У БДУ адкрыты прыём заявак на ўдзел у форуме "PR-кветка 2018”

XI Міжнародны адкрыты студэнцкі камунікацыйны форум “PR-кветка” пройдзе з 28 па 30 сакавіка ў Інстытуце журналістыкі БДУ. Форум з'яўляецца пляцоўкай для абмену ідэямі і вопытам паміж абітурыентамі, студэнтамі і прафесійнымі спецыялістамі з розных краін.

У гэтым годзе “PR-кветка” пройдзе пад дэвізам “Рэвалюцыя: пашыраем межы рэальнасці”. У рамках мерапрыемства будуць разгледжаны новыя тэхналогіі, апошнія тэндэнцыі і крэатыўныя ідэі сучаснай камунікацыйнай дзейнасці.

Форум прадугледжвае правядзенне конкурсу на лепшы PR-праект. У ім могуць удзельнічаць таксама старшакласнікі, якія дасягнулі 16 гадоў. У гэтым годзе заяўкі прымаюцца ў двух секцыях: “Камерцыйныя праекты” (камунікацыйнае суправаджэнне дзейнасці камерцыйных арганізацый, прасоўванне тавараў і паслуг); “Некамерцыйныя (сацыяльныя) праекты” (камунікацыйнае суправаджэнне дзейнасці некамерцыйных арганізацый, праекты ў галіне карпаратыўнай сацыяльнай адказнасці, прыцягненне ўвагі да сацыяльных праблем).

Для ўдзелу ў конкурсе неабходна запоўніць электронную заяўку да 11 сакавіка (уключна) і выслаць кароткае апісанне сваёй ініцыятывы. Удзельнічаць можна як індывідуальна, так і ў складзе каманды.

Патрабаванні афармлення праектаў і дадатковая інфармацыя аб мерапрыемстве размешчана на сайце.

Арганізатарамі форуму выступае кафедра тэхналогій камунікацыі Інстытута журналістыкі БДУ, суарганізатар — кансалтынгавая кампанія IPR Belarus.

Надзея НІКАЛАЕВА