Урачыстае мерапрыемства адбылося 15 сакавіка ў Духоўна-адукацыйным цэнтры Беларускай праваслаўнай царквы ў Мінску. Свята традыцыйна прымеркавана да даты выдання 14 сакавіка 1564 года друкарамі Іванам Фёдаравым і Пятром Мсціслаўцам «Апостала».
Арганізатарамі мерапрыемства выступілі Выдавецкі савет Беларускай праваслаўнай царквы, Мінская духоўная акадэмія, Свята-Елісавецінскі манастыр, Міністэрства культуры і Міністэрства адукацыі Беларусі. Сярод гасцей свята — кіраўнікі мясцовых выканаўчых органаў, прадстаўнікі дыпламатычных місій, супрацоўнікі міністэрстваў культуры, інфармацыі і адукацыі Беларусі, рэктары, выкладчыкі вышэйшых навучальных устаноў. Узначаліў мерапрыемства Мітрапаліт Мінскі і Заслаўскі Павел, Патрыяршы Экзарх усяе Беларусі. «Мы сёння ўспамінаем нашых асветнікаў — свяціцеля Кірылу Тураўскага, прападобную Ефрасінню Полацкую, першадрукара Францыска Скарыну, памятаем пра друкара Івана Фёдарава. Калі мы кожны дзень трымаем у руках кнігу, яна не выклікае ў нас здзіўлення. А раней, калі людзі ўпершыню ўбачылі надрукаваную кнігу, — гэта было амаль цудам. Аказваецца з яе дапамогай можна вялікай колькасці людзей знаёміцца з гісторыяй, асветай. І мы сёння радуемся, што Гасподзь даў магчымасць на нашай беларускай зямлі расці, працаваць і даваць плён тым асветнікам, якіх я назваў», — сказаў мітрапаліт.
Асноўная мэта арганізатараў свята — выклікаць цікавасць да духоўнай літаратуры, прывіць малодшаму пакаленню любоў да чытання і адзначыць асаблівую ролю духоўных кніг у выхаванні чалавека.
Афіцыйна Дзень праваслаўнай кнігі адзначаецца ў Беларусі з 2009 года. Сёлета падзея звязана з 220-годдзем з дня нараджэння мітрапаліта Літоўскага і Віленскага Іосіфа (Сямашкі), праца якога спрыяла развіццю беларускай культуры і нацыянальнай самасвядомасці.
У гонар свята бібліятэка Мінскай духоўнай акадэміі да 23 сакавіка запрашае на бясплатную выстаўку рукапісных і факсімільных выданняў біблейскіх тэкстаў. Мерапрыемствы да Дня праваслаўнай кнігі адбываюцца ва ўсіх епархіях Беларускага Экзархата.
Марыя ДАДАЛКА
Канцэрт для дзяцей і моладзі, пластычны спектакль Ягора Дружыніна і «Рок-панарама».
Выбар саджанца для садавода — той момант, значнасць якога складана пераацаніць.
Актрыса НАДТ імя М. Горкага — пра шлях да сцэны і натхненне.
Тата і мама — два самыя важныя чалавекі ў жыцці кожнага дзіцяці.