Вечарына «Румынскія старонкі» адбылася ў галерэі Міхася Савіцкага

Супрацоўнікі “Выдавецкага дома “Звязда” прынялі ўдзел у вечарыне “Румынскія старонкі”. На мове паэзіі, жывапісу, музыкі адбыўся дыялог, які яднае.

Гэта вечарына ладзілася ў мінскай мастацкай галерэі Міхася Савіцкага, арганізатарамі цікавай сустрэчы прадстаўнікоў розных муз сталі Пасольства Румыніі ў Рэспубліцы Беларусь, Мінскі гарадскі выканаўчы камітэт, Музей гісторыі горада Мінска.

Вітаючы прысутных, Надзвычайны і Паўнамоцны пасол Румыніі ў Рэспубліцы Беларусь Віарэл Машану паведаміў, што вечарына прысвечана далейшаму ўмацаванню сувязяў у галіне літаратуры, музыкі, выяўленчага мастацтва. У апошнія гады стасункі паміж Беларуссю і Румыніяй значна пашырыліся за кошт культурных і адукацыйных кантактаў. Гэта вельмі важна сёння, калі ў свеце стала больш праяў недаверу і варожасці. Ужо працуючыя і толькі што заснаваныя праекты прыносяць добрыя вынікі: да супрацоўніцтва далучыліся аўтарытэтныя ўстановы культуры і асветы, прадстаўнікі розных творчых саюзаў. 

Адзін з прыкладаў сумесных праектаў – супрацоўніцтва Пасольства Румыніі ў Рэспубліцы Беларусь з найстарэйшым літаратурна-мастацкім часопісам “Полымя”. На старонках гэтага выдання беларускія чытачы знаёмяцца не толькі з творамі класікаў румынскай літаратуры, але і даведваюцца, што хвалюе сучасных румынскіх пісьменнікаў. Пра ўсё гэта распавяла ўдзельнікам вечарыны галоўны рэдактар часопіса “Полымя” Алена Мальчэўская.

Журналіст і перакладчык Вераніка Бандаровіч расказала пра сваё спасціжэнне літаратурнага свету сучасных румынскіх празаікаў Мірчы Кэртэрэску і Крысціяна Тэадарэску. Урывак са свайго перакладу сусветна вядомай паэмы Міхая Эмінэску прачытала Юлія Алейчанка.

З цікавасцю праслухалі прысутныя расповед аб творчым праекце першага намесніка Беларускага саюза мастакоў Глеба Отчыка, які атрымаў магчымасць убачыць лепшыя ўзоры румынскага культавага жывапісу і натхніцца імі для сваёй працы.

Імя нацыянальнага класіка скрыпача і кампазітара Джорджэ Энэску носіць румынская філармонія. Дзякуючы сумеснаму праекту, навучэнцы Мінскага дзяржаўнага музычнага каледжа імя М.І. Глінкі значна пашырылі свае веды пра музычныя скарбы румынскай музыкі. Дарэчы, адзін з самых вядомых твораў гэтага славутага кампазітара прагучаў на вечарыне ў выкананні выкладчыкаў каледжа.

Галоўны ўрачысты момант вечарыны настаў, калі да дзяржаўных сцягаў Беларусі і Румыніі выйшлі Надзвычайны і Паўнамоцны пасол Віарэл Машану, дырэктар Музея гісторыі Мінска Галіна Ладзісава, дырэктар Музея Марка Шагала ў Віцебску Ірына Воранава. Пад апладысменты прысутных яны падпісалі двухбаковае пагадненне аб супрацоўніцтве.

Яўген ПЯСЕЦКІ

Фота аўтара