У штотыднёвым спартыўным аглядзе «Звязды» расказваем пра развязку чэмпіянату краіны па хакеі, вынікі таварыскіх матчаў гандбольнай зборнай і другі тур чэмпіянату Беларусі па футболе.
1. Хакеісты «Нёмана» абаранілі тытул чэмпіёнаў Беларусі ў экстралізе, абыграўшы ў шостым матчы фінальнай серыі плэй-оф мінскае «Юнацтва» — 3:2 (вынік фінальнай серыі 4:2)
Прэзідэнт Аляксандр Лукашэнка павіншаваў каманду хакейнага клуба «Нёман» з упэўненай і прыгожай перамогай у адкрытым чэмпіянаце Беларусі па хакеі з шайбай у экстралізе сезона-2017/2018 і заваяваннем Кубка Прэзідэнта Рэспублікі Беларусь. «Гэта дасягненне — вынік сур'ёзнай працы не толькі спартсменаў, але і ўсіх спецыялістаў і трэнераў, якія забяспечвалі неабходныя ўмовы для паспяховага выступлення каманды. Ва ўпартым і напружаным супрацьстаянні з мінскім «Юнацтвам» вы даказалі, што ў шэрагах «Нёмана» сабраліся сапраўдныя майстры, здольныя на працягу ўсяго сезона захоўваць выдатную спартыўную форму, байцоўскія якасці і нацэленасць на вынік», — гаворыцца ў віншаванні.
Камандзе хакейнага клуба «Нёман» Аляксандр Лукашэнка пажадаў моцнага здароўя і новых перамог.
— У вырашальнай стадыі барацьба за ганаровы трафей аказалася вельмі цяжкай. У шостым матчы, лічу, мы мелі перавагу, зрабілі правільныя высновы пасля паражэння ў Гродне. Адзначу, што чэмпіёнства заўсёды трохі прасцей заваяваць, чым яго адстаяць. Нам гэта ўдалося, — адзначыў пасля матча галоўны трэнер «Нёмана» Сяргей Пушкоў.
— Каментарыяў у мяне няшмат: перамагае наймацнейшы. «Нёман» быў нацэлены на перамогу, змагаўся, закідваў. А ў нас, на жаль, многія так і не зразумелі, што гэта плэй-оф, — сказаў Міхаіл Захараў, рулявы «Юнацтва».
Кубак Прэзідэнта ўручылі гродзенцам на «Чыжоўка-Арэне» міністр спорту і турызму Сяргей Кавальчук і старшыня Федэрацыі хакея Беларусі Сямён Шапіра.
Адзначым, што для хакейнага клуба «Нёман» гэта сёмы тытул у гісторыі. Раней каманда з Гродна станавілася пераможцам чэмпіянату ў 1998, 1999, 2001, 2013, 2014, 2017 гадах. Каманда Сяргея Пушкова трэці раз прыме ўдзел у хакейнай Лізе чэмпіёнаў, дзе выступіць і мінскае «Юнацтва», што атрымала права згуляць у гэтым прэстыжным турніры, выйграўшы ў студзені Кантынентальны кубак.
2. Гандбалісты зборнай Беларусі няўдала правялі таварыскія матчы ў гасцях у каманды Славеніі
У першай сустрэчы ў Трбоўле беларусы саступілі з лікам 29:35, а ў другой у горадзе Лашка — 23:27.
— Мы засмучаны, што двойчы прайгралі. Але я задаволены, што такія матчы ў нас былі. Яны прымушаюць праяўляць характар, вучаць дзейнічаць супраць агрэсіўнай жорсткай абароны, якую прымяняе зборная Славеніі, — каментуе вынік галоўны трэнер зборнай Беларусі Юрый Шаўцоў. — Былі сур'ёзныя агрэхі ў абароне, выкліканыя тым, што мы даволі даўно не гулял і сёе-тое з ранейшых напрацовак прыйшлося аднаўляць на хаду. Перад паўторным матчам мы паспелі патрэніравацца, грунтоўна папрацавалі з відэа. Таму і гульня па змесце атрымлівалася значна лепшай.
Нагадаем, за права гуляць на чэмпіянаце свету ў 2019 годзе наша зборная ў чэрвені пазмагаецца з гандбалістамі з Аўстрыі.
3. Завяршыўся другі тур чэмпіянату краіны па футболе
Мінскае «Дынама» і «Іслач» разышліся мірам — 0:0, «Мінск» саступіў БАТЭ — 0:2, «Дняпро» (Магілёў) перайграў «Гомель» — 1:0, «Тарпеда-БелАЗ» (Жодзіна) з такім жа лікам перамог «Смалявічы» — 1:0, «Віцебск» быў мацнейшы за «Шахцёр» (Салігорск) — 2:1, матч «Слуцка» і «Нёмана» (Гродна) скончыўся з лікам 1:1, «Тарпеда» (Мінск) перайграў «Гарадзею» — 1:0, «Дынама» (Брэст) быў мацнейшы за «Прамень» (Мінск) — 2:1.
Існуюць строгія патрабаванні да месцаў для купання.
Яе песні займаюць першыя радкі ў музычных чартах краіны, пастаянна гучаць на радыё і тэлебачанні.
