Прэзентацыя "Нарысаў гісторыі культуры Беларусі" пройдзе ў НАН

Цэнтр даследаванняў беларускай культуры, мовы і літаратуры НАН Беларусі, Інстытут мастацтвазнаўства, этнаграфіі і фальклору імя Кандрата Крапівы, Цэнтральная навуковая бібліятэка імя Якуба Коласа НАН Беларусі запрашаюць 22 сакавіка ў 15:00 на прэзентацыю серыі “Нарысы гісторыі культуры Беларусі" (пад навуковай рэдакцыяй акадэміка НАН Беларусі Аляксандра Лакоткі).

У чатырохтомным фундаментальным выданні, якое выйшла ў выдавецтве “Беларуская навука”, адлюстравана гісторыя культуры Беларусі ад эпохі сярэднявечча да нашых дзён. Першы тым серыі прысвечаны пытанням паходжання, фарміравання і развіцця   шляхецкай культуры ХІV – пачатку ХХ стагоддзяў.

У другім томе разглядаюцца асаблівасці эвалюцыі культуры беларускага горада ў Х – пачатку XX стагоддзяў. Трэці том складаецца з дзвюх кніг, у якіх асвятляюцца асаблівасці эвалюцыі матэрыяльнай і духоўнай культуры беларускага сяла ХIV – пачатку ХХ стагоддзяў. І ў апошнім томе аналізуюцца этапы эвалюцыі, тэндэнцыі і вопыт айчыннай архітэктуры, прафесійнага выяўленчага і дэкаратыўна-прыкладнога мастацтва, традыцыйных мастацкіх рамёстваў, экранных мастацтваў, музычнага і тэатральнага мастацтва ХХ – пачатку ХХІ стагоддзяў.

Такое даследаванне не мае аналагаў і з’яўляецца фундаментальнай асновай для навуковага суправаджэння дзяржаўнай палітыкі развіцця нацыянальнай культуры. Яго вынікі даюць магчымасць для ўдасканалення вучэбных праграм вышэйшых навучальных устаноў творчага і культуралагічнага напрамкаў, а таксама будуць карыснымі ўсім тым, хто цікавіцца гісторыяй беларускай культуры, і арганізацыям, якія пазіцыянуюць культуру Беларусі на сусветным узроўні.

Таксама ў Цэнтральнай навуковай бібліятэцы адбудзецца  прэзентацыя кнігі кандыдата гістарычных навук Валянціны Бялявінай і доктара гістарычных навук Любові Ракавай “Беларускі касцюм”, надрукаванай выдавецтвам “Беларусь”.

Абагульняючая праца этнолагаў упершыню раскрывае гістарычнае развіццё касцюма ўсіх асноўных сацыяльна-саслоўных груп гарадскога і сельскага насельніцтва Беларусі ад ранняга сярэднявечча да сучаснасці. Да нядаўняга часу пад касцюмам беларусаў разумеўся толькі традыцыйны касцюм сялян, у той час як велізарны пласт культуры магнатаў, шляхты і гараджан заставаўся за рамкамі інтарэсаў даследчыкаў. Аўтарамі быў сабраны і прааналізаваны з новых метадалагічных пазіцый велізарны факталагічны матэрыял, значная частка якога ўпершыню ўведзена ў навуковы зварот. Кніга багата праілюстравана творамі мастацтва ХVІ – ХІХ стагоддзяў  і фатаграфіямі ХІХ –ХХ стагоддзяў.

Да імпрэзы падрыхтавана кніжная выстаўка, прысвечаная гісторыі беларускага касцюма, жаночага і мужчынскага, развіццю ткацтва, вышыўкі і іншым узорам мастацкага аздаблення аддзення. На выставе  будзе магчымасць таксама пазнаёміцца з апошнімі і найбольш цікавымі выданнямі Цэнтра даследаванняў беларускай культуры, мовы і літаратуры НАН Беларусі, прысвечанымі пытанням беларускай традыцыйнай культуры, сялянскай і гарадской,  духоўнай культуры беларусаў.

Прэзентацыя адбудзецца ў інфармацыйна-выставачным цэнтры Цэнтральнай навуковай біліятэкі НАН Беларус ( вул. Сурганава, 15, першы паверх, пакой 110).

Надзея НІКАЛАЕВА