Баскетбалісты зборнай Беларусі сенсацыйна абыгралі чэмпіёнаў Еўропы

Наша каманда атрымала першую перамогу ў адборачным турніры чэмпіянату свету — 2019, абыграўшы дома зборную Славеніі з лікам 93:92.

Першая палова сустрэчы прайшла ў абсалютна роўнай барацьбе, а затым госці здолелі адарвацца на 9 ачкоў. У сярэдзіне трэцяй чвэрці ўжо беларусы здолелі выйсці наперад на 9 ачкоў, але чэмпіёны Еўропы хутка нейтралізавалі гэты адрыў. Усё вырашыла чацвёртая чвэрць, у якой больш удачлівымі аказаліся нашы баскетбалісты, якія здолелі перайграць куды больш знакамітых апанентаў з мінімальнай перавагай.

— Мы пішам новую гісторыю беларускага мужчынскага баскетбола, — расказвае галоўны трэнер зборнай Аляксандр КРУЦІКАЎ. — Шмат хто будзе казаць, што ў славенцаў быў не той склад, не тыя людзі, што перамагалі на чэмпіянаце Еўропы. Але вы паглядзіце ростар — там больш за палову баскетбалістаў маюць залатыя медалі кантынентальнага форуму. Нашы хлопцы праявілі характар, я вельмі задаволены. Гэта самая важная перамога на цяперашнім этапе. Гэты матч пакінуў нам шанц змагацца за трэцяе месца. У нас ёсць яшчэ дзве гульні на выездзе. Не хацеў бы, каб нас загадзя хавалі. Мы будзем змагацца.

У складзе беларускай зборнай самым выніковым стаў Дэван Садлер, у актыве якога 25 ачкоў, малады форвард Максім Салаш набраў 20 ачкоў.

— У першую чаргу дзякуй балельшчыкам за неверагодную падтрымку. Дзякуючы вам і вашай энергіі мы здабылі дадатковы рэзерв сіл і змаглі атрымаць перамогу ў такім няпростым матчы. Пасля крыўднага пройгрышу іспанцам гэты поспех для нас з'яўляецца асабліва важным. Мы правялі работу над памылкамі, і я рады, што сёння мы дамагліся станоўчага выніку, — пракаментаваў матч Максім Салаш.

Нагадаем, у першым крузе беларусы прайгралі славенцам на іх пляцоўцы з лікам 74:87, затым двойчы саступілі ў дамашніх паядынках: чарнагорцам — 67:91 і іспанцам — 82:84. Два заключныя матчы адборачнага турніру сусветнага першынства зборная Беларусі правядзе на выездзе — 28 чэрвеня ў Чарнагорыі і 1 ліпеня ў Іспаніі.

Дар'я ЛАБАЖЭВІЧ