«Гульня ў кіно»
«МІР», з 9 красавіка
Новае інтэлектуальна-забаўляльнае шоу, якое будзе ісці на канале «МІР» штотыдня з панядзелка па чацвер, — віктарына для сапраўдных знаўцаў кіно. Прычым не любога, а савецкай класікі жанру. Прымаць творчы экзамен у тэлегульні будзе шоўмен Сяргей Белагалоўцаў, задача якога — дапамагчы і адначасова заблытаць удзельнікаў, якім, у сваю чаргу, трэба як мага хутчэй націскаць на кнопку і даваць правільныя адказы на пытанні вядучага.
У першых трох раўндах кожная адгадка прыносіць пэўныя грошы на рахунак удзельнікаў, а далей гулец з найменшай заробленай сумай пакідае віктарыну. Фіналістам жа спатрэбіцца не толькі добрае веданне кіно, але і зрокавая памяць: хто з іх пасля прагляду «нарэзкі» з 16 кінастужак успомніць больш фільмаў, той і выйграе, і атрымае прызавы фонд, зароблены ўсімі ўдзельнікамі. Максімальная сума выйгрышу ў праграме — 60 тысяч расійскіх рублёў, але яе яшчэ не атрымаў ніхто з гульцоў. Паспрабуйце і вы свае сілы ў кінавіктарыне — магчыма, варта адправіць заяўку на ўдзел?
«Напарніцы»
«Беларусь 1», з 9 красавіка
Гераіні гэтай дэтэктыўнай меладрамы — дзве эфектныя жанчыны Ларыса і Юлія — знаёмыя даволі даўно, але сяброўкамі іх назваць не выпадае. Проста аднойчы, калі дзяўчаты яшчэ вучыліся ў школе МУС, жаніх Ларысы сышоў ад яе дзеля прыгожых вачэй Юлі, а літаральна праз некалькі дзён трагічна загінуў.
Не дзіва, што нават праз некалькі гадоў застарэлы боль перажытай здрады ўскалыхваецца наноў, калі ў аператыўны аддзел паліцыі, дзе працуе Ларыса, прыходзіць у якасці новай калегі яе колішняя саперніца... Тая прапануе забыць крыўды і стаць напарніцамі, каб расследаваць абставіны гібелі іх агульнага каханага мужчыны, — але для гэтага трэба навучыцца давяраць адна адной. Да таго ж справа аказваецца надзвычай заблытанай і абрастае нечаканымі падрабязнасцямі...
«Назола»
«Беларусь 2», 14 красавіка
Арыгінальную назву амерыканскай трагікамедыі можна перакласці таксама як «Чалавек, які ва ўсё ўмешваецца». Гэта характарыстыка як мага лепей пасуе немаладой удаве з Нью-Джэрсі, якая пасля смерці мужа адчайна шукае, чым запоўніць пустэчу ў жыцці, і надакучвае ўжо дарослай дачцэ навязлівай апекай.
З празмернай шчодрасцю, клопатам і бязмежным аптымізмам гераіня ўладкоўвае справы сябровак дачкі, працуе валанцёрам у шпіталі, дапамагае чарнаскураму юнаку з беднага квартала ў вучобе на юрыста... Урэшце яна знаходзіць свой шлях і сілы, каб ісці далей, у новае жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
