогуць паўдзельнічаць у будаўніцтве Курскай АЭС-2.
У сваю чаргу, расійскі губернатар Аляксандр Міхайлаў адзначыў, што знешнегандлёвы абарот сёлета вырас за 9 месяцаў у параўнанні з 2016-м амаль у паўтара раза — асабліва шчыльна суб'ект Расійскай Федэрацыі супрацоўнічае з Гомельскай і Магілёўскай абласцямі, а ў гэты візіт плануе падпісаць пагадненне з Мінскім гарвыканкамам.
У тэму
Прэм'ер-міністр Беларусі Андрэй Кабякоў на сустрэчы з губернатарам Курскай вобласці Аляксандрам Міхайлавым акрэсліў магчымы патэнцыял у двухбаковым супрацоўніцтве. Напрыклад, расійскіх партнёраў маглі б зацікавіць электробусы і новыя тралейбусы з аўтаномным ходам. Акрамя гэтага, беларускі бок можа прапанаваць выкананне праектаў «пад ключ», пастаўляючы ў тым ліку сістэму зарадкі для такога транспарту. Карысна для абодвух бакоў было б пашырыць кааперацыйныя сувязі. Сустрэчы паміж прадстаўнікамі бізнес-супольнасцяў дапамогуць лепш зразумець магчымасці супрацоўніцтва. Дарэчы, у Курскай дэлегацыі з 45 чалавек прыкладна 30 — гэта прадстаўнікі бізнес-структур.
У наступным годзе беларускім бокам запланавана будаўніцтва ў Курску энергаэфектыўнага 140-кватэрнага жылога дома. У нас ужо ёсць вопыт супрацоўніцтва па жыллі, але мы маглі б яго пашырыць на іншыя сферы. У Курскай вобласці, як і ў Беларусі, зараз ідзе будаўніцтва АЭС. Пуск першага энергаблока запланаваны на 2021 год, у нас — на 2019. Таму беларускія будаўнікі маглі б быць прыцягнуты для працы на Курскай АЭС-2.
Надзея АНІСОВІЧ
аnіsоvісh@zvіаzdа.bу
Вераніка ПУСТАВІТ
Фота БЕЛТА
Канцэрт для дзяцей і моладзі, пластычны спектакль Ягора Дружыніна і «Рок-панарама».
Выбар саджанца для садавода — той момант, значнасць якога складана пераацаніць.
Актрыса НАДТ імя М. Горкага — пра шлях да сцэны і натхненне.
Тата і мама — два самыя важныя чалавекі ў жыцці кожнага дзіцяці.