Вы тут

У Расіі праходзяць прэзідэнцкія выбары


Грамадзяне выбіраюць кіраўніка дзяржавы з васьмі кандыдатаў: Сяргея Бабурына (партыя "Расійскі агульнанародны саюз"), Паўла Грудзініна (КПРФ), Уладзіміра Жырыноўскага (ЛДПР), дзеючага прэзідэнта РФ Уладзіміра Пуціна (самавылучэнец), Ксеніі Сабчак ("Грамадзянская ініцыятыва"), Максіма Сурайкіна ("Камуністы Расіі"), Барыса Цітова (Партыя росту) і Рыгора Яўлінскага ("Яблоко").


Фота: tass.ru

Па дадзеных на 1 студзеня 2018 года, Цэнтрвыбаркам Расіі зарэгістраваў 110 млн 858 тыс. 228 выбаршчыкаў, у тым ліку ў Расіі 108 млн 968 тыс. 869 чалавек, а за яе межамі - 1 млн 889 тыс. 359. На выбарах 2012 года былі зарэгістраваныя 109 млн 860 тыс. 331 выбаршчык.

Паводле звестак Цэнтрвыбаркама Расіі, для галасавання ў краіне адкрыта каля 97 тыс. участкаў. Акрамя таго, створана амаль 400 выбарчых участкаў у іншых дзяржавах для расіян, якія па тых ці іншых прычынах апынуліся за межамі краіны.

Нагадаем, галасаванне на выбарах прэзідэнта Расіі 18 сакавіка пройдзе ў 13 гарадах Беларусі.

Першыя вынікі галасавання, а таксама дадзеныя exit poll будуць абвешчаныя ў 21 гадзіну па маскоўскім часе, пасля таго як зачыняцца выбарчыя ўчасткі ў самым заходнім расійскім рэгіёне - у Калінінградскай вобласці. Да гэтага часу ўжо плануецца апрацаваць бюлетэні на Далёкім Усходзе. А ў цэлым па краіне папярэднія вынікі галасавання ЦВК Расіі апублікуе раніцай 19 сакавіка.

Фота: tass.ru

Згодна з Канстытуцыяй, прэзідэнт у Расіі абіраецца ўсенародным галасаваннем, тэрмін яго паўнамоцтваў складае 6 гадоў (да 2012 года - 4 гады). У адпаведнасці з законам, для перамогі на выбарах зарэгістраванаму кандыдату неабходна атрымаць больш за палову галасоў выбаршчыкаў, якія прынялі ўдзел у галасаванні. Калі ж ні адзін з кандыдатаў не набярэ такой колькасці галасоў, будзе праведзены другі тур выбараў. У ім будуць удзельнічаць два кандыдаты, якія атрымалі найлепшы вынік, а пераможца вызначыцца простай большасцю галасоў.

З чэрвеня 1991 года вышэйшую дзяржаўную пасаду ў Расіі займаў Барыс Ельцын. 26 сакавіка 2000 году на датэрміновых выбарах прэзідэнтам стаў Уладзімір Пуцін. У 2008 годзе кіраўніком краіны быў абраны Дзмітрый Мядзведзеў. У 2012 годзе прэзідэнтам Расіі зноў стаў Уладзімір Пуцін.

tass.ru, БЕЛТА


Уладзімір Пуцін прагаласаваў на выбарах прэзідэнта Расіі

Фота: tass.ru

Кандыдат у прэзідэнты РФ, дзеючы кіраўнік дзяржавы Уладзімір Пуцін прагаласаваў на выбарчым участку №2151 у Расійскай акадэміі навук.

На гэтым участку Пуцін галасаваў ужо неаднаразова. Менавіта тут ён зрабіў свой выбар падчас мінулых прэзідэнцкіх выбараў 4 сакавіка 2012 года.

Паводле яго слоў, паспяховым для сябе ён палічыць любы адсотак галасоў, які дазволіць працягваць выконваць абавязкі кіраўніка дзяржавы.

tass.ruria.ru


Расіяне актыўна галасуюць на выбарчых участках у Беларусі

Грамадзяне Расійскай Федэрацыі ў Беларусі актыўна галасуюць на выбарах прэзідэнта РФ, паведаміў ТАСС прэс-сакратар пасольства Расіі ў Беларусі Аляксей Маскалёў.

У Беларусі 13 выбарчых участкаў для галасавання на выбарах прэзідэнта РФ адкрыліся ў 08.00. "Па нашай інфармацыі, у Віцебску і Полацку расійскія грамадзяне сталі прыходзіць да месца галасавання яшчэ да адкрыцця выбарчых участкаў", - адзначыў Аляксей Маскалёў. Паводле яго слоў, у некаторых беларускіх гарадах за гадзіну з невялікім пасля адкрыцця участкаў ужо прагаласавалі дзясяткі расіян.

У пасольстве чакаюць, што на сёлетніх прэзідэнцкіх выбарах яўка па Беларусі будзе вышэй, чым на папярэдніх, калі яна склала больш за 13,5 тыс. чалавек. Гэта звязана з арганізацыяй датэрміновага выязнога галасавання, а таксама з павелічэннем колькасці выбарчых участкаў. Датэрмінова ў Беларусі прагаласавала амаль 3 тыс. расіян, у тым ліку больш за 1,7 тыс. чалавек, занятых на будаўніцтве Беларускай АЭС у Астраўцы (Гродзенская вобласць). Паводле звестак МУС Беларусі, усяго зарэгістраваных грамадзян РФ у рэспубліцы каля 110 тыс.

БЕЛТА


Каля 205 тыс. выбаршчыкаў прагаласавалі датэрмінова

Магчымасцю датэрміновага галасавання скарысталіся 205 тыс. выбаршчыкаў, заявіла кіраўнік ЦВК РФ Эла Памфілава.

"На выбарчых участках, арганізаваных у цяжкадаступных і аддаленых мясцовасцях, на судах, якія знаходзяцца ў плаванні, на палярных станцыях і за межамі РФ на сёння датэрмінова прагаласавалі 205 тыс. выбаршчыкаў", - сказала Памфілава ў ЦВК у нядзелю.

Паводле яе слоў, папярэдне ў спісы былі ўнесены 175 тыс. чалавек. "Відаць, паявіліся яшчэ тыя, хто былі не ўнесеныя ў спісы. У агульнай складанасці гэта склала 0,18% ад агульнай колькасці тых, хто галасуе ў РФ", - адзначыла яна.

tass.ru


За выбарамі прэзідэнта Расійскай Федэрацыі назірае 291 каманда назіральнікаў БДІПЧ АБСЕ

Фота: tass.ru

Назіранне за выбарамі прэзідэнта РФ вядзе 291 каманда назіральнікаў Бюро па дэмакратычных інстытутах і правах чалавека (БДІПЧ) АБСЕ, што дазваляе ахапіць назіраннем усю тэрыторыю Расіі і сабраць статыстычны матэрыял для ацэнкі ходу галасавання. Пра гэта заявіў у нядзелю журналістам кіраўнік назіральнай місіі БДІПЧ АБСЕ Ян Пэтэрсан, які наведаў раніцай у дзень галасавання выбарчы ўчастак № 2 у Маскве.

"Мы закрываем усю тэрыторыю Расіі, таму што гэта велізарная краіна, тут 95 тыс. выбарчых участкаў, - сказаў ён. - Вядома, мы не зможам ахапіць іх усе, але мы закрываем усё ж некалькі тысяч участкаў. Даведаемся, колькі менавіта, па выніках дня".

"Але іх дастаткова для таго, каб атрымаць статыстычны матэрыял і даць справядлівую ацэнку таму, што адбылося", - дадаў Пэтэрсан.


Сурыкаў: Пагаршэння беларуска-расійскіх адносін чакаць не варта, трэба развіваць інтэграцыю

Пра гэта сёння заявіў журналістам пасол Беларусі ў Расіі Аляксандр Сурыкаў у расійскім пасольстве, дзе арганізаваны выбарчы ўчастак для галасавання на выбарах прэзідэнта РФ.

"Узаемаадносіны Расіі і Беларусі даўно склаліся як брацкія ў поўным сэнсе гэтага слова зыходзячы з агульных гістарычных і культурных каранёў. І сур'ёзных змяненняў у нашых узаемаадносінах, дапусцім, у бок пагаршэння, чакаць немагчыма. А вось у бок паглыблення інтэграцыі чакаць можна і рабіць гэта вельмі трэба. Таму што глыбокая эканамічная інтэграцыя - залог поспехаў развіцця нашых краін на наступныя гады", - заявіў пасол.

Дыпламат адзначыў даволі вялікую яўку на выбарчых участках, арганізаваных у Беларусі. Ён гэта звязвае ў тым ліку з турбулентным становішчам у свеце. "І расійскія грамадзяне ў першую чаргу чакаюць ўмацавання вагі Расіі на міжнароднай арэне ў знешняй палітыцы, што адбываецца. І вялікія чаканні звязваюць з паляпшэннем жыцця расійскіх грамадзян ўнутры Расіі і не толькі", - сказаў ён.

Дыпламат чакае больш высокую яўку на выбарчых участках у Беларусі. Гэтаму спрыяла і магчымасць датэрміновага галасавання. Ёй скарысталіся амаль 2,8 тыс. чалавек. У гэты раз у краіне створана і больш выбарчых участкаў. У 2012 годзе іх было 9, а цяпер 13, у тым ліку ў Астраўцы, дзе грамадзяне Расіі задзейнічаны на будаўніцтве БелАЭС.

Усяго на консульскім уліку ў Беларусі зарэгістраваныя каля 60 тыс. расіян. Аднак гэта далёка не поўная лічба тых грамадзян, якія ў дзень выбараў знаходзяцца на тэрыторыі Беларусі.

БЕЛТА


Яўка на выбарах прэзідэнта Расіі на 14:00 па маскоўскім часе склала 34,72%

Яўка на выбарах прэзідэнта РФ на 14:00 па маскоўскім часе склала 34,72%. Пра гэта заявіў у нядзелю намеснік старшыні ЦВК Расіі Мікалай Булаеў.

tass.ru

Дадаць каментар

Выбар рэдакцыі

Палітыка

Аб чым дамовіліся прэзідэнты Беларусі і Азербайджана?

Аб чым дамовіліся прэзідэнты Беларусі і Азербайджана?

Па выніках перамоў у Мінску яны прынялі сумесную заяву.

Грамадства

Партызанскія рукапісы — бясцэнныя сведчанні ваеннага часу

Партызанскія рукапісы — бясцэнныя сведчанні ваеннага часу

Партызанскія часопісы — насамрэч унікальныя інфармацыйныя зборнікі, значэнне і важнасць якіх разумелі ў тым ліку іх стваральнікі і чытачы.

Грамадства

Беларускія навукоўцы прадставілі больш за 300 распрацовак і тэхналогій

Беларускія навукоўцы прадставілі больш за 300 распрацовак і тэхналогій

На юбілейнай выстаўцы Нацыянальнай акадэміі навук.

Эканоміка

Ніна Жалязнова: Мы, беларусы, па сваёй ментальнасці — людзі зямлі

Ніна Жалязнова: Мы, беларусы, па сваёй ментальнасці — людзі зямлі

«Звязда» ўжо неаднойчы пісала пра гэту незвычайную жанчыну.