Джаз як любоў і каханне

У панядзелак упершыню ў Віцебску выступілі зоркі джаза з Нью-Ёрка. Сярод іх — уладальнік прэміі Grammy, знакаміты саксафаніст Майран Уолдэн (Myron Walden).

Яшчэ ў 6 гадоў ён захапіўся джазам. Скончыў прэстыжную Манхэтанскую школу музыкі (Manhattan School of Music). Выступае з першымі велічынямі сусветнага джаза. Адказваючы на пытанні нашага карэспандэнта, музыкант прызнаўся, што джаз для яго форма выказвання:

 — У ім я магу быць самім сабой. Менавіта джаз вельмі блізкі этнічнай культуры афраамерыканцаў... Нарадзіўся я ў Маямі. Мае бацькі не маюць ніякага дачынення да музыкі.

 А што да тых, хто побач штодня? Пытанне наконт таго, ці павінна жанчына, якая яму спадабаецца, любіць джаз, выклікала ўсмешку. Майран узгадаў, што са сваёй будучай жонкай, з якой жыве каля 12 гадоў, пазнаёміўся пасля аднаго выступлення. Апошнім застаўся незадаволены, але дзяўчыне ўсё спадабалася.

— Праўда, яна прызналася, што пачула толькі канец канцэрта. Але яе і гэта ўзрушыла. І яе шчырасць, і ўсмешка мяне кранулі да глыбіні душы. З таго моманту зразумеў, што яна і ёсць тая адзіная — на ўсё жыццё! — працягвае джазмен.

Як кажуць, без цяжкасцяў перакладу пагутарылі і з аўтарам кампазіцый, якія прагучалі на віцебскім канцэрце. Арк Аўруцкі эмігрыраваў у ЗША. Ён — кантрабасіст, кампазітар і бэндлідар, лаўрэат джазавых фестываляў і аўтар шматлікіх міжнародных джазавых праектаў. За апошнія 12 гадоў супрацоўнічаў з самымі вядомымі джазменамі. У яго творчай скарбонцы і чатыры сольныя альбомы. Скончыў аспірантуру Ратгерскага ўніверсітэта (ЗША), дактарантуру Універсітэта Ілінойс па класе кантрабаса.

— Да 2005 года шмат гастраляваў па былым СССР: ад Уладзівастока да Санкт-Пецярбурга. І ўсюды слухалі джаз з задавальненнем. Бывае, што сярод слухачоў тут ёсць тыя, хто стала жыве ў Амерыцы. І, наадварот, нашы, якія, напрыклад, у Нью-Ёрку прыйшлі на канцэрт… Джаз — музыка інтэрнацыянальная. Няма розніцы: еўрапейскі джаз або амерыканскі. Гэта музыка з’явілася на стыку дзвюх культур — афрыканскай і еўрапейскай. Нарадзілася ў Новым Арлеяне, яе «карані» — з вулічных карнавальных шэсцяў, — разважае Арк Аўруцкі.

У Віцебску ў зале Нацыянальнага акадэмічнага драматычнага тэатра імя Якуба Коласа, дзе выступілі музыканты, не было свабодных месцаў. Людзі розных узростаў бурнымі апладысментамі дзякавалі музыкантам. Пасля канцэрта было шмат ахвотных фатаграфавацца побач з джазменамі. Да гэтага яны выступілі ў Гомелі і Мінску. Потым збіраліся ў Кіеў… Як ні дзіўна, адным з нямногіх гарадоў СССР, дзе праводзіліся джазавыя фестывалі, быў менавіта правінцыйны Віцебск. І сюды прыязджалі самыя вядомыя на той час савецкія музыканты. Не выключана, што гэтая традыцыя будзе адроджана.

Аляксандр ПУКШАНСКІ, фота аўтара