Супрацоўнікі ўпраўлення крымінальнага вышуку ГУУС Мінгарвыканкама спынілі злачынную дзейнасць 39-гадовага дамушніка, які трапляў у чужыя кватэры праз незачыненыя дзверы.
Мужчына быў затрыманы пры сілавой падтрымцы байцоў спецпадраздзялення «Алмаз», калі святкаваў у рэстаране дзень нараджэння свайго прыяцеля. А напярэдадні ён здзейсніў чарговы крадзеж з кватэры жылога дома ў Маскоўскім раёне сталіцы.
Аператыўнікі крымінальнага вышуку ўстанавілі датычнасць мужчыны да кватэрных крадзяжоў, якія былі здзейснены ў Мінску са студзеня гэтага года. Таксама ўстанаўліваецца яго дачыненне да аналагічных крадзяжоў, здзейсненых з кастрычніка мінулага года.
Каб трапіць у чужыя кватэры, зламыснік заходзіў за кім-небудзь следам у пад'езд, а пасля хадзіў па ўсіх паверхах і шукаў незачыненыя дзверы. Калі такія знаходзіў, то заходзіў у вітальню і з сумак даставаў кашалькі, адкуль забіраў грошы. Калі сумкі не было, шукаў грошы ў вопратцы. У адным выпадку скраў з пакоя ноўтбук, а адзін з крадзяжоў стаў і ўвогуле даволі прыбытковым — удалося выкрасці з кашалька 535 долараў і 20 тысяч расійскіх рублёў.
Гаспадары адразу не выяўлялі прапажу грошай і толькі на наступны дзень звярталіся ў міліцыю. А некаторыя нават і не ведалі, што сталі ахвярай дамушніка, пакуль ім пра гэта не паведамілі аператыўнікі.
Устаноўлена пяць эпізодаў, мужчына падазраецца ў здзяйсненні яшчэ дзясятка аналагічных крадзяжоў, у тым ліку з прыватных дамоў у Мінскай вобласці, а таксама ў Расіі. Мужчына, раней судзімы за маёмасныя злачынствы, разам больш за 20 гадоў адбываў пакаранне за крадзяжы.
Сяргей РАСОЛЬКА
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
