Цікавае адмысловае аздабленне рабочай зоны на кухні штодзень стварае гаспадыні выдатны настрой і ўпрыгожвае інтэр'ер, падкрэслівае фасад кухоннага гарнітура.
Што такое кухонны фартух?
Фартухом (па аналогіі з элементам адзення хатніх гаспадынь) называюць частку сцяны паміж верхнімі і ніжнімі шафкамі кухоннага гарнітура. У прынцыпе, яго функцыянальнае прызначэнне цалкам адпавядае звыклай назве. Фартух для кухні засцерагае сцяну над плітой і ракавінай ад тлустых пырскаў, плям і пары. Часцей за ўсё аздобным матэрыялам закрываецца ўся сцяна ўздоўж стальніцы, але пры жаданні можаце абмежавацца невялікімі ўстаўкамі толькі ў зоне пліты і мыйкі.
Наколькі высокім павінен быць фартух на вашай кухні, залежыць ад дзвюх важных рэчаў: вашага росту і тыпу пліты. Невысокім людзям зручней верхнія модулі вешаць ніжэй, і прастора паміж шафкамі будзе невялікай.
Важна
Плануючы памеры фартуха, улічыце: ён павінен на некалькі сантыметраў заходзіць пад верхнія/ніжнія шафкі і стальніцу.
Стык паміж фартухом і стальніцай пажадана аздобіць плінтусам і апрацаваць сіліконавым герметыкам. Без яго вада можа зацякаць за падлогавыя шафкі: задняя сценка з ДВП з часам набрыняе і дэфармуецца, а на сцяне вольна разрасцецца грыбок.
Для афармлення фартуха не падыходзяць сітаватыя матэрыялы, напрыклад, неглазураваная плітка пад камень або вінныя коркі. У сітавінах збіраецца вільгаць і тлушч, мыць паверхню нязручна, бактэрыі адчуваюць сябе прывольна.
Ідэальна, калі паверхня будзе гладкая і роўная, без швоў і стыкаў, у якія могуць трапіць вільгаць і бруд.
Як аформіць фартух?
Выбіраючы аздабленне фартуха на кухні, вызначыцеся, якую ролю ён адыграе ў дызайне. Непрыкметнага фону для прыгожага гарнітура? Выбірайце нейтральнае аздабленне ў тон сцен або фасадаў. Інтэр'ер патрабуе яркага акцэнту? Сыграйце на кантрасце і ўсталюйце пано з яркім малюнкам.
Парада
Каб не памыліцца, спачатку вызначыцеся з фасадамі, стальніцай, аздабленнем сцен і падлогі (у ідэале вазьміце ўзоры), а потым вырашайце, якім рабіць фартух.
Незалежна ад матэрыялу самы ўніверсальны колер аздаблення – белы. Ён выдатна спалучаецца з любым кухонным гарнітурам і любымі аздобнымі матэрыяламі. Баіцеся, што цалкам белы фартух занадта сумны? Разбаўце яго яркімі ўстаўкамі з мазаікі, каляровай пліткі і керамічнымі дэкорамі з фотадрукам. Папулярныя і іншыя нейтральныя колеры – малочны, бэжавы, светла-шэры, адценне шампанскага і слановай косці.
Яркае аздабленне абавязкова патрабуе падтрымкі ў інтэр'еры: тэкстылі, абіўцы мэблі, малюнку на шпалерах, аксэсуарах. Кідкі фартух заўсёды ў цэнтры ўвагі і павінен быць ідэальна чыстым – любы бруд будзе кідацца ў вочы.
Калі бюджэт на рамонт кухні абмежаваны, можна набыць недарагі кухонны гарнітур з простымі фасадамі, нейтральныя шпалеры і падлогавае пакрыццё. Затое фартух выбраць даражэйшы і ператварыць яго ва ўпрыгажэнне інтэр'еру.
З чаго зрабіць фартух на кухні?
З керамічнай пліткі
Найлепшы варыянт па суадносінах кошту, якасці, выгады і даўгавечнасці. На фартухах часцей выкарыстоўваюць глазураваную керамічную/кафляную плітку, радзей – тонкі керамаграніт.
Вялікая перавага керамікі – наяўнасць разнастайных па дызайне калекцый на любы густ і кашалёк. Паверхня керамічнага фартуха можа імітаваць тэкстуру дрэва, каменя, металу, скуры, бетону. А значыць, вы атрымаеце стыльны, фактурны, цікавы інтэр'ер за разумныя грошы.
З фотапліткі
Можна абмежавацца фабрычнымі дэкорамі з фотадрукам (знайсці такія можна ў калекцыях большасці буйных вытворцаў пліткі) або зрабіць фотапано на заказ. Большасць плюсоў і мінусаў у гэтага віду аздаблення тыя ж, што і ў звычайнай керамічнай пліткі. Але звярніце ўвагу на некалькі істотных недахопаў:
* цана фартуха з фотапліткі значна вышэйшая за звычайныя калекцыі;
* недарагая фотаплітка з друкам метадам сублімацыі з часам цьмянее і выліньвае на сонцы, а дэколь абыдзецца ўдвая даражэй;
* фабрычныя фотадэкоры больш даўгавечныя, чым вырабленыя па індывідуальным заказе;
* не любіць агрэсіўных мыйных сродкаў, асабліва з абразіўнымі элементамі.
Са шкла
Прыгожае і практычнае аздабленне, якое па многіх уласцівасцях не саступае керамічнай плітцы. Падтрымліваць яго ў чысціні прасцей, чым прынята думаць, а гарачыня і вільгаць ніяк не адаб'юцца на яго вонкавым выглядзе. Для аздаблення фартуха на кухні выкарыстоўваюць трывалае ліставое шкло таўшчынёй 6 і 8 мм са спецыяльнай загартоўкай.
Фартух для кухні са шкла з фотадрукам каштуе значна даражэй за плітку і мазаіку, не кажучы пра пластык. Акрамя кошту вырабу шкляной панэлі, варта закласці яшчэ выдаткі на падгонку і прымерку малюнка, фотапробы, мантаж, выразанне адтулін пад разеткі і рэйлінгі і іншыя невідавочныя неспрактыкаванаму пакупніку паслугі. Мацней за ўсё на цану фартуха паўплываюць таўшчыня, тып, памеры шкла і спосаб нанясення малюнка. Самы бюджэтны варыянт – празрыстая панэль, сцяну за якой можна пафарбаваць альбо абклеіць прыгожымі шпалерамі.
Аліна БЯЛОВА
Працяг матэрыяла чытайце ў лістападаўскім нумары "Алесі".
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.