Песні‐кветкі ў славу Багдановіча

Уладзімір Мулявін разам з «Песнярамі» ствараў гэтую праграму да 100-годдзя Максіма Багдановіча. Яе прэм’ера адбылася ў Нью-Ёрку ў кастрычніку 1991 года ў Бібліятэцы Аб’яднаных нацый. Але адразу па вяртанні «Песняроў» з ЗША «Вянок» прадставілі ў Беларусі: менавіта 9 снежня, у дзень 100-гадовага юбілею паэта, чые словы натхнілі на стварэнне песень. Усяго іх 15. У гэтым цыкле прагучала «Вераніка» Ігара Лучанка і «Зорка Венера» Сымона Рак-Міхайлоўскага, якія ўжо былі папулярныя да таго часу і сталі разынкамі праграмы разам з новымі творамі, сярод якіх былі яшчэ «Слуцкія ткачыхі» і «Лявоніха» — іх таксама ўпадабалі слухачы, гэтыя песні гучалі потым. Таму што з часу прэм’еры ў Беларусі цыкл «Вянок» цалкам не гучаў.

І вось пасля таго першага і адзінага выканання ў снежні 1991 года праграма «Вянок» адноўленая і будзе прадстаўлена ў Мінску цалкам, адпаведна задуме Уладзіміра Мулявіна. Аднаўленне праграмы запатрабавала шмат намаганняў. Па-першае, нотны матэрыял праграмы не захаваўся. Але калі ёсць моцнае жаданне нешта зрабіць, то абставіны спрыяюць: унікальны аўдыязапіс праграмы, зроблены падчас репетыцыі, знайшоўся ў Маскве — у прыватнай калекцыі прыхільніка ансамбля «Песняры» Уладзіміра Пазняка. Гэты запіс дае ўяўленне аб праграме «Вянок» у яе поўным аб’ёме. Гэтая стужка ў алічбаваным варыянце была прадастаўлена Нацыянальнаму акадэмічнаму народнаму аркестру Беларусі імя І. Жыновіча. Заслужаны артыст Рэспублікі Беларусь Аляксандр Крамко стварыў аранжыроўкі ўсіх 15 песень цыкла «Вянок». Іх ужо можна было пачуць: праграма выконвалася 9 верасня 2017 г. на плошчы каля Мінскай ратушы і была прымеркавана да святкавання 950-годдзя беларускай сталіцы. Ці шмат хто яе пачуў тады?

Але цяпер ёсць магчымасць паслухаць цэласны твор, якім з’яўляецца праграма «Вянок», паслухаць, як прыгожа гучаць і ў ХХІ стагоддзі песні, створаныя на знакамітыя вершы Максіма Багдановіча. Гэта ўсё дзякуючы працы, праведзенай Нацыянальным акадэмічным народным аркестрам Беларусі імя І. Жыновіча, і Аляксандру Крамко, які выступіць у якасці дырыжора. У канцэрце бяруць удзел запрошаныя выканаўцы: Ян Жанчак, экс-саліст гуртоў «Лявоны», і «Песняры» п/к Леаніда Барткевіча, салісты гурта «Спадчына» Вячаслаў Ісачанка (вакал), Андрэй Шчыткавец (бас-гітара) і Сяргей Шкурдзэ (ударныя), саліст Нацыянальнага акадэмічнага народнага аркестра Беларусі імя І. Жыновіча, лаўрэат міжнародных конкурсаў Андрэй Коласаў, таксама вакальны гурт «Дыямент» у складзе Наталлі Шэрсцень, Таццяны Лаўрэнцьевай і Уладзіслава Даніловіча. Але нават калі не цяпер, то «Вянок» можа прыйсці ў кожны дом: рыхтуецца кампакт-дыск з запісам цыкла ў выкананні ансамбля «Песняры», да працы над якім спрычыніўся колішні музыкант «Песняроў» Мікалай Няронскі.

Марыя АСІПЕНКА