Моцныя маразы стаяць у Беларусі ад мінулага чацвярга. За гэты час ртутны слупок падаў ажно да амаль 30 градусаў са знакам «мінус». Разам з тым стала больш і пажараў. Калі за апошнія два працоўныя дні іх адбылося 46 з пяццю загінулымі, то за выхадныя лік узгаранняў узляцеў ужо да 73 з 11 смярцямі!
Зразумела, што ў такое надвор'е сістэма ацяплення дома павінна працаваць без збояў. Але як жа правільна паліць печ?
— Яе неабходна распальваць некалькі разоў на дзень з перапынкамі, — расказвае афіцыйны прадстаўнік Міністэрства па надзвычайных сітуацыях Беларусі Віталь Навіцкі. — Бесперапыннае паленне можа прывесці да перагарту печы і з'яўлення расколін. У сваю чаргу, гэта выкліча пажар. Не выкарыстоўвайце для распальвання агню лёгкія на загаранне і гаручыя вадкасці. Пары ўспыхнуць, і чалавек, які стаіць побач з печчу, атрымае цяжкія апёкі. Калі ж сістэма ацяплення замерзла, то адагрэйце яе гарачым пяском, вадой. Выкарыстанне адкрытай крыніцы агню — напрыклад паяльнай лямпы — можа прывесці да пажару.
Небяспека падсцерагае і на адкрытым паветры. Зарабіць у такое надвор'е абмаражэнне зусім няцяжка. Справа можа дайсці і да ампутацыі канечнасці.
— Цяжкія абмаражэнні нярэдка адбываюцца ў людзей у стане моцнага алкагольнага ап'янення, — працягвае Віталь Навіцкі. — Тытунёвы дым паніжае перыферыйную цыркуляцыю крыві, што адбіваецца на руках і нагах. Цесны абутак таксама можа паспрыяць абмаражэнню. Пярсцёнкі і завушніцы пакіньце дома — метал настывае вельмі хутка і можа «прыстаць» да цела. Як толькі вы адчулі, што канечнасці пахаладзелі, — тэрмінова зайдзіце ў якое-небудзь цёплае месца. А калі заглух аўтамабіль далёка ад цывілізацыі, то выклікайце дапамогу і не пакідайце салон. Што да ўзросту, то ў групе рызыкі — дзеці і пажылыя людзі. Калі ж вы ўсё-такі выпусцілі малога ў мароз на вуліцу, то яму трэба праз 15—20 хвілін вяртацца ў цяпло.
* * *
Тым часам сумная вестка прыйшла з Гродзеншчыны. У ноч на панядзелак у вёсцы Неўда Навагрудскага раёна загарэўся жылы дом. Ратавальнікі, якія выбылі на месца падзей, адправіліся ў дом на пошукі жанчыны, якая там, па словах відавочцаў, магла знаходзіцца. І ў той час, калі звяно газадымаабарончай службы знаходзілася ўнутры будынка, абрынуліся перакрыцці і комін печы. Будаўнічыя канструкцыі заціснулі камандзіра аддзялення старшага прапаршчыка Дзмітрыя Зайко. Яго неадкладна выцягнулі з-пад завалаў і тэрмінова адвезлі ў рэанімацыйнае аддзяленне бальніцы.
Але раніцай ратавальнік памёр...
Валяр'ян ШКЛЕННІК
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!
