Вы тут

Што плануецца ў Мядзеле да абласных «Дажынак»


Мядзел рыхтуецца да абласнога фестывалю-кірмашу працаўнікоў сяла «Дажынкі». Пра тое, што для мясцовых уладаў і жыхароў — гэта неардынарная падзея, можна здагадацца ўжо на пад'ездзе да горада з боку Мінска. На абочыне аўтатрасы вядзе «раскопкі» экскаватар.


Пра­клад­ка во­да­пра­во­да.

— Тут уладкуем невялікія вадаёмы, — уводзіць у курс справы галоўны інжынер Мядзельскай жыллёва-камунальнай гаспадаркі Уладзімір Шабовіч. — Як бачыце, мясцовасць нізінная, што паспрыяе запаўненню іх вадой. Ды і пасля вясновага разводдзя тут збярэцца шмат вільгаці, застанецца толькі акультурыць тэрыторыю вакол.

Падчас падрыхтоўкі да «Дажынак» ЖКГ сумесна з упраўленнем капітальнага будаўніцтва райвыканкама распрацавалі план, які прадугледжвае ўладкаванне шматлікіх аб'ектаў.

Практычна ні адзін прыём грамадзян у Мядзеле не абыходзіўся без водных праблем: там прарве трубу, там падтопіць прысядзібны ўчастак. Прычына — зношанасць адпаведнай інфраструктуры. Акрамя таго, колькасць жалеза ў вадзе перавышала дапушчальныя нормы. Таму ў першую чаргу гэтым пытанням удзялілі належную ўвагу: прабурылі дзве свідравіны, якія закальцуюць новы водаправод у адну сістэму і дазволяць палепшыць якасць вады.

Улады разумеюць, што адначасова выканаць усё нерэальна. Каб пазбегнуць аўралу, уладкаванне ў населеным пункце пачалі да наступлення сапраўднай зімы яшчэ летась. У лістападзе-снежні прыступілі да земляных работ па замене і будаўніцтве водаправоднай і каналізацыйнай сістэм. Яны працягваюцца і цяпер. У Мядзеле пракладзена каля 9 кіламетраў новых труб, заменена 800 метраў каналізацыйных сетак. Усяго ж да пачатку «Дажынак» плануецца памяняць і пракласці каля 11,5 кіламетра водаправодных сетак. На гэтыя мэты мяркуецца затраціць салідную суму — каля 1,5 млн рублёў. У райцэнтры і ў курортным пасёлку Нарач будзе заменена 3,2 кіламетра цеплатрасы.

Папрыгажэюць і стануць больш камфортнымі для пражывання і жылыя дамы, мясціны, якія прылягаюць да жыллёвага сектара. Капітальны рамонт пройдзе ў шасці шматпавярховіках і на дзвюх прыдамавых пляцоўках, яшчэ чатырнаццаць дамоў і пяць дваровых тэрыторый чакае бягучы рамонт. А пяць з паловай кіламетраў вуліц заасфальтуюць.

Вядома, наводзіць прыгажосць у горадзе будуць усёй талакой. Кожная арганізацыя, прадпрыемства, установа адукацыі, культуры, аховы здароўя маюць свой план дзеянняў па добраўпарадкаванні прылеглых тэрыторый, будынкаў, стадыёнаў, аб'ектаў фізкультуры і спорту. Усе вуліцы без выключэння збіраюцца прывесці ў належны стан, высадзіць дэкаратыўныя кусты, маладыя дрэўцы, а таксама 60 тысяч кветак. У цяпліцах ЖКГ, школ для гэтых мэт ужо зелянее расада.

Га­лоў­ны ін­жы­нер ЖКГ Ула­дзі­мір Ша­бо­віч і пра­раб  ТАА «Сан­гранд» Дзміт­рый Жу­рык на бу­даў­ніц­тве но­вай гас­ці­ні­цы.

Змены таксама закрануць набярэжную, пляжную зоны. Тут плануецца замяніць і ўсталяваць гульнявыя дзіцячыя пляцоўкі, душавыя кабіны, санвузлы. Рэканструкцыя чакае і амфітэатр, які пасля ўладкавання пяройдзе ў падпарадкаванне аддзела культуры. Значна папрыгажэе і цэнтральная гарадская плошча Леніна.

Малыя архітэктурныя формы з'явяцца на вуліцах і ў дварах шматпавярховых дамоў. Ужо ёсць прапановы, распрацаваныя эскізы. Мядзельшчына славіцца сваімі азёрамі, разнастайнымі відамі рыб. Таму яны і будуць адлюстроўваць гэтую тэматыку. У прыватнасці, з'явіцца вугор на пастаменце.

Ну, і самае галоўнае, у райцэнтры дабудуюць гасцініцу на 105 месцаў, якую раней не маглі закончыць з-за недахопу фінансавання.

— Зараз вядзём унутраныя работы, аздабленне, — сказаў прараб таварыства з абмежаванай адказнасцю «Сангранд» Дзмітрый Журык. — У другім квартале плануем увесці ў дзеянне.

— Будаўніцтва новых аб'ектаў у нас не запланавана. Давядзём да ладу, прывядзём у належны выгляд тое, што ёсць,— канстатаваў Уладзімір Шабовіч.

Дадам, што ў Мядзеле не маюць намеру прыцягваць да ўладкавання арганізацыі з іншых гарадоў. Усе работы вядуцца сваімі сіламі — ДРБУ-133 і ДЭУ-66 — у штатным рэжыме.

Таццяна ЛАЗОЎСКАЯ

Фота Анатоля БАСАВА

Загаловак у газеце: Новая гасцініца і вугор на пастаменце

Выбар рэдакцыі

Грамадства

Карэспандэнт «Звязды» высвятляла, чаму так цёмна на асветленых вуліцах Магілёва

Карэспандэнт «Звязды» высвятляла, чаму так цёмна на асветленых вуліцах Магілёва

Вечарам прайсціся ўздоўж цэнтральнай вуліцы Першамайскай у Магілёве адно задавальненне.

Спорт

Баскетбаліст Бенджамін-Павел Дуду: У Гане мяне называлі белым

Баскетбаліст Бенджамін-Павел Дуду: У Гане мяне называлі белым

Мама Бена — беларуска, тата — ураджэнец Ганы.

Эканоміка

Куды звяртацца, калі грамадзяніну затрымліваюць зарплату?

Куды звяртацца, калі грамадзяніну затрымліваюць зарплату?

Адказ на гэта і іншыя пытанні — у гутарцы з Дзмітрыем Шаўчуком.