Вы тут

Хто вінаваты ў канфлікце кандуктаркі і школьніцы ў Гомелі?


Час ад часу адчуваю сябе сабакам са зграі прафесара Паўлава. Сліна выдзяляецца, першая сігнальная сістэма патрабуе кідаць усё, калі ежы яшчэ няма, але нехта пра яе ўжо зычна гаворыць. І самой прыходзіцца зарабляць харчаванне тэрміновай рэакцыяй на штосьці, што праляцела са свістам і грукатам у паветры. Прабачце, у інтэрнэце.


Вось чарговая сенсацыя. Адзін гамяльчанін з-пад крыса ў гарадскім аўтобусе зняў сварку паміж школьніцай і кантралёрам. І, адчуўшы сябе неверагодна смелым барацьбітом за справядлівасць, выклаў гэта тэлефоннае відэа ў супольнасці «Гэта Гомель, дзетка!».

І панеслася. Шматлікія каментарыі пра жорсткасць паводзінаў кандуктаркі, пра справядлівасць і, канешне, абагульненні наконт жудасных адносін паміж людзьмі.

Звычайная сварка, дарэчы, без нецэнзурнай лексікі і зневажання прыпыніла звычайную работу многіх, хто адказвае за рух транспарту ў Гомельскай вобласці. Затое сенсацыйнае відэа за дзень сабрала «лайкі» ў такой колькасці, што ўвесь наступны месяц яго аўтар можа выхваляцца перад суседзямі і сваякамі. 134 тысячы праглядаў за адзін толькі вечар! Пакуль нехта з аналагічным супер-сюжэтам не пераб'е яго славу, заваяваную цяжкай працай.

Між тым, калі эмоцыі закінуць на гарышча і паглядзець тое самае відэа спакойна, можа здацца, што каментатары пішуць зусім не пра тое, што бачаць сваімі вачыма. Ці ўвогуле не бачаць, але пішуць, бо абавязкова ж быць у зграі.

Самае большае, на што можа прэтэндаваць аўтобусны канфлікт, дык на загаловак «як бабкі на базары». Дзяжурная лаянка паміж пасажырамі і жанчынай у форме кандуктара. Дарэчы, зафіксаванае цягнецца роўна паўтары хвіліны. Затым кандуктар ідзе далей выконваць сваю работу.

Падаецца ж усё вось так: «Кандуктар папрасіла ў школьніцы аплату праезду. Тая прад'явіла ёй даведку. У выніку кандуктар проста ў аўтобусе правяла экспертызу і заявіла, што даведка пратэрмінаваная, зыходзячы з таго, што на даведцы лічба 2018 вельмі падобная на 2016. А яшчэ ў дзяўчынкі на фота касічкі, а ў гэтай школьніцы валасы распушчаны. Дзяўчынка аплаціла праезд без якіх-небудзь пытанняў, пасля чаго кандуктар вырвала з рук дзяўчынкі даведку. Калі за дзяўчынку пачалі ўступацца ўсе пасажыры, кандуктар пачала крычаць на школьніцу. У выніку дзяўчынка ў слязах, кандуктар пад ціскам пасажыраў адарвала фатаграфію і аддала яе дзяўчынцы. Ці правамерныя ўсе гэтыя дзеянні на ваш погляд? На якой падставе кандуктар выкрала даведку, сапсавала яе і накрычала на дзіця?»

Старшы выкладчык кафедры філасофіі, гісторыі, паліталогіі БелДУТа, псіхолаг Таццяна Сасноўская адзначае, што цяпер у сеціве вельмі многа відэасюжэтаў, калі людзі здымаюць нейкія няправільныя з іх пункту гледжання паводзіны іншых:

— Між тым, калі чалавек здымае, ён ужо з'яўляецца ўдзельнікам гэтай падзеі. Сёння ж усе баязліва робяць здымкі здалёк і з-пад крыса, выкладаюць у сеціва і пацяшаюцца з канфлікту. Калі мы бачым, што нехта некага зневажае, лаецца ці нават б'е, мы не спрабуем самі змяніць сітуацыю дзеяннем — мы пачынаем яе здымаць. Падаём свой удзел быццам грамадзянскую пазіцыю, але насамрэч гэта пазіцыя — «мая хата з краю, я нічога не ведаю». Гэта танная папулярнасць, а не сапраўдная грамадзянская пазіцыя. Кандуктар выконвала свае абавязкі. Іншая справа, што зрабіла гэта не зусім у карэктнай форме. Людзі ў аўтобусе і каментатары хацелі б, каб да школьніцы аднесліся нефармальна, а не па законе. Але ж з самога кандуктара будуць пытаць фармальна. Калі б яна не праверыла даведку — яе б пакаралі. Патрабаванні ў нас адны, а жаданні — іншыя. Такая двайная мараль атрымліваецца: мы самі не хочам выконваць закон, але патрабуем, каб з намі паступалі па законе. Заўважце, кантралёр дзяўчынку не высаджвала з транспарту. Школьніца сама аддала 50 капеек за праезд і канфлікт мог быць вычарпаны на гэтым.

Між тым на прадпрыемстве ААТ «Гомельаблаўтатранс» да разбору палётаў па роліку ў інтэрнэце падышлі грунтоўна. Намеснік генеральнага дырэктара па ідэалагічнай рабоце і кадрах Алег Цылько гаворыць, што сітуацыю паглядзелі не толькі на скандальным відэа:

— Высветлілася, што даведка, якую прад'явіла ў аўтобусе школьніца, сапраўды была падробленая. У паперы 2016 год выпраўлены на 2017. Лічба «6» — на «7». Кандуктар, якая дагэтуль не мела ніякіх нараканняў па рабоце, нічога ў гэтым выпадку не парушыла. Яна выконвала свае службовыя абавязкі. Між тым у выпадку, калі супрацоўнік бачыць, што прад'яўлены дакумент выклікае сумненні, ён можа забраць гэты дакумент. Да таго ж, у адпаведнасці з адміністрацыйным кодэксам, за падробку дакумента дзяўчынку ці яе бацькоў маглі б прыцягнуць да адміністрацыйнай адказнасці і даць штраф да 10 базавых велічынь. Кіраўніцтва аўтапарка звязалася са школай, з дзяўчынкай пагутарылі. Яна сказала: ведала, што даведка падробленая. Прэтэнзій у яе да кандуктара няма. І ўсё ж з кандуктарам мы правялі гутарку. Яна адзначыла, што эмоцыі ў той момант узялі верх і цяпер яна асэнсавала сітуацыю. Разглядаецца пытанне пра прыцягненне кандуктара да адказнасці за нетактоўныя паводзіны.

Дарэчы, калі зусім дакладна выконваць усе правілы, растлумачылі ў «Гомельаблаўтатрансе», у гэтай сітуацыі трэба было б выклікаць міліцыю. Згодна з інструкцыяй, кантралёр павінна была прасіць кіроўцу аўтобуса заблакаваць усе дзверы, калі транспарт пад'ехаў да прыпынку. Усе яго пасажыры заставаліся б у машыне, пакуль не прыехалі б праваахоўнікі для разбору з непаўналетняй школьніцай. Таму, калі наступным разам вы спозніцеся на работу з-за грамадзяніна з падробленай паперай, не здзіўляйцеся. Закон для ўсіх адзіны.

Увогуле ж, з любога дробнага канфлікту можна зрабіць сенсацыйную навіну. Калі ёсць пэўны намер. Але ж з пункту гледжання будаўніцтва стабільнага прававога грамадства такія выпадкі накіраваны выключна на яго разбурэнне.

Ірына АСТАШКЕВІЧ

Загаловак у газеце: Як сабака ў зграі

Дадаць каментар

Выбар рэдакцыі

Грамадства

Хобі звычайнага студэнта пераўтварылася ў інтэрактыўны музей

Хобі звычайнага студэнта пераўтварылася ў інтэрактыўны музей

Ці ведаеце вы, што першы ў свеце ноўтбук важыў больш за 20 кілаграмаў, а першы планшэт меў дыскавод для пяціцалёвых дыскет?

Грамадства

Якая будучыня ў сядзібных участкаў сталіцы?

Якая будучыня ў сядзібных участкаў сталіцы?

Разбіралася карэспандэнт «Звязды».

Грамадства

Як не «згарэць» на рабоце?

Як не «згарэць» на рабоце?

І чаму грошы не заўсёды матывуюць?

Грамадства

86-гадовы доктар тэхнічных навук: Усімі поспехамі я абавязаны жонцы

86-гадовы доктар тэхнічных навук: Усімі поспехамі я абавязаны жонцы

Прафесар у галіне машынабудавання на пенсію яшчэ не збіраецца...