Ва ўрочышчы Сярэбраны Лог, што ў сталічным мікрараёне Серабранка, гэтымі вясновымі днямі асабліва шматгалосна. Птушкі, што прыляцелі з выраю ці ўдала перазімавалі на Радзіме, займаюцца будаўніцтвам новых гнёздаў ці рамонтам старых. А людзі, якія імкнуцца дапамагчы ім, устанаўліваюць на дрэвах новыя птушыныя “кватэры”.
Штучныя гнёзды былі створаны вучнямі сталічных устаноў адукацыі ў межах штогадовага гарадскога конкурсу знаўцаў птушак “Мудры філін”. Сёлета да яго завяршэння прымеркавалі цырымонію адкрыцця “Горада птушак” – экалагічнага маршрута па воднай-балотнай сістэме ў пойме ракі Свіслач працягласцю 1,5 км, дзе размешчаны каля 40 штучных гняздоўяў і інфармацыйных стэндаў. Падчас адукацыйных экскурсій па Сярэбраным Логу жыхары і госці сталіцы змогуць даведацца шмат цікавай і карыснай інфармацыі пра розных крылатых і, зразумела, убачыць іх на свае вочы.
Нягледзячы на тое, што новыя домікі для птушак з’явіліся ў Сярэбраным Логу зусім нядаўна, некаторыя з іх ужо знайшлі сваіх гаспадароў. Дырэктар Цэнтра экалагічнага выхавання і развіцця, адзін з аўтараў праекта “Горад птушак” Руслан Шайкін тлумачыць гэты факт тым, што птушкам не хапае натуральнага жылля, таму штучныя гняздоўі, зробленыя школьнікамі, будуць для іх вялікай падмогай.
– Літаральна некалькі дзён таму мы знайшлі мінулагодняе гняздо рэмеза – цікавай птушкі, якая робіць свой дом у форме рукавічкі, – расказвае Руслан Шайкін. – Тут таксама жыве і такая балотная птушка, як бакас, а таксама зімародак і драч, прылятаюць шэрая і белая чаплі. Увогуле разам з пралётнымі ў Сярэбраным Логу сустракаецца каля 100 відаў птушак.
На ўрачыстай цырымоніі адкрыцця “Горада птушак” першы намеснік міністра прыродных рэсурсаў і аховы навакольнага асяроддзя Ія Малкіна адзначыла:
– Калі мы кажам пра праблемы наваколля, то робім акцэнты на якіх-небудзь глабальных рэчах, на тым унёску, які дзяржавы могуць у цэлым зрабіць у ахову нашай планеты. Тое, што робіце вы (дзеці. – заўв. аўт.), здаецца на першы погляд маленькім крокам у абарону птушак. Але на самай справе – гэта велізарны ўнёсак не толькі ў ахову нашага наваколля, захаванне біялагічнай разнастайнасці, а і ў вашыя сэрцы. Таму што, зрабіўшы адну добрую справу, мы ніколі не дазволім здзейсніцца многім дрэнным справам.
Глава адміністрацыі Ленінскага раёна г. Мінска Пётр Шостак падкрэсліў, што адкрыццё “Горада птушак” адбываецца ў гістарычным месцы. Упершыню Сярэбранае балота (цяпер – Сярэбраны Лог) упамінаецца ў 1557 годзе. У гэтым прыродным комплексе водзіцца шмат птушак, у тым ліку чырванакніжных. Таму неабходна захоўваць гэта месца і развіваць яго.
– Гэта месца пры мінімальным удзеле ўсіх зацікаўленых можа вельмі хутка стаць візітнай карткай Мінска ў галіне экалагічнага выхавання і выканання Нацыянальнай стратэгіі ўстойлівага сацыяльна-эканамічнага развіцця Рэспублікі Беларусь, – упэўнены Руслан Шайкін.
Па словах спецыяліста, плануецца і далей развіваць гэту ўнікальную і незвычайную гарадскую тэрыторыю як прыродна-адукацыйны комплекс для падтрымкі экалагічнай адукацыі. Ужо зараз распрацоўваецца вучэбна-метадычны комплекс, які будзе бясплатна раздадзены педагогам, каб яны самі маглі праводзіць экскурсіі па “Горадзе птушак”.
***
Ужо некалькі гадоў запар у межах адукацыйнага праекта “Экалогія і дзеці” Мінскі гарадскі камітэт прыродных рэсурсаў і аховы навакольнага асяроддзя сумесна з Камітэтам па адукацыі Мінгарвыканкама, Мінскага дзяржаўнага турысцка-экалагічнага цэнтра дзяцей і моладзі пры садзейнічанні Цэнтра экалагічнага выхавання і развіцця праводзіць гарадскі конкурс знаўцаў птушак “Мудры філін”. Сёлета ён праводзіўся ў дзвюх намінацыях: на веданне птушак, што зімуюць у нашай краіне, і стварэнне доміка для птушак.
Падчас адкрыцця “Горада птушак” пераможцы конкурсу “Мудры філін-2018” у намінацыі “Птушыны домік” атрымалі свае ўзнагароды. Прайшоў і майстар-клас па пляценні гнездавых кашоў для вушастых соў. Гэтыя птушкі, у адрозненне ад сваіх родзічаў, не ўмеюць віць гнёзды, таму займаюць “кватэры” іншых відаў.
Вераніка КОЛАСАВА
Фота аўтара
Канцэрт для дзяцей і моладзі, пластычны спектакль Ягора Дружыніна і «Рок-панарама».