Пра гэта ў ходзе пасяджэння выканкама Еўрапейскіх алімпійскіх камітэтаў расказаў дырэктар фонду «Дырэкцыя ІІ Еўрапейскіх гульняў 2019 года» Георгій Катулін.
— Колькасць разыграных камплектаў медалёў павялічыцца да 208. З'явяцца тры новыя дысцыпліны ў стральбе з лука, яшчэ па дзве вагавыя катэгорыі дададуцца ў жаночай, вольнай і грэка-рымскай барацьбе. На адзін від праграмы стане больш у спаборніцтвах па веславанні на байдарках і каноэ. Гэта мужчыны каноэ-двойка 200 метраў, на гэтай дыстанцыі дзеючым чэмпіёнам свету з'яўляецца беларус Арцём Козыр, — адзначыў дырэктар.
Нагадаем, у праграму ІІ Еўрагульняў увайшлі 15 відаў спорту: бадмінтон, баскетбол 3х3, бокс, барацьба (грэка-рымская, вольная, жаночая), веласіпедны спорт (трэк і шашы), гімнастыка (спартыўная, мастацкая, акрабатыка, аэробіка і скачкі на батуце), грэбля на байдарках і каноэ, дзюдо, каратэ, лёгкая атлетыка, самба, стральба з лука, стральба (кулявая і стэндавая), настольны тэніс, пляжны футбол.
Таксама стала вядома, што краіну-гаспадыню ІІІ Еўрапейскіх гульняў плануюць абраць у канцы 2018 года. Пра гэта паведаміў падчас пасяджэння выканкама Еўрапейскіх алімпійскіх камітэтаў у швейцарскай Лазане прэзідэнт гэтай арганізацыі Янез Качыянчыч. У сустрэчы прынялі ўдзел першы віцэ-прэзідэнт НАК Беларусі Андрэй Асташэвіч і Георгій Катулін. Апошні выступіў перад удзельнікамі пасяджэння з прэзентацыяй, ён інфармаваў аб ключавых момантах пры падрыхтоўцы Еўрапейскіх гульняў, змяненняў, якія адбыліся ў параўнанні з апошняй сустрэчай у лістападзе мінулага года. Георгій Катулін расказаў выканкаму аб пагадненнях па супрацоўніцтве з дырэкцыяй такіх буйных кампаній, як «Спорт-пары» (першы аператар электронных інтэрактыўных гульняў у Беларусі) і velcom. Тэлекамунікацыйны аператар набыў статус афіцыйнага аператара сувязі ІІ Еўрапейскіх гульняў 2019 года. На вырашальнай стадыі — перамовы па выбары дамашняга тэлевяшчальніка. На гэтую ключавую пазіцыю прэтэндуюць тры міжнародныя кампаніі: іспанская ІSB, партугальская Medіaluso-Medіapro і расійскі «Матч ТБ».
У найбліжэйшы час чакаецца вырашэнне пытання аб выбары ІT-аператара, ужо вызначаны білетны аператар. Кантракт знаходзіцца на стадыі ўзгаднення. Нагадаем, квіткі на турнір для замежных гасцей заменяць візы.
Дар'я ЛАБАЖЭВІЧ
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
