Гэта культурна-асветніцкае мерапрыемства, прысвечанае мовам і мовазнаўству, арыентаванае на шырокую аўдыторыю. Сустрэнуць гасцей студэнты, аспіранты і выкладчыкі філалагічнага факультэта і факультэта міжнародных адносін БДУ, Мінскага дзяржаўнага лінгвістычнага універсітэта, а таксама лінгвісты з Масквы.
На інтэлектуальным свяце будуць прадстаўлены 55 моў свету — рэдкія і папулярныя, сучасныя і тыя, што выйшлі з ужывання. На працягу аднаго дня можна будзе наведаць сем навукова-папулярных лекцый па лінгвістыцы і пяць — па беларусістыцы. Гасцям раскажуць пра сакрэты англійскага менталітэту, моўныя міфы, легенды і гісторыі старога Менска, магічныя жанры ў фальклоры беларуска-рускага памежжа. Акрамя таго, будзе працаваць пляцоўка моўнай практыкі, дзе наведвальнікам прапануюць вырашыць лінгвістычныя задачы, прайсці майстар-клас па грузінскай мове і наведаць польскі гутарковы клуб.
Усе прэзентацыі моў будуць размеркаваны па шасці паралелях: у кожнай з іх плануецца правесці 13 паказаў. Удзельнікі фестывалю змогуць выбіраць, паколькі прэзентацыі раўмяркуюцца па розных пляцоўках.
Упершыню ў БДУ будзе прадстаўлена і адна з абарыгенных моў — дз’яру. Гэта выміраючая мова, на якой гавораць каля 350 чалавек на паўночным захадзе Аўстраліі. Яна мае своеасаблівую сістэму гукаў. Пра яе асаблівасці і ўнікальнасць раскажа навуковы супрацоўнік Школы філалогіі “Вышэйшай школы эканомікі” (РФ), кіраўнік Фестывалю моў Антон Сомін. Кожнай мове будуць прысвечаны займальныя 45-хвілінныя міні-лекцыі па яе гісторыі, развіцці, станаўленні і сучасным стане.
Арганізатарам маштабнага мерапрыемства выступіў філалагічны факультэт БДУ.
Старт фестывалю будзе дадзены ў 10.00. Мерапрыемствы працягнуцца да 19.00.
Надзея НІКАЛАЕВА
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.