Сцюдзёныя маразы, пранізлівы вецер, завеі або снегапады дыктуюць нам цяпер свае правілы гульні: цёпла апранацца, не хандрыць, піць вітаміны, каб засцерагчы арганізм ад хвароб. З надыходам халадоў пакутуюць таксама і нашы валасы.
Як зберагчы зімой прыгажосць нашых валасоў, падкажа наш пастаянны эксперт – цырульнік Алег НАВІНСКІ.
Праблема: Сухасць і адсутнасць бляску.
Прычыны: Вам прыемна пасля знаходжання на свежым марозным паветры прыйсці ва ўтульнае, цёплае памяшканне. Толькі вось такі перапад тэмператур шкодна ўплывае на вашыя валасы – сушыць іх. Адсюль іх ломкасць, блёкласць, абязводжванне. Не на карысць валасам і частае выкарыстанне фена. Плюс шапкі, якія сваім трэннем адкрываюць лускавінкі валасоў, з-за чаго іх паверхня становіцца шурпатай і губляе бляск.
Прафілактыка: Двойчы на тыдзень рабіце ўвільгатняльную маску. У фене старайцеся выкарыстоўваць халаднаваты рэжым, а калі ёсць магчымасць – зусім адмоўцеся ад электрапрыбора. Карыстальнікам фена пажадана абавязкова спырскваць валасы тэрмаахоўным спрэем – ад каранёў да кончыкаў. Карыстайцеся бальзамам, маскамі. Вынік парадуе: цьмяныя і сухія валасы зробяцца больш паслухмянымі і бліскучымі.
Праблема: Наэлектрызаванасць.
Прычыны: Законы фізікі ніхто не адмяняў. Валасы электрызуюцца пад уздзеяннем статычнай электрычнасці. Напрыклад, пры трэнні, расчэсванні або пры кантакце з адзеннем (асабліва сінтэтыкай) на валасах утвараюцца станоўча зараджаныя іёны, што адштурхваюцца адзін ад аднаго. Таму вашыя валасы пачынаюць пушыцца і разлятацца ў розныя бакі.
Прафілактыка: У цёплым, сухім памяшканні пастарайцеся павысіць вільготнасць. Самы просты варыянт – паставіць у пакоі ёмістасць з вадой. Калі сродкі дазваляюць, можна купіць спецыяльны прыбор – увільгатняльнік паветра.
Таксама варта набыць і паставіць на палічку ў ваннай спецыяльную касметыку: увільгатняльны шампунь, кандыцыянер і спрэй. Яны дапамогуць нейтралізаваць статычную электрычнасць і зробяць валасы гладкімі і паслухмянымі.
Дарэчы
· Мыць валасы трэба пад цёплай вадой. Гарачая псуе іх і сушыць скуру галавы.
· Зімой не забывайцеся песціць валасы маскамі і алеямі некалькі разоў на тыдзень.
Праблема: Перхаць.
Прычыны: Актыўнае выкарыстанне фенаў і прасікаў (русск. “утюжков”), стрэс, фізічнае і эмацыйнае знясіленне, залішак тлустай, салёнай ці вострай ежы – усё гэта спрыяе з’яўленню няпрошанай госці – перхаці. Здавалася б, такая дробязь, а псуе не толькі настрой, але і імідж.
Прафілактыка: Выбірайце якасны шампунь у адпаведнасці з вашым тыпам валасоў. На догляд за сабой сродкаў шкадаваць не варта. Выкарыстоўваеце спецыяльны касметычны комплекс, прызначаны для барацьбы з белым шалупіннем. Не бачыце выніку? Запісвайцеся на прыём да трыхолага. Пасля курсу лячэння пад наглядам урача праблема павінна адступіць.
І памятайце, галоўная задача – не замаскіраваць перхаць, а пазбавіцца ад прычын яе з’яўлення.
Праблема: Тлустасць валасоў пад шапкай.
Прычыны: Асноўныя прычыны з’яўлення непатрэбнага бляску: спадчыннасць, няправільнае харчаванне, стрэс, змяненне гарманальнага фону. У каранёў размяшчаюцца спецыяльныя залозы, якія выпрацоўваюць скурнае сала. Яно абараняе валасы ад перасушвання і ломкасці, робіць іх здаровымі і гладкімі. Але, калі скурнага сала зашмат, валасы хутка страчваюць прывабны, свежы выгляд.
Прафілактыка: Выбірайце шампуні, у састаў якіх уваходзяць экстракты лекавых раслін – шалфею, рамонку, падбелу (русск. “мать-и-мачеха”), крапівы.. Адмоўцеся ад касметычных сродкаў з адзнакай “для ўсёй сям’і” або “для ўсіх тыпаў валасоў”. Купляйце шампунь з надпісам “для тлустых валасоў”. Не выкарыстоўвайце падчас мыцця занадта гарачую або занадта халодную ваду, яна павінна быць нейтральнай, каб не выклікаць непатрэбнай актыўнасці сальных залоз.
І яшчэ: каб вашыя валасы былі прыгожымі і здаровымі, выпівайце не менш двух літраў вады ў дзень.
Праблема: Хуткае знікненне аб'ёму.
Прычыны: Маразы і пранізлівы вецер вымушаюць жанчын надзяваць галаўны ўбор. З раніцы марнуеце час на ўкладку, але потым нацягваеце шапку ці накідваеце на галаву шалік, і ў думках развітваецеся з прыгажосцю прычоскі.
Прафілактыка: Ёсць некалькі хітрыкаў, як падоўжыць жыццё вашай укладкі. Нанясіце на вільготныя валасы спрэй для надання аб’ёму, асабліва старанна каля каранёў. Калі будзеце сушыць валасы, галаву апускайце ўніз. Пасля – лёгкае начэсванне, спырскванне лакам. Аб’ём прычоскі будзе трымацца, прыгажосць захаваецца!
Хрысціна ХІЛЬКО
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».