Вы тут

Пачаў працу велікодны кірмаш «Радасць»


"Радасць — гэта звычайная якасць чалавека", — сцвярджаюць арганізатары выстаўкі-кірмашу. Яе можна знаходзіць у паўсядзённых рэчах — размовах, невялікіх падарунках, добрых справах. Карэспандэнт "Звязды" наведала фестываль з самай пазітыўнай назвай.


Адкрыў велікодны кірмаш "Радасць" Мітрапаліт Мінскі і Заслаўскі Павел, Патрыяршы Экзарх усяе Беларусі, які звярнуў увагу на асаблівы сэнс назвы фестывалю:

— Штучна нельга на душы стварыць радасць. Калі хтосьці танцуе, весяліцца, гэты стан вельмі хутка праходзіць. А калі людзі робяць добрыя справы, у іх асаблівыя пачуцці. Яны адчуваюць ціхую, незямную радасць. Гэта цяжка растлумачыць. Зрабіце чалавеку нешта добрае, і адчуеце.

На ўваходзе сталічнага Палаца мастацтва ўсіх сустракаюць валанцёры, якія прапаноўваюць паўдзельнічаць у святочнай акцыі. Даюць ручку, паштоўку і тлумачаць: "Вы павінны напісаць віншаванне і павесіць ліст на наша велікоднае яйка". Каля цэнтральных дзвярэй размешчаны вялізны макет галоўнага сімвала Вялікадня, на якім ужо замацаваны паштоўкі. Па словах арганізатараў, напярэдадні свята макет будзе ўсталяваны ў цэнтры горада.

На першым паверсе размясціліся павільёны з вырабамі галоўнага арганізатара мерапрыемства мінскага Свята-Елісавецінскага манастыра.

— Папулярныя нашы бальзамы на травах, мазі, зробленыя па старажытных манастырскіх рэцэптах. Яшчэ ў нас ёсць натуральныя шампуні, крэмы, гарбата, падушкі на грэцкім шалупінні, — расказвае пра асартымент сястра Ірына.

Яе дапаўняе калега Алена: "Звярніце ўвагу на кераміку нашага манастыра — эксклюзіўная, вы нідзе такой не знойдзеце".

Фестываль "Радасць" праходзіць тройчы на год і прымеркаваны да Вялікадня, Пакрова Прасвятой Багародзіцы і Каляд. Гэты раз на кірмаш сваю прадукцыю прывезлі каля 70 удзельнікаў з Беларусі, Расіі, Украіны, Малдовы, Сербіі, Чарнагорыі, Італіі, Грэцыі. Упершыню Мінск наведалі прадстаўнікі адзінага ва Узбекістане мужчынскага манастыра.

— У Мінск прыязджаю ўжо пяты раз, — падзялілася ўражаннямі ад фестывалю Маргарыта Багаева, якая прадае вырабы Аланскага Свята-Успенскага мужчынскага манастыра (Паўночная Асеція). — Мне вельмі падабаецца Беларусь. На кірмашы прадстаўляю самы высакагорны мужчынскі манастыр у Расіі. Мы прывезлі рукапісныя іконы, абразы на дрэве, падвескі. Ёсць ювелірныя вырабы з нашым аланскім крыжам. Прапаноўваем кераміку ручной работы з блакітнай гліны, зробленую з каўказскім каларытам.

Велікодны фестываль завершыцца 1 красавіка.

Марыя ДАДАЛКА

Фота Таццяны ТКАЧОВАЙ

Выбар рэдакцыі

Грамадства

Як у Беларусі трансплантуюць органы

Як у Беларусі трансплантуюць органы

І чаму да нас на аперацыі едуць замежнікі.

Грамадства

Карэспандэнты «Звязды» наведалі «Воўчыя норы»

Карэспандэнты «Звязды» наведалі «Воўчыя норы»

Там адбываюць пакаранне мужчыны, упершыню асуджаныя за незаконны абарот наркотыкаў.

Спорт

Аляксандра Герасіменя: У кожнага свой рэцэпт поспеху

Аляксандра Герасіменя: У кожнага свой рэцэпт поспеху

Аляксандра Герасіменя — сапраўдны баец, а яшчэ — клапатлівая маці і жонка. І проста працавіты чалавек, які не ведае перашкод.