22 Верасень, субота

Вы тут

Мінскі палац спорту: якім быў у 1966-м і якім будзе ў 2019-м


Напэўна гэта самы вядомы спартыўны будынак сталіцы, яго ведаюць як дарослыя аматары спорту, так і юныя. На ім запальваліся «зоркі» 50 гадоў таму і запальваюцца сёння. Ён прымаў спаборніцтвы рознага ўзроўню — ад спартакіяд да чэмпіянатаў свету, быў запатрабаваны палову стагоддзя таму, калі з'яўляўся самым буйным спартыўным аб'ектам сталіцы і застаецца папулярны сёння, калі ўжо даўно не з'яўляецца самым маштабным у Мінску.


Будаўніцтва арэны пачалося ў 1963-м, у адным з самых жывапісных месцаў сталіцы — на беразе Свіслачы, а завяршылася праз тры гады, напярэдадні Дня Перамогі 7 мая 1966-га. Збудаванне па тых часах стала ўнікальным і першым такім у Савецкім Саюзе. Пры яго стварэнні былі ўжытыя новыя будаўнічыя матэрыялы і зроблены арыгінальныя сядзенні з шклапластыку. Пазней дакладна такія ж спартыўныя палацы з'явіліся ў Чэлябінску, Днепрапятроўску, Валгаградзе і Вільнюсе.

Папулярнасцю арэна стала карыстацца адразу, за першыя 20 гадоў у мінскім Палацы спорту адбыліся найбуйнейшыя рэспубліканскія спаборніцтвы, саюзныя чэмпіянаты і міжнародныя турніры па барацьбе, фехтаванні, боксе, цяжкай атлетыцы, спартыўнай і мастацкай гімнастыцы. Тут праводзілі свае матчы ў саюзных чэмпіянатах хакейны клуб «Дынама» і гандбольны СКА.

За 50 гадоў на гэтай арэне запалілася далёка не адна сусветная спартыўная «зорка». Напрыклад, у пачатку 70-х на чэмпіянаце Еўропы па спартыўнай гімнастыцы, які праходзіў у Мінску, бліскала наша Тамара Лазаковіч.

Вольга Корбут, дарэчы, тады таксама была ў Мінску, але толькі ў якасці запасной у камандзе СССР. На юніёрскім чэмпіянаце Еўропы па хакеі на лёдзе мінскага Палаца спорту гуляў сённяшні галоўны трэнер зборнай Расіі па хакеі, а тады яшчэ юны Алег Знарок. З юніёрскага хакея тут пачыналася кар'ера такіх зорак, як Яўгена Малкіна і Аляксандра Радулава.

Акрамя спартыўных мерапрыемстваў у Палацы праводзіліся і праводзяцца канцэрты, выстаўкі і іншыя культурна-масавыя мерапрыемствы. У яго сценах пабывалі такія вядомыя прадстаўнікі шоу-бізнесу, як Энрыке Іглесіяс, Ванэса Мэй, Наталля Арэйра, Ала Пугачова і іншыя.

Не дзіўна, што на пачатку 2000-х Палац ужо меў патрэбу ў абнаўленні, таму была праведзена паэтапная рэканструкцыя: абноўленыя фасады будынка, заменены халадзільнае, светлавое і гукавое абсталяванні, усталявана сістэма кандыцыянавання паветра, заменены сядзенні для гледачоў, устаноўлена новае электронна-інфармацыйнае табло.

Сёння ў гэтым шматфункцыянальным комплексе могуць праходзіць спаборніцтвы па 22 відах спорту, а таксама канцэрты і іншыя відовішчныя мерапрыемствы.

На фоне буйных сучасных спартыўных збудаванняў 50-гадовы Палац спорту не згубіўся, пра гэта сведчыць яго запатрабаванасць. За першыя дзевяць месяцаў гэтага года комплекс прыняў 20 спартыўных турніраў рознага ўзроўню. У іх ліку чэмпіянат свету па тайскім боксе і паўэрліфтынгу, Кубак Еўропы па дзюдо, этап Кубка свету па скачках на батуце. Дзякуючы сваёй шматфункцыянальнасці перыядычна на працягу года ён ператвараўся ў лядовую пляцоўку, дзе праходзілі матчы чэмпіянату краіны па хакеі.

Таму не дзіўна, што аб'ект увайшоў у спіс палацаў, якія прымуць спаборніцтвы ІІ Еўрапейскіх гульняў. Плануецца, што тут пройдуць турніры па самба, грэка-рымскай, вольнай і жаночай барацьбе.

Чакаецца, што да Еўрагульняў Палац спорту яшчэ трохі зменіцца ў лепшы бок, хоць капітальны рамонт праводзіцца там штогод, а сур'ёзных паломак наогул ніколі не было. Да 2019 года плануецца закупіць табло памерам 12,5 м на 7 м, якое будзе складацца з чатырох частак. На ім будуць паказваць паўторы спаборніцтваў і рэкламу (цяпер у Палацы спорту ўжо ёсць адно мультымедыйнае гульнявое табло), таксама ў планах набыць гукавы пульт, які зробіць спаборніцтвы яшчэ больш яркімі, гучнымі і зручнымі для гледачоў.

Дар'я ЛАБАЖЭВІЧ

lobazhevich@zviazda.by

Загаловак у газеце: За 50 гадоў ён бачыў усё

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.