Вы тут

Штотыднёвы спартыўны агляд «Звязды»


У штотыднёвым спартыўным аглядзе «Звязды» расказваем пра падрыхтоўку беларускіх тэнісістак да турніру ў ЗША, выступленне айчынных гандбольных клубаў у еўрапейскіх турнірах і іншых спартыўных падзеях выхадных.


1. Вікторыя Азаранка паведаміла, што паедзе на турнір WTA ў Індыян-Уэлсе (ЗША).

Раней беларуская спартсменка атрымала ўайлд-кард на турнір катэгорыі «Прэм'ер». Пасля гэтага яна размясціла ў сацсетках відэазварот, у якім падзякавала арганізатарам спаборніцтваў, адзначыўшы, што гэта адзін з яе самых любімых турніраў, там добрая публіка і выдатная арганізацыя.

Турнір BNP Parіbas Open пройдзе з 5 па 18 сакавіка. Нагадаем, у 2012-м і 2016 годзе Азаранка станавілася яго пераможцай. Вікторыя выйдзе на корт пасля доўгага перапынку. Тэнісістка прапусціла палову мінулага і пачатак гэтага сезон з-за судовых разглядаў з нагоды апекі над сынам. Адзначым, у Індыян-Уэлсе Вікторыя Азаранка і яшчэ адна беларуска Арына Сабаленка ўжо правялі сумесную трэніроўку — такую інфармацыю размясціла ў сацсетках экс-першая ракетка свету.


2. Лёгкаатлеткі Аліна Талай і Эльвіра Герман не выйшлі ў фінал дыстанцыі 60 м з бар'ерамі на чэмпіянаце свету па лёгкай атлетыцы ў закрытых памяшканнях, які праходзіць у Бірмінгеме.

У паўфінальным забегу Эльвіра Герман паказала час 8,06 сек і ў выніковым пратаколе апярэдзіла вопытную Аліну Талай, час якой склаў 8,07 сек.

Гэтыя вынікі не дазволілі беларускам выйсці ў фінал. Адзначым, што ўсе фіналісткі прабеглі ў паўфінале хутчэй за восем секундаў.


3. Гандбалісты мінскага СКА атрымалі першую перамогу ў групавым этапе розыгрышу Кубка ЕГФ.

У стартавым матчы другога круга армейцы абгулялі дацкі «Б'ерынгбро» 27:26. Нагадаем, 24 лютага сапернікі сустракаліся паміж сабой у Сількеборге, тады датчане былі мацнейшыя — 32:30.

Таксама ў першым матчы групавой стадыі Кубка ЕГФ падапечныя Ігара Папругі прайгралі на сваёй арэне нямецкаму «Магдэбургу» — 31:33, а затым згулялі ўнічыю ў Прэшаве са славацкім «Татранам» — 25:25. Свой наступны матч мінчане правядуць 25 сакавіка ў Магдэбургу.

Тым часам Брэсцкі гандбольны клуб імя Мяшкова ў заключным туры Лігі чэмпіёнаў прайграў на выездзе польскаму «Віве» 28:33. Аднак вынік гэтага матча не меў турнірнага значэння для беларускай дружыны, таму што яна ўжо забяспечыла сабе выхад у 1/8 фіналу Лігі чэмпіёнаў. Цяперашнім сапернікам БГК па накаўт-раўндзе стаў французскі «Нант».


4. Хакейная каманда Прэзідэнта атрымала пятую перамогу ў XІ Рэспубліканскіх спаборніцтвах па хакеі сярод аматараў, выйграўшы ў хакеістаў Магілёўскай вобласці з лікам 10:5.

Па чатыры бамбардзірскія балы ў складзе пераможцаў зарабілі тры гульцы: Алег Антоненка і Генадзь Савілаў закінулі па дзве шайбы і столькі ж асісціравалі партнёрам пры ўзяцці варот, а Павел Белы вызначыўся адзін раз і тройчы аддаваў галявыя перадачы.

Зараз турнірную табліцу ўзначальвае лядовая дружына Прэзідэнта, у якой 10 ачкоў з 10 магчымых. Па шэсць балаў у хакеістаў Гомельскай, Мінскай і Брэсцкай абласцей, чатыры ачкі ў камандаў Гродзенскай вобласці, хакеісты Віцебскай і Магілёўскай абласцей ачкоў пакуль не набралі.

Нагадаем, у адзінаццатым сезоне спаборніцтвы арганізаваныя ў два этапы. Сем каманд (шэсць лядовых дружын з абласцей і хакейная каманда Прэзідэнта Беларусі) правядуць аднакругавы турнір, які завершыцца ў канцы сакавіка. Затым з 31 сакавіка па 15 красавіка чатыры найлепшыя каманды згуляюць у паўфіналах, пераможцы якіх паспрачаюцца за галоўны прыз, а тыя, хто прайграў — за бронзавыя медалі турнірy.

Дар'я ЛАБАЖЭВІЧ

Загаловак у газеце: Ці адбудзецца вяртанне Вікторыі...

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Пра дастаўку шафы, пасажыра вярхом на памідоры і канцэрт Віктара Вуячыча.