ВЕРШЫ СЕРБІІ
Гардана ВЛАІЧ
Паэтка, празаік, аўтар трох паэтычных зборнікаў, пяці кніг для дзяцей, рамана, а таксама двух зборнікаў апавяданняў. Лаўрэат шматлікіх літаратурных прэмій. Член Саюза пісьменнікаў Сербіі і аб'яднання пісьменнікаў у Ваяводзіне. Жыве ў Панчаве.
***
Карычнева-белая каза
і зрэзаны дуб
Чалавек, якога яна кахала,
доіць зычлівую
карычнева-белую казу
І на французскай,
якой ён не ведае,
не чытае бельгійскія навіны
у люксембурскім цягніку.
Яе сын не прачынаецца
з позіркам, апушчаным
на сербскія дзявочыя сцёгны.
Ён бегае па хмарачосах,
марыць перарасці Статую Свабоды
і стаць вышэйшым
за чырвоны кедр.
Толькі яе бацька
мірна спіць,
накрыты паблёклымі
кірылічнымі стужкамі,
што ўтрымліваюць пластыкавыя вянкі
пад кронай неіснуючага дуба
і зрэзанай зніклай цені.
***
Чаканне нечаканасці
Свет мінаецца ў чаканні.
У чаканні — да світання,
У чаканні — да прыпынку,
У чаканні — слоў, учынкаў,
У чаканні — да расстання,
У чаканні.
Свет мінаецца ў чаканні.
У чаканні чэрг у бары,
У чаканні паштара,
Лекара, ветэрынара,
У чаканні ганарараў.
У чаканні.
Свет мінаецца ў чаканні.
У чаканні нечакання.
Аляксандра Радаковіч
Нарадзілася ў 1993 годзе ў горадзе Кралева. Паэтка, удзельніца шэрагу паэтычных калектыўных зборнікаў і анталогій. Па прафесіі юрыст, працуе сакратаром у арганізацыі «Матица исельеника» ў Сербіі. Жыве ў Бялградзе.
***
Летуценны верш
Той неацэнены, ненапісаны, летуценны верш —
Спадарожнік ненароджанага плёну.
Пачуццё кахання абудзіла яго,
І настаў час зміратворанасці.
Бездань думак спарадзіла цьмянае,
ледзь адчувальнае пачуццё
Існавання і Знікнення,
Кароткі ўздых якога
Доўжыўся амаль бясконца.
І адкрыліся душы бязмежнае хараство
І старажытная мудрасць.
Запоўнілі летуценнем горла, душу, цела, рукі.
Аж да таго часу, пакуль ён не знік,
Пакінуўшы пасля сябе пустэчу.
***
Апошні верш для вас
Мы аберагаем душы быццам ад скразняку,
Саромячыся гэтых чалавечых пачуццяў,
Найчысцейшых з пачуццяў, якія можна адчуваць.
А яны пераследуюць нас, стомленыя грахом і сорамам.
Гэта апошні верш для Вас, эпітафія майго натхнення…
Надмагільныя камяні сняць нас…
Вантробы ў канвульсіях, курчацца ў гэтых сутыкненнях эмоцый,
Якія калечаць магчымасці, што перапаўняюць грудзі.
Нектар маладосці, вулкан выспявання,
Сутаргі ночы, пакуты ранку…
Не такімі былі Вашы планы, ды няхай:
Найлепшыя імгненні адбываюцца незапланавана.
Там, паміж дрэннымі і добрымі справамі,
На гэтай ніве мы і сустрэнемся з Вамі.
Калі сціхне розум і інстынкт
і ўсмешка затанчыць на вуснах…
Міядраг Якшыч
Нарадзіўся ў 1969 годзе ў Бялградзе, дзяцінства правёў у Старой Пазові. Аўтар дваццаці паэтычных і празаічных кніг (перакладзеных на два дзясяткі моў свету), за якія атрымаў шматлікія літаратурныя ўзнагароды ў Сербіі і іншых краінах. Як архітэктар падрыхтаваў звыш двух соцень праектаў, як выдавец — сто дзевяноста кніг і анталогій. Кіраўнік мастацкай групы і выдавецкага дома «АРТЕ». Старшыня арганізацыі «Матица исельеника» ў Сербіі, член праўлення Саюза пісьменнікаў Сербіі, арганізатар і галоўны рэдактар Мастацкай суполкі ў Крчэдзіне, дырэктар Бялградскага фестывалю выканаўцаў «КАНТФЕСТ», а таксама Міжнароднага літаратурнага фестывалю ў горадзе Інджыя «ПРО ПОЕТ». Жыве і працуе ў Бялградзе.
***
Зноў пачынаецца вясна
Ты зменіш парфюм і выправішся ў Лісабон альбо ў Стамбул,
У чаканні, што на цябе спадзе залаты дождж.
Новыя надзеі прынясуць табе новыя пачуцці,
І ты распачнеш наноўку верыць у вершы Бадлера
І ў яго каханне да крэолкі Жанны Дзюваль.
Адмовішся ад кавы,
Абмяжуеш сябе ад барацьбы са сваімі заганамі,
Адновіш сваё членства ў Настаўніка Ёгі
І з поўнай упэўненасцю, што адзенне перашкаджае сустрэчы з сабой,
З апантанасцю, цалкам голай, распачнеш заняткі Ёгай.
Без лішняй мітусні будзеш скарыстоўваць яго, скарыстоўваць…
Трэба табе партнёр альбо не…
Раз-пораз задумаешся аб пірсінгу на геніталіях,
Па згодзе пераспіш з вялікай колькасцю маладых людзей
І зразумееш, чаго жадаеш, да чаго імкнешся.
Між тым, заслону таямнічых сувязей так і не захочаш прыадчыніць.
Перастанеш прысутнічаць у Twitter і будзеш любіць сябе.
Не будзеш пазбягаць адчування поўнага шчасця. І будзеш любіць сябе.
У снах сваіх будзеш паміраць, а ў рэальнасці — існаваць. І будзеш любіць
сябе.
Аздабляючы звычайны дзень, будзеш набываць розныя цікавосткі
І без веры ў таго, хто прапануе табе перамены ў тваім целе, будзеш насіць яшчэ больш кароткія сукенкі,
Быццам бы здзекваючыся з жанчын з імплантамі.
Будзеш ствараць альбомы са шматлікіх сэлфі...
Ізноў пачынаецца вясна.
Ды паспрабуй жа ўжо нешта новае…
З сербскай мовы. Пераклад Марыі КОБЕЦ.
Мерапрыемства праводзіцца на добраахвотнай аснове.
Не выявіць ні секунды абыякавасці.