Вы тут

Мелодыя-малітва як памяць пра злачынствы супраць чалавека


У дзень, калі ва ўсім свеце згадваюць ахвяр Халакосту, у Беларусі адбудзецца асаблівы канцэрт: Музычная капэла «Санорус» прадставіць праграму «Кадзіш». У канцэртнай зале «Верхні горад» збяруцца былыя вязні канцлагераў, тыя, хто пацярпеў ад генацыду, члены Беларускага таварыства «Узаемаразуменне і прымірэнне», прадстаўнікі пасольстваў Ізраіля, Польшчы, Францыі. Канцэрт адбудзецца пры падтрымцы пасольства Германіі ў Беларусі.


Прагучыць музыка замежных і беларускіх кампазітараў, якая так ці інакш звязана з падзеямі, пра якія ўспамінае ўвесь свет. Менавіта 27 студзеня савецкімі войскамі быў вызвалены канцэнтрацыйны лагер «Асвенцім» і адкрылася жудасная праўда пра нянавісць на нацыянальнай глебе, праз якую была створана цэлая сістэма знішчэння людзей. Гэта закранула і нашы землі, дзе падчас Другой сусветнай вайны знішчаліся насельнікі яўрэйскіх гета, а шмат хто таксама трапляў у лагеры смерці. Успомніць ахвяр антысемітызму, ксенафобіі і нецярпімасці прапануюць канцэртам-памяццю, арганізаваным аркестрам і хорам заслужанага калектыву Рэспублікі Беларусь «Музычная капэла «Санорус» Мінскай вобласці» пад кіраўніцтвам Аляксандра Хумалы. Малады дырыжор, выхаванец беларускай музычнай школы, які ўдасканальваў сябе ў Ротэрдамскай кансерваторыі, быў адзначаны на міжнародных конкурсах, цяпер імкнецца працаваць на радзіме ярка, ствараючы адметныя праграмы. І ў гэтым канцэрце ён сабраў выдатных салістаў, лаўрэатаў міжнародных конкурсаў: скрыпачоў Ксенію Бельцюкову і Аксану Герасімёнак, Аляксандра Іванова (альт), Ірыну Кучынскую (сапрана). Удзельнічае і народны артыст Беларусі Уладзімір Пятроў.

Назву праграме дала сумная яўрэйская песня-малітва, што мае назву «Кадзіш». Яе апрацаваў французскі кампазітар Марыс Равэль у пачатку ХХ стагоддзя. Мелодыя, што суцяшае, адкрывае сэрца для любові. Малітоўны настрой са зваротам да Бога акрамя гэтай песні адлюстраваў нямецкі кампазітар Макс Брух — прагучыць яго твор «Кол Нідрэй». Музыка французскага кампазітара Франсіса Пуленка, які перажыў дзве сусветныя вайны, звяртаецца да людей: прагучыць урывак з кантаты «Твар чалавечы».

Чакаюцца прэм'еры для Беларусі: упершыню ў нас прагучыць твор нямецкага кампазітара Арнольда Шэнберга «Ацалелы з Варшавы» і «Спакойная ноч» польскага кампазітара Хенрыка Мікалая Гурэцкага.

У такім канцэрце немагчыма было абмінуць мелодыі амерыканскага кампазітара Джона Уільямса з кінафільма «Спіс Шындлера». Таксама як і творы беларускіх кампазітараў: прагучыць арыя для скрыпкі і аркестра Льва Абеліёвіча і «Не той горад» Вольгі Подгайскай. У нас свае асобы ў музыцы з асаблівым адчуваннем гэтай тэмы. Таксама як ёсць і свая гісторыя памяці тых падзей.

Марыя АСІПЕНКА

Загаловак у газеце: У тым горадзе...

Выбар рэдакцыі

Грамадства

«Звязда» дапамагла ліквідаваць стыхійную паркоўку ў Магілёве

«Звязда» дапамагла ліквідаваць стыхійную паркоўку ў Магілёве

Увагу на праблеме завастрыў старшыня вулічнага камітэта гэтай мікразоны Аляксандр Пікуля. 

Грамадства

Прамянёвая тэрапія: новыя магчымасці і рызыкі

Прамянёвая тэрапія: новыя магчымасці і рызыкі

 Прамянёвая тэрапія можа выкарыстоўвацца як у спалучэнні з хірургіяй і хіміятэрапіяй, так і як самастойны метад лячэння.

Калейдаскоп

Вясёлыя гісторыі чытачоў

Вясёлыя гісторыі чытачоў

Старэнькі «Запарожац» (цяпер такіх машын і не відаць ужо) старанна пыліў па дарозе...

Грамадства

Антарктыда чакае беларусак. Але яны пакуль туды не імкнуцца

Антарктыда чакае беларусак. Але яны пакуль туды не імкнуцца

Дванаццатая беларуская антарктычная экспедыцыя адправілася на ледзяны кантынент.