22 кастрычніка, чацвер

Вы тут

500-годдзе нацыянальнага кнігадрукавання мы адзначылі годна


2017 год аказаўся вельмі плённы для краіны ў напрамку развіцця і папулярызацыі беларускай культуры. Сёлета Беларусь святкавала 500-годдзе кнігадрукавання, у гэты перыяд быў закладзены падмурак для стварэння новых асветніцкіх праектаў. У Нацыянальнай бібліятэцы Беларусі падвялі вынікі юбілейнага скарынаўскага года.


Ура­чыс­тас­ці «Свят­ло Ска­ры­ны» ад­крыў мі­ністр ін­фар­ма­цыі Аляк­сандр Кар­лю­ке­віч.

500 гадоў таму Францыск Скарына надрукаваў «Псалтыр» — першую кнігу ў беларускім і ўсходнеславянскім кнігавыданні. Усяго ж ім было перакладзена і выдадзена 25 кніг, дзякуючы якім мы сёння можам гаварыць пра Скарыну як пра асветніка-гуманіста, тэарэтыка кніжнага мастацтва. Менавіта таму свята 500-годдзя кнігавыдання ў краіне адзначаецца шырока і на самым высокім узроўні. За год была праведзена вялікая праца, якая паказала адказнае стаўленне і неабыякавасць беларускага грамадства да айчыннай гісторыі і культуры.

— Гэты год пачынаўся з пасяджэння арганізацыйнага камітэта, які ўзначальвалі Лілія Ананіч і Барыс Святлоў, — успамінае міністр інфармацыі Аляксандр Карлюкевіч. — Можна прыгадаць крокі, якія рабілі Міністэрства культуры, Міністэрства інфармацыі, Нацыянальная бібліятэка Беларусі, самыя розныя грамадскія і асветніцкія ўстановы нашай краіны, якія прадэманстравалі, што гэты год невыпадковы для Беларусі. Невыпадковы не толькі ў плане шанавання памяці работы папярэднікаў, але і для будучыні. Вельмі прыемна, што падсумоўваецца гэты год такой вялікай справай, як выхад у выдавецтве «Беларуская энцыклапедыя імя Петруся Броўкі» аднатомнай энцыклапедыі «Францыск Скарына». Саюз пісьменнікаў Беларусі таксама праводзіў шмат конкурсаў, рэалізоўваў ініцыятывы.

Уз­на­га­ро­ду пры­мае га­лоў­ны рэ­дак­тар ча­со­пі­са «Нё­ман» Аляк­сей Ча­ро­та.

Падрыхтоўка да 500-годдзя айчыннага кнігадруку пачалася яшчэ летась. Сёлета старт юбілею быў дадзены на Мінскай міжнароднай кніжнай выстаўцы-кірмашы. У межах мерапрыемства прайшоў сімпозіум літаратараў «Пісьменнік і час», на якім сабраліся прадстаўнікі 20 краін свету. Важнай часткай святкавання стаў Дзень беларускага пісьменства, які сімвалічна прайшоў на радзіме Францыска Скарыны ў Полацку. Свята было насычана разнастайнымі мерапрыемствамі, сярод якіх Міжнародны круглы стол беларускіх і замежных літаратараў «Дыпламатыя слова. Францыск Скарына ў сусветнай гуманітарнай прасторы», фінал Рэспубліканскага творчага конкурсу юных чытальнікаў «Жывая класіка». Дзякуючы Міністэрству інфармацыі, Міністэрству культуры, Міністэрству замежных спраў, Нацыянальнай бібліятэцы, пасольствам кнігі скарынаўскай тэматыкі былі прадстаўлены ў многіх краінах. Круглыя сталы, прысвечаныя 500-годдзю беларускага і ўсходнеславянскага кнігадрукавання, прайшлі ў Празе, Парыжы, Вільнюсе, Лондане, Варшаве, Пекіне, Бялградзе, Маскве, Санкт-Пецярбургу. І гэта далёка не ўсе гарады. А праект Выдавецкага дома «Звязда» — кніга «Францыск Скарына на мовах народаў свету» набыў вялікую папулярнасць. Урывак з прадмовы да кнігі «Юдзіф» перакладзены на 66 моў.

На мерапрыемстве не былі агучаныя лічбы, колькі ўсё ж такі здзейснена праектаў, прысвечаных Францыску Скарыну. Падлічыць немагчыма. Яны ажыццяўляліся па ўсёй краіне і былі навуковыя, творчыя, нават дзіцячыя. А зусім нядаўна адбылася прэм'ера фільма «Скарына», у якім паказаны не проста лёс першадрукара, а зроблены акцэнт на характары, звычках і выглядзе асветніка.

500-годдзе беларускага кнігадрукавання стала адпраўным пунктам да яшчэ больш актыўнай дзейнасці ў напрамку развіцця айчыннай культуры. Пра дасягненні і планы на будучыню на мерапрыемстве расказаў дырэктар Нацыянальнай бібліятэкі Беларусі Раман Матульскі:

— Калі мы кажам пра захаванне спадчыны Скарыны, трэба памятаць, што гісторыя дайшла да нас з дапамогай людзей, здаецца, непрыкметнай прафесіі — бібліятэкараў. Дзякуючы іх працы ў Беларусі, а таксама нашым калегам у Расіі, Польшчы, Літве, Украіне, нам па старонцы ўдалося сабраць выданне, якое на сёння з'яўляецца найбольш поўным зборам кніжнай спадчыны Скарыны. Я ўпэўнены, што мы ведаем пра Скарыну далёка не ўсё, аднак зрабілі яшчэ адзін крок наперад. Да працы далучыліся не толькі навукоўцы, але і ўсе людзі, неабыякавыя да гісторыі народа. Гэты год яшчэ і Год навукі. І мы невыпадкова ўслаўляем нашага першага доктара навук, які пакінуў пасля сябе вялікую спадчыну. Кіраўнік краіны паставіў перад намі вельмі важную, але няпростую задачу — фарміраваць культурны імунітэт нашага народа, і не толькі ў год 500-годдзя кнігадрукавання. Таму многія навуковыя і творчыя праекты чакаюць нас наперадзе.

Падчас падвядзення вынікаў была адзначана прафесійная праца СМІ, якія ў вялікім аб'ёме асвятлялі святочныя мерапрыемствы, падрыхтавалі шмат цікавых матэрыялаў пра гісторыю беларускага кнігадрукавання, дзякуючы гэтаму пра знакавы юбілей даведаліся далёка за межамі Беларусі.

Вікторыя АСКЕРА

Фота Яўгена ПЯСЕЦКАГА

Загаловак у газеце: Плённы год

Выбар рэдакцыі

Культура

​Як вывозілі каштоўнасці з музеяў БССР у канцы 1920-х — пачатку 1930-х гг.

​Як вывозілі каштоўнасці з музеяў БССР у канцы 1920-х — пачатку 1930-х гг.

Даследчыкі савецкай індустрыялізацыі традыцыйна бралі пад увагу дзве галоўныя крыніцы яе фінансавання — экспарт сыравіны і сельскагаспадарчай прадукцыі. 

Культура

Леў Клейнбарт. Чалавек, якi адкрыў для чытацкай публiкi Янку Купалу i Сяргея Ясенiна, нарадзiўся ў Капылi — у доме, якi захаваўся да нашых дзён

Леў Клейнбарт. Чалавек, якi адкрыў для чытацкай публiкi Янку Купалу i Сяргея Ясенiна, нарадзiўся ў Капылi — у доме, якi захаваўся да нашых дзён

У пачатку XX стагоддзя публiцыст, крытык i журналiст Леў Клейнбарт быў уплывовай асобай сярод творчай iнтэлiгенцыi Пецярбурга.

Эканоміка

Студэнцкі попыт на кошт арэнды жылля амаль не паўплываў

Студэнцкі попыт на кошт арэнды жылля амаль не паўплываў

Спецыялісты адзначаюць: добра яшчэ, што рынак выжыў.

Грамадства

Як правільна суперажываць блізкім? Чаму не працуе звычайнае «Вазьмі сябе ў рукі!»?

Як правільна суперажываць блізкім? Чаму не працуе звычайнае «Вазьмі сябе ў рукі!»?

У падтрымцы звычайна маюць патрэбу ўсе жывыя людзі ў складаныя перыяды жыцця.