Вы тут

«Каб людзі не журыліся»


Ён майстар яркага, непаўторнага таленту. У яго спектаклях выконвалі ролі такія знакамітыя акцёры тэатра і кіно, як Анатоль Папанаў, Андрэй Міронаў, Аляксандр Шырвінт, Вера Васільева, Наталля Селязнёва, Леў Дураў... На працягу двух дзесяцігоддзяў яго п’есы ставіліся ў 300 тэатрах Савецкага Саюза, а таксама многіх вядучых тэатрах Усходняй Еўропы. У Гомельскай абласной бібліятэцы прэзентавалі мемарыяльную залу, прысвечаную народнаму пісьменніку Беларусі, лаўрэату Дзяржаўнай прэміі БССР імя Якуба Коласа, лаўрэату Літаратурнай прэміі імя Янкі Купалы, драматургу Андрэю Макаёнку.


З 2010 года ў кніжніцы паспяхова працуюць тры музейныя экспазіцыі, прысвечаныя народным пісьменнікам Беларусі — Івану Шамякіну, Івану Мележу, Івану Навуменку. І вось мемарыяльнная зала Андрэю Макаёнку. Падставай для яе стварэння стаў архіў драматурга, які перадала бібліятэцы яго жонка Любоў Іванаўна Макаёнак. У экспазіцыі — камсамольскі і ваенны білеты, узнагароды, пасведчанне народнага пісьменніка БССР з нагрудным знакам, ганаровая грамата лаўрэата Дзяржаўнай прэміі БССР імя Якуба Коласа з нагрудным знакам, кнігі з аўтографамі ад калег па пяры, пісьмы, тэлеграмы, рукапісы, афішы, першы верш, напісаны ў 1945 годзе (пачынаў драматург з паэзіі), рэдкія фотаздымкі, асабістая бібліятэка і фотаальбомы драматурга, яго ваенныя дзённікі, аўтапартрэт з дрэва, які выразаў сам драматург, і многія іншыя матэрыялы.

«Выбачайце калі ласка», «Каб людзі не журыліся», «Лявоніха на арбіце», «Трыбунал», «Таблетку пад язык», «Зацюканы апостал» — далёка не поўны пералік п’ес, створаных драматургам, якія доўга не сыходзілі са сцэны тэатраў. Напрыклад, трагікамедыя «Зацюканы апостал» упершыню была пастаўлена ў Маскоўскім тэатры сатыры. У рэпертуары тэатра п’еса праіснавала больш за 15 гадоў, за гэты час была пастаўлена звыш 600 разоў.

У архіве пісьменніка захавалася кніга аб Маскоўскім тэатры сатыры з дарчымі надпісамі Г. Менглета, С. Мішуліна, В. Васільевай і інш. Вось адзін з запісаў: «Дорогому папе — Андрею от отца его малыша и Апостола Зиновия Высоковского с братской любовью».

Пісьменнік нарадзіўся 12 лістапада 1920 года ў вёсцы Борхаў Рагачоўскага раёна Гомельскай вобласці. У час вайны быў цяжка паранены. Пасля вайны скончыў Рэспубліканскую партыйную школу пры ЦК КПБ, працаваў у «Вожыку», больш як дзесяць гадоў быў рэдактарам часопіса «Неман». Вёў актыўную грамадскую дзейнасць. Імя Макаёнка жыве і сёння: у літаратуры, у тэатры, у нацыянальнай культуры.

Ніна СЕРЫКАВА

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.