Вы тут

Сёння ўступае ў сілу дэкрэт аб развіцці лічбавай эканомікі


Сёння ўступае ў сілу дэкрэт нумар 8 "Аб развіцці лічбавай эканомікі" ад 21 снежня 2017 года.


Дакумент быў распрацаваны ў адпаведнасці з даручэннем кіраўніка дзяржавы адміністрацыяй Парка высокіх тэхналогій сумесна з рэзідэнтамі ПВТ, ІТ-супольнасцю, вядучымі юрыдычнымі і кансалтынгавымі фірмамі Беларусі, а таксама замежнымі экспертамі.

Дэкрэт нумар 8 прадоўжыў дзеянне спецыяльнага падаткова-прававога рэжыму Парка высокіх тэхналогій да 2049 года. Захаваны экстэрытарыяльны прынцып рэгістрацыі, таксама засталіся нязменнымі базавыя ўмовы гаспадарання для рэзідэнтаў ПВТ.

Ключавыя палажэнні дэкрэта - пашырэнне відаў дзейнасці рэзідэнтаў ПВТ, падтрымка ІТ-адукацыі і падрыхтоўка кадраў для галіны, стварэнне ўмоў для развіцця прадуктовых ІТ-кампаній, комплекснае прававое рэгуляванне бізнесаў на аснове тэхналогіі блокчэйн.

Так, у якасці новых відаў дзейнасці рэзідэнтаў парка прадугледжаны распрацоўка біятэхналогій, медыцынскіх, авіяцыйных і касмічных тэхналогій, кіберспорт. Таксама дэкрэтам прадугледжваецца магчымасць рэзідэнтам ПВТ не толькі распрацоўваць, але і вырабляць высокатэхналагічную навукаёмістую прадукцыю. Пашыраюцца магчымасці рэзідэнтаў па камерцыялізацыі распрацаваных імі праграмных прадуктаў - у тым ліку шляхам аказання рэкламных і маркетынгавых паслуг, ажыццяўлення аўтсорсінгу бізнес-працэсаў і інш. У новым дэкрэце адсутнічаюць дзеючыя раней абмежаванні на аб'ём выручкі ад дадатковых відаў дзейнасці (кансалтынг, тэсціраванне і інш.).

Дакумент стварае прававыя ўмовы для правядзення ICO, выкарыстання крыптавалюты і ўкаранення смарт-кантрактаў. Беларусь становіцца першай у свеце юрысдыкцыяй з комплексным прававым рэгуляваннем бізнесаў на аснове тэхналогіі блокчэйн. Дэкрэт не прадугледжвае ніякіх абмежаванняў і спецыяльных патрабаванняў да аперацый па стварэнні, размяшчэнні, захоўванні, адчужэнні, абмене токенаў, а таксама дзейнасці аператараў крыптаплатформ і аператараў абмену крыптавалют. Дзейнасць па майнінгу, набыцці, адчужэнні токенаў, якая ажыццяўляецца фізічнымі асобамі, не з'яўляецца прадпрымальніцкай дзейнасцю, а токены не падлягаюць дэклараванню.

Дэкрэтам ствараюцца ўмовы для развіцця прадуктовых ІТ-кампаній. Дакумент прадугледжвае спрашчэнне парадку заключэння знешнеэканамічных здзелак з выкарыстаннем інтэрнэту - магчымасць заключэння іх у электронным выглядзе.

Дакумент уводзіць асобныя інстытуты англійскага права. У прыватнасці, з'яўляюцца канверсоўная пазыка, апцыён і апцыйны дагавор, пагадненне аб неканкурэнцыі і забароне пераманьвання, кампенсацыя маёмасных страт. Увядзенне гэтых інструментаў у Беларусі дасць магчымасць стварыць спрыяльнае асяроддзя для развіцця венчурнай экасістэмы, прадаставіць патэнцыяльным інвестарам інструменты, зразумелыя ім і шырокаўжывальныя ў міжнароднай практыцы.

Рэзідэнтам ПВТ дазваляецца займацца адукацыйнай дзейнасцю ў сферы інфармацыйна-камунікацыйных тэхналогій, па вучэбных праграмах, якія зацвярджаюцца адміністрацыяй парка. Акрамя таго, замацаваны комплекс мер для прыцягнення ў краіну высакакласных спецыялістаў у ІТ-сферы. У прыватнасці, рэзідэнтам ПВТ не патрабуецца атрымліваць дазволы, звязаныя з прыёмам на работу іншаземцаў. Такім іншаземцам у спрошчаным парадку выдаецца дазвол на часовае пражыванне ў Беларусі. Для замежных работнікаў і заснавальнікаў рэзідэнтаў ПВТ візы адменены.

Пасля прыняцця дэкрэта аб развіцці лічбавай эканомікі адзначаецца рэкордны рост жадаючых уступіць у Парк высокіх тэхналогій. Так, за першы квартал бягучага года колькасць кампаній - рэзідэнтаў парка павялічылася на чвэрць. За больш як 10-гадовую гісторыю ПВТ такі істотны прырост у момант - са 192 да 238 рэзідэнтаў, гэта значыць адразу на чвэрць, - адбыўся ўпершыню. Сфера іх тэхналагічнай кампетэнцыі - гэта, у першую чаргу, штучны інтэлект, машыннае навучанне, Інтэрнэт рэчаў, тэхналогіі дапоўненай рэальнасці.

У мэтах развіцця дэкрэта нумар 8 для правядзення банкамі аперацыі з лічбавымі знакамі (токенамі) прыняты змяненні ў інструкцыю Нацбанка аб патрабаваннях да правіл унутранага кантролю банкаў, нябанкаўскіх крэдытна-фінансавых арганізацый у сферы прадухілення легалізацыі даходаў, атрыманых злачынным шляхам, фінансавання тэрарыстычнай дзейнасці і распаўсюджвання зброі масавага знішчэння. Пастановай Мінфіна зацверджаны Нацыянальны стандарт бухгалтарскага ўліку і справаздачнасці "Лічбавыя знакі (токены)".

БЕЛТА

Выбар рэдакцыі

Грамадства

Асваенне адчужэння. Што паглядзець падчас экскурсіі ў радыяцыйнай зоне?

Асваенне адчужэння. Што паглядзець падчас экскурсіі ў радыяцыйнай зоне?

Ці небяспечныя такія «вылазкі» і колькі яны каштуюць?

Грамадства

Мітрапаліт Павел: Я ўдзячны, што Гасподзь павёў мяне па гэтым шляху

Мітрапаліт Павел: Я ўдзячны, што Гасподзь павёў мяне па гэтым шляху

Уладыка расказаў, чаму з асцярогай упершыню ехаў у Мінск у якасці мітрапаліта.

Калейдаскоп

Вясёлыя гісторыі чытачоў

Вясёлыя гісторыі чытачоў

Добрая жонка і дома рай, а благая — хоць цягу дай

Грамадства

Як сучасныя палешукі рыхтуюцца да свята Уваскрэсення Хрыстовага

Як сучасныя палешукі рыхтуюцца да свята Уваскрэсення Хрыстовага

Аўтар «Звязды» расказвае на прыкладзе сваёй сям'і.