У перадсвяточныя дні дарослыя стараюцца стварыць свята для кожнага малога, падарыць усім запамінальныя хвіліны і ласункі. Дзеці водзяць карагоды, ходзяць на балі, запальваюць ёлкі, сустракаюцца з Дзедам Марозам...
У межах акцыі «Нашы дзеці» навукова-педагагічны комплекс «Варонскі дзіцячы сад-пачатковая школа» паўдзельнічаў у піянерскай акцыі «Чырвоная рукавічка». Работнікі ўстановы, навучэнцы і іх бацькі сабралі і пералічылі грашовыя сродкі на разліковы рахунак Дзіцячага фонду. Яны таксама наведалі 5-гадовую Танечку Заброцкую з вёскі Фальваркі, якая з-за хваробы не можа наведваць дзіцячы садок.
На Ашмяншчыне дзеці гасцявалі ў рэзідэнцыі Дзеда Мароза, што ў аграсядзібе «Вячкойні». Прайшоўшы займальны квэст, яны выратавалі ад ведзьмы Круэлы шчанюка Маршала, а таксама зрабілі навагоднія падарункі падчас майстар-класа.
Разам з дарослымі на гарадской плошчы малыя ўрачыста запальвалі ёлку і вадзілі карагоды на «Навагоднім карнавале».
А ў Навагрудку члены аб'яднанняў «Беларускага саюза жанчын» і «БРСМ», прадстаўнікі мясцовай улады гэтымі днямі ператвараюцца ў казачных герояў і ходзяць у госці ў сацыяльныя прытулкі, шматдзетныя сем'і, дамы сямейнага тыпу... Днямі яны завіталі да татаў, якія самастойна выхоўваюць дзетак. Аляксандр Казловіч — школьнікаў Таццяну і Яўгена, а Аляксей Вараб'ёў знаходзіцца ў дэкрэтным адпачынку з двухгадовым Кірылам і водзіць у дзіцячы садок трохгадовую Мілану.
У Карэліцкім раёне дзеткі з сацыяльна-педагагічнага цэнтра і малыя з апякунскіх і прыёмных сем'яў трапілі на баль у Мірскі замак. Яго гаспадары — Кароль Станіслаў Радзівіл і княгіня Тэрэза Караліна — уручылі дзецям салодкія падарункі.
Выхаванцы Радуньскага дзіцячага сацыяльнага прытулку, што ў Воранаўскім раёне, таксама днямі пагасцявалі ў Мірскім замку і дапамаглі княгіні запаліць навагоднюю ёлку.
Прадпрыемствы і арганізацыі Астравецкага раёна таксама ўзялі ўдзел у акцыі «Нашы дзеці». Супрацоўнікі РУП «Беларуская атамная электрастанцыя» наведалі сацыяльна-педагагічны цэнтр Астравецкага раёна ў аграгарадку Варняны.
— Гэта самая добрая акцыя года, — адзначыў намеснік генеральнага дырэктара прадпрыемства Валерый СЯНЮЦЬ. — Нашы супрацоўнікі з задавальненнем далучыліся да збору сродкаў, каб набыць для дзяцей, якія знаходзяцца ў прытулку, новы вялікі тэлевізар.
Са свайго боку дзевяць дзяцей, якія засталіся без бацькоўскай апекі і любові і пакуль жывуць у прытулку, падарылі дарослым навагоднія вершы і самаробныя сувеніры — сэрцайкі з пажаданнямі.
Актывісты БРСМ на Астравеччыне завіталі ў прыёмнае і педыятрычнае аддзяленні мясцовай раённай бальніцы. Замест уколаў і лекаў маленькіх пацыентаў тут гэтым разам чакалі Дзед Мароз са Снягуркай ды карагоды, а яшчэ... падарункі ад моладзі Астравеччыны і фруктовыя ласункі, прыгатаваныя супрацоўнікамі раённага аддзела па надзвычайных сітуацыях.
Дабрачынная эстафета працягвае сваё падарожжа па мястэчках Беларусі.
Ірына СІДАРОК
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
