Стаматалогія — адна з тых галін медыцыны, дзе шырока выкарыстоўваюцца лічбавыя інавацыі і найноўшыя матэрыялы. Яна, напрыклад, з'яўляецца адной з самых перспектыўных для ўкаранення 3D-тэхналогій. Тое, што яшчэ некалькі гадоў таму здавалася фантастыкай, сёння ўжо рэальнасць.
У стаматалогіі для лячэння і дыягностыкі ўжо сёння выкарыстоўваецца высокатэхналагічнае абсталяванне: 3D-конусна-прамянёвыя камп'ютарныя тамографы і 3D-інтрааральныя (унутрыротавыя) сканеры, спецыяльнае праграмнае забеспячэнне па 3D-планаванні ўстаноўкі часовых ці пастаянных пратэзаў і канструкцый для рэстаўрацыі зубоў і сківіцы, выпраўлення прыкусу ці анамалій зубнога рада. Яны дазваляюць зрабіць тое ж пратэзаванне звышдакладным і малатраўматычным, а пацыента вызваляюць ад неабходнасці наведваць стаматолага шмат разоў. Прасцей кажучы, сёння зубы можна «адсканаваць» і «надрукаваць» на прынтары.
Калі яшчэ нядаўна для ўстаноўкі ў сківіцу дэнтальнага імпланта (штыфта) выкарыстоўваўся панарамны здымак, то сёння ва ўсім свеце, у тым ліку і ў Беларусі прымяняюцца так званыя хірургічныя шаблоны.
— Перад тым, як устанавіць імплант, мы маем магчымасць ацаніць стан усёй зубасківічнай сістэмы пры дапамозе 3D-конусна-прамянёвых камп'ютарных тамографаў, — расказвае загадчык кафедры артапедычнай стаматалогіі і артадантыі з курсам дзіцячай стаматалогіі БелМАПА, доктар медыцынскіх навук Сяргей Рубніковіч. — Грунтуючыся на атрыманых даных і выкарыстоўваючы спецыяльныя праграмы па 3D-планаванні, якія ўжо, дарэчы, уключаюць спецыяльныя бібліятэкі імплантаў розных айчынных і зарубежных вытворцаў, урач-стаматолаг можа разлічыць найбольш дакладнае пазіцыянаванне імпланта з улікам размяшчэння будучай каронкі ці мастападобнага пратэза. Пасля стварэння лічбавай мадэлі 3D-прынтар друкуе хірургічны шаблон. А затым устанаўліваецца імплант з часовай ці пастаяннай канструкцыяй.
Эфектыўныя 3D-тэхналогіі і ў выпраўленні прыкусу. У прыватнасці, актыўна выкарыстоўваюцца спецыяльныя капы — элайнеры, якія таксама вырабляюцца з выкарыстаннем 3D-прынтынгу. Спецыяліст «скануе» ротавую поласць пры дапамозе інтэраральнага сканера і атрымлівае аналагавы «злепак» сківіц і зубнога рада ў лічбавым фармаце. Затым пры дапамозе спецыяльных камп'ютарных праграм мадэлюе паэтапнае выроўніванне зубоў і на 3D-прынтары «друкуе» капы ў неабходнай колькасці, а пацыент паступова іх мяняе.
— Элайнеры, канешне, не панацэя. Высокую эфектыўнасць яны дэманструюць пры невялікіх анамаліях зубнога рада, — кажа галоўны ўрач Рэспубліканскай клінічнай стаматалагічнай паліклінікі, галоўны пазаштатны спецыяліст па стаматалогіі Міністэрства аховы здароўя Андрэй Мацвееў. — У той жа час гэта бяспечная альтэрнатыва брэкет-сістэмам, якія негатыўна ўплываюць на цвёрдыя тканкі зубоў.
Алена КРАВЕЦ
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!