Вы тут

Камунальнікаў будуць рыхтаваць па тэхналогіях віртуальнай рэальнасці


З красавіка спецыялісты жыллёва-камунальнай гаспадаркі пачнуць вывучаць работу па цеплазабеспячэнні дома на спецыяльным трэнажоры, які імітуе цеплапункт. А ўжо ў сакавіку першай групе камунальнікаў пачнуць выкладаць асновы псіхалогіі стасункаў з жыхарамі і работы ў стрэсавых сітуацыях і навучаць іх размаўляць простай мовай, зразумелай спажыўцам.


У Кацярыны Гарбачовай амбіцыйныя планы.

Памылкі без наступстваў

Такія амбіцыйныя планы ставіць перад сабой Кацярына ГАРБАЧОВА, дырэктар установы дадатковай адукацыі дарослых «Дзяржаўны цэнтр павышэння кваліфікацыі кіруючых работнікаў і спецыялістаў «Жылкам». Літаральна праз месяц цэнтр зменіць адрас і пачне функцыянаваць у больш прыдатных умовах, дзе зможа стаць «рэсурсным цэнтрам для навучання спецыялістаў сістэмы ЖКГ». Менавіта так прапісана задача ўстановы ў канцэпцыі развіцця жыллёва-камунальнай гаспадаркі да 2025 года.

У той жа час цэнтр збіраецца стаць пляцоўкай і для падрыхтоўкі спецыялістаў іншых устаноў адукацыі, якія вучаць роднасным прафесіям. Гэта спецыяліст па комплексным абслугоўванні, слесар-сантэхнік, работы зялёнага будаўніцтва і іншыя. Неўзабаве тут з'явяцца спецыялізаваныя класы: па другасных матэрыяльных рэсурсах, энергаэфектыўным абсталяванні, цеплавой, водаправодна-каналізацыйнай, электрычнай, ліфтавай гаспадарках.

— Заняткі будуць праводзіцца на сапраўдным абсталяванні, наглядна будуць прадстаўлены цеплавыя пункты, макеты цеплавузлоў і іншае. Без інтэрактыўнага развіцця цяпер ніяк, — упэўнена Кацярына Гарбачова. — Свой праграмны комплекс абслугоўвання будынкаў (ПКАБ) мы распрацоўвалі год. Ствараўся ён з мэтай мінімізаваць затраты на навучанне спецыялістаў на прадпрыемствах, а таксама каб зменшыць выдаткі на абсталяванне для навучання. Няправільнае дзеянне ў цеплапункце на працуючым абсталяванні — гэта выхад са строю дарагой помпы ці іншай прылады. Наш трэнажор дазваляе рабіць памылкі без наступстваў для дома.

Максімальнае пагружэнне

Трэнажор будзе карысны для многіх камунальных прафесій: ад рабочага па комплексным абслугоўванні будынкаў да галоўных інжынераў, гаворыць Кацярына Гарбачова. Праграма дазваляе дэталёва вывучыць цеплапункт, скрупулёзна разгледзець кожную дэталь абсталявання. Прычым мадэль кожнай прылады можна паглядзець у ЗD-праекцыі, пакруціць у розныя бакі, убачыць яе знутры ў разрэзе, «памацаць».

— Трэніроўка спачатку праходзіць у рэжыме навучання, калі чалавек наглядна знаёміцца з абсталяваннем цеплавузла. Пасля азнаямлення выкладчык прапануе выканаць нейкае дзеянне на трэнажоры. Пры гэтым ён задае пэўныя параметры: колькасць паверхаў, нагрузку і іншыя ўводныя, ад якіх будуць залежаць дзеянні студэнта ў цеплапункце. Пры няправільных дзеяннях трэнажор адразу пакажа, што ты нарабіў: пойдзе пара, зашыпіць абсталяванне, пацячэ вада. Мы хочам, каб кожны максімальна пагрузіўся ў тое асяроддзе, з якім яму давядзецца працаваць, — расказала дырэктар. — Дзякуючы такому навучальнаму абсталяванню, цяпер не трэба перажываць, што ў галіну трапіць нейкі недаспецыяліст і пачне давучвацца і трэніравацца на рабочых прыладах у рэальным цеплавузле.

Трэнажор для галоўнага інжынера

Пакуль што сімулятар праходзіць тэсціраванне, і першая група камунальнікаў пачне заняткі на ім з красавіка. У цэнтры хочуць максімальна задзейнічаць у навучанні ўсіх: не толькі навучэнцаў пасля ПТВ, але і дзеючых спецыялістаў — майстроў, дырэктараў і галоўных інжынераў, каб яны праверылі сябе.

— Добра вучыцца метадам спроб і памылак, калі іх можна пасля спакойна прааналізаваць з выкладчыкам, а не сапсаваць абсталяванне. А яно ў працэсе работы мяняецца, з'яўляюцца новыя прыборы. І дзе вывучыць усе гэтыя дэталі, даведацца, як яны працуюць, як не тут, на трэнажоры, каб ісці ў нагу з часам, — разважае Кацярына Гарбачова. — ЖКГ, як і медыцына, побач з людзьмі ўсё іх жыццё. Калі правесці аналогію, то людзі сустракаюцца з жыллёва-камунальнай паслугай — вадой — пасля нараджэння ў радзільным доме і заканчваюць шлях паслугамі пахавання, якімі таксама займаюцца камунальнікі. Не заўсёды можна дакладна вызначыць, што баліць у арганізме чалавека. Так і з домам. Сёння гэта найскладанейшая інжынерная канструкцыя. І спецыяліст павінен мець адпаведны высокі ўзровень ведаў, каб усё гэта абслугоўваць.

Сімулятар — гэта не канчатковы прадукт. Са з'яўленнем новых прылад і прыстасаванняў усе яны будуць дадавацца ў трэнажор. На чарзе ўжо, напрыклад, элементы дыспетчарызацыі. Пакуль трэнажор уяўляе сабой візуальную інтэрактыўную панэль для заняткаў, але ў планах спецыялістаў цэнтра аснасціць яго магчымасцю займацца ў віртуальнай рэальнасці. Дадаць сюды акуляры і пальчаткі для максімальна поўнага пагружэння ў віртуальнасць і дасягнення эфекту, што ты сапраўды ўвайшоў у дзеючы цеплапункт.

— Сістэма абслугоўвання дома ў плане цеплазабеспячэння, якая прадстаўлена ў сімулятары, — гэта толькі адна з 12 асноўных камунальных паслуг галіны ЖКГ. У будучым трэнажор будзе развівацца і па іншых спецыяльнасцях. Ужо ставіцца задача «падняцца з падвала ў дом». Паказаць, як рухаецца вада па стаяках. З'явіцца візуалізацыя ліфтаў, электраправодкі і іншае, — дадала спецыяліст.

Навучыцца размаўляць

Паколькі дагэтуль існуе пэўнае непаразуменне ў зносінах камунальнікаў і жыхароў, у цэнтры распрацавалі яшчэ адну праграму па навучанні спецыялістаў рабоце з насельніцтвам. Яна прадугледжвае тыднёвы курс навучання. Сюды ўваходзіць псіхалагічны блок па кліентаарыентаванні, работа ў стрэсавай сітуацыі, тайм-менеджмент па арганізацыі свайго часу і часу стасункаў з кліентамі. А таксама базавы курс па асноўных камунальных паслугах, каб можна было максімальна даступна растлумачыць жыхару, якая паслуга яму аказваецца і што з сябе ўяўляе. Спецыяліст простай і зразумелай мовай будзе тлумачыць усё гэта. Пакуль толькі мінчане будуць атрымліваць такую паслугу, пасля яе распаўсюдзяць на ўсю краіну.

— Пасля выпуску першай групы мы плануем пратэсціраваць іх, каб зразумець, чаго не хапіла ў гэтым курсе, а чаго наадварот, занадта. Мы хочам, каб было і нашаму спецыялісту камфортна працаваць, і чалавеку зручна яго разумець. Прафесіяналы навучацца карэкціраваць канфліктную сітуацыю, дамаўляцца з чалавекам, — расказала яна. — Яны стануць працаваць з псіхолагамі, будуць праводзіцца трэнінгі і круглыя сталы.

Ужо распрацавана праграма псіхалагічнага тэсціравання для спецыялістаў сістэмы ЖКГ. Сёння яго праходзяць кіраўнікі і спецыялісты падчас прафесійнай атэстацыі.

Мяркуецца, што пасля новай перападрыхтоўкі спецыялісты змогуць і растлумачыць алгарытм налічэння «камуналкі», і расказаць, з чаго складаюцца тарыфы, як робіцца пераразлік аплаты, чаму не сыходзяцца паказчыкі па вадзе, адкуль столькі «набегла» за святло і іншыя «спажывецкія дробязі», якія вельмі актуальныя і хвалюючыя для людзей.

Ірына СІДАРОК

Загаловак у газеце: Цеплапункт у ЗD, або ЖКГ-сімулятар

Выбар рэдакцыі

Культура

Як у Чавускім раёне праводзіліся святыя вечары

Як у Чавускім раёне праводзіліся святыя вечары

Традыцыя варажыць на нарачонага прыйшла з язычніцкіх часоў.

Грамадства

Мастацкі кіраўнік «Песняроў» пра радасці і складанасці сямейнага жыцця

Мастацкі кіраўнік «Песняроў» пра радасці і складанасці сямейнага жыцця

«Я лічу, што мужчына можа заводзіць сям'ю, калі ў яго ўжо ёсць сваё жыллё або выразная перспектыва, калі яно з'явіцца».

Грамадства

Небяспечныя гульні. На што трэба звярнуць увагу бацькам падлеткаў

Небяспечныя гульні. На што трэба звярнуць увагу бацькам падлеткаў

Днямі суд Першамайскага раёна Мінска абвясціў прысуд удзельнікам вечарынкі, падчас якой 19-гадовая дзяўчына загінула ад ужывання псіхатропу

Эканоміка

Падрыхтаваны праект новага ўказа аб аднаўляльных крыніцах энергіі

Падрыхтаваны праект новага ўказа аб аднаўляльных крыніцах энергіі

Так званая «зялёная» энергетыка ў апошнія гады развіваецца ў нашай краіне хуткімі тэмпамі.