23 Верасень, нядзеля

Вы тут

Абвешчаны збор сродкаў на работы ў мсціслаўскім касцёле


Абвешчаны збор сродкаў на падрыхтоўку дакументаў першачарговых супрацьаварыйных работ у касцёле былога калегіума езуітаў XVІІ стагоддзя ў горадзе Мсціславе. Гэта звязана з тым, што ў былым езуіцкім касцёле абрынулася частка сцяны, якая трымала нагрузку зводу будынка.


Мясцовы дабрачынны фонд «Адраджэнне гісторыка-архітэктурных помнікаў Мсціслава» пачаў збор сродкаў, таксама адкрыты разліковы рахунак, інфармацыя пра які размешчана на сайтах Мсціслаўскага, Кіраўскага, Крычаўскага, Бабруйскага, Асіповіцкага райвыканкамаў, Міністэрства культуры. Варта адзначыць, што ў папярэднія гады з прыцягненнем дабрачынных ахвяраванняў ажыццёўлена замена вежы на камяніцы ў Нясвіжы, праводзіліся работы па захаванні касцельнай вежы ў Навагрудку.

У Міністэрстве культуры растлумачылі, што, паводле заканадаўства ў сферы аховы гісторыка-культурнай спадчыны Беларусі, забеспячэнне захаванасці гісторыка-культурных каштоўнасцяў ускладаецца на іх уласнікаў (карыстальнікаў). Пры падпісанні ахоўнага абавязацельства ўласнікі прымаюць абавязкі па захаванні нерухомых гісторыка-культурных каштоўнасцяў. Рашэнне аб неабходнасці правядзення работ на аб'ектах прымаюць мясцовыя выканаўчыя і распарадчыя органы, што прадугледжана палажэннем аб парадку падрыхтоўкі і выдачы дазвольнай дакументацыі на будаўніцтва аб'ектаў, зацверджаным Саветам Міністраў. З рэспубліканскага бюджэту штогод, зыходзячы з інвестыцыйных магчымасцяў, накіроўваюцца сродкі для забеспячэння захаванасці гісторыка-культурных каштоўнасцяў, якія знаходзяцца ва ўласнасці Беларусі, і доступу да іх, а таксама гісторыка-культурных каштоўнасцяў катэгорый «0», «1», «2», якія знаходзяцца ва ўласнасці адміністрацыйна-тэрытарыяльных адзінак і ва ўласнасці рэлігійных арганізацый, па пераліку, зацверджаным пастановай Савета Міністраў, у частцы капітальных выдаткаў.

У 2018 годзе ў дзяржаўнай інвестыцыйнай праграме і праграме «Культура Беларусі на 2016—2020 гады» плануецца працягнуць фінансаванне найбольш значных аб'ектаў, работы па якіх былі пачаты ў мінулыя гады: Косаўскі палацава-паркавы ансамбль Івацэвіцкага раёна Брэсцкай вобласці; палацавы комплекс у гарадскім пасёлку Ружаны Пружанскага раёна Брэсцкай вобласці; Спаса-Праабражэнская царква ў Полацку; комплекс былога калегіума езуітаў у вёсцы Юравічы Калінкавіцкага раёна Гомельскай вобласці; касцёл Божага Цела ў Нясвіжы; палацава-паркавы ансамбль у вёсцы Жылічы Кіраўскага раёна Магілёўскай вобласці; Успенскі манастыр у вёсцы Пустынкі Мсціслаўскага раёна Магілёўскай вобласці; замкі ў гарадах Гродзенскай вобласці — Лідзе, Навагрудку, у вёсцы Крэва Смаргонскага раёна, у вёсцы Гальшаны Ашмянскага раёна.

За апошнія гады са сродкаў рэспубліканскага бюджэту была зроблена рэстаўрацыя на такіх значных аб'ектах спадчыны, як палац Румянцавых — Паскевічаў у Гомелі, палац у Крычаве, замкі ў горадзе Нясвіжы і гарадскім пасёлку Мір. Цяпер гэтыя аб'екты з'яўляюцца іміджавымі для Беларусі і дазваляюць прыцягваць турыстаў.

Разам з тым ёсць і прыклады зацікаўленасці мясцовых органаў улады, якія прымаюць захады па пошуку спонсарскіх сродкаў для адраджэння аб'ектаў спадчыны. Сярод такіх работ, што выконваюцца за кошт ахвяраванняў, — аднаўленне палаца ў Ружанах Пружанскага раёна Брэсцкай вобласці, распрацоўка праектнай дакументацыі па Старым замку ў Гродне.

Можна казаць таксама аб рэстаўрацыі гісторыка-культурных каштоўнасцяў за кошт сродкаў уласнікаў — сядзібы ў вёсцы Краскі Ваўкавыскага раёна Гродзенскай вобласці, вёсцы Лынтупы Пастаўскага раёна Віцебскай вобласці і іншае.

У наш час у Дзяржаўны спіс гісторыка-культурных каштоўнасцей Беларусі ўключана 5563 аб'екты, у тым ліку помнікі архітэктуры, горадабудаўніцтва, запаведныя месцы — 1824; помнікі гісторыі — 1204; помнікі мастацтва — 61; помнікі археалогіі — 2263; нематэрыяльныя гісторыка-культурныя каштоўнасці (абрады, традыцыі, тэхналогіі, якія адлюстроўваюць традыцыйную беларускую культуру) — 119, рухомыя матэрыяльныя гісторыка-культурныя каштоўнасці (прадметы мастацтва, гербы) — 92

Ніна ШЧАРБАЧЭВІЧ

nina@zviazda.by

Загаловак у газеце: Хто клапоціцца пра аднаўленне?

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.