Вы тут

Аўдыякнігі ад PRASTORA.BY атрымалі дзеці са слабым зрокам


Беларускамоўныя аўдыякнігі займелі новага слухача. У межах дабрачыннай акцыі «Дорым радасць!» яны трапілі да дзяцей са слабым зрокам. Гэта стала магчымым дзякуючы ініцыятыве сацыяльна-культурнай установы «МоцАрт», якая займаецца пашырэннем беларускай культуры і так званай інклюзіяй — рэалізуе сацыяльныя і дабрачынныя праекты, накіраваныя на людзей з абмежаванымі магчымасцямі, а таксама культурніцкай пляцоўцы «Прастора бай», дзе былі выпушчаны аўдыякнігі і падрыхтавана адметная забаўляльна-адукацыйная праграма.


Пад­час даб­ра­чын­най ак­цыі «До­рым ра­дасць!» у Ма­ла­дзе­чан­скай  спе­цы­яль­най шко­ле для дзя­цей з па­ру­шэн­ня­мі зро­ку.

Навучэнцы дзвюх спецыялізаваных школ — Маладзечанскай спецыяльнай агульнаадукацыйнай школы-інтэрната № 2 для дзяцей з парушэннямі зроку і Спецыяльнай сярэдняй агульнаадукацыйнай школы № 188 горада Мінска для дзяцей з парушэннямі зроку — атрымалі ў падарунак камплекты з аўдыякнігамі. Кожны вучань займеў па пяць запісаў, спецыяльна падабраных пад яго ўзрост, а таксама паштоўку з тэкстам для бацькоў пра важнасць вывучэння беларускай мовы і літаратуры і пакунак з цукеркамі ды гарбатай. Усе карысныя цікавінкі былі складзены ў прыгожыя льняныя торбачкі з арнаментам і надпісам «Беларусь».

Уручэнне падарункаў адбывалася падчас святочных мерапрыемстваў і суправаджалася лекцыямі і майстар-класамі па беларускіх традыцыйных музычных інструментах, выступленнем дудара, рыцарскім боем, выстаўкай і гістарычнымі расказамі пра беларускае ўзбраенне розных эпох.

Амаль на дзве гадзіны дзеці здзяйснялі віртуальнае падарожжа ў Сярэднявечча — у часы гераічных баталій, адвагі і мужнасці — і такое тут бачылі ўпершыню. Гісторык, заснавальнік народнага тэатра гістарычнай рэканструкцыі «Полацкі звяз» Юрый УСЦІНОВІЧ, які разам з паплечнікамі дэманстраваў дзецям элементы сярэднявечнага ўзбраення, расказаў:

— У нас ёсць розныя сярэднявечныя забаўкі, спецыяльна для гэтага прадугледжаныя. Мы паказваем і даём магчымасць паспрабаваць, як у даўнія часы продкі адточвалі свой спрыт і бавілі вольны час. Ёсць розныя атракцыёны, дзе можна пастраляць з лука, пакідаць сякеры — усё гэта суправаджаецца аповедамі і гістарычнымі даведкамі. Убачыўшы і адчуўшы такое на сабе, дзеці пачынаюць па-іншаму ўспрымаць гісторыю.

Школьнікі мелі магчымасць задаваць пытанні, дакранацца да даспехаў, зробленых на ўзор старажытных, і нават прымяраць іх, таксама як і паспрабаваць сябе ў ролі музыкаў, зайграўшы на дудзе або жалейцы. Такім чынам, беларуская культура і традыцыі сталі да іх на крок бліжэй.

Алесь КВІТКЕВІЧ, кіраўнік кампаніі «Прастора бай», дзе былі запісаныя аўдыякнігі, растлумачыў:

— Мы адчуваем неверагодны плён ад гэтай акцыі. І ў першую чаргу мяркуем па тым, як жыва дзеці рэагуюць на тое, што адбываецца на сцэне і побач з ёй, калі разгортваецца адмысловая выстаўка. Для іх гэта сапраўды цікава! Па заканчэнні імпрэзы нават утварылася чарга, прычым як хлопчыкаў, так і дзяўчат, каб прымераць на сябе даспехі. Дзеці з вялікай ахвотай імкнуліся патрымаць меч, дзіду, іншыя сярэднявечныя прылады, абступалі дудара і яго інструменты. Як вучні, так і настаўнікі казалі, што такога ў іх яшчэ не было. І запрашалі прыязджаць яшчэ, прывозячы да іх беларускую культуру ў такім жывым фармаце. Безумоўна, па меры магчымасці мы будзем імкнуцца гэта рабіць. Найпершая ж нашая задача — даехаць туды, дзе мы яшчэ не былі. Мы правялі імпрэзы ў дзвюх навучальных установах, а ў краіне яшчэ чатыры такія спецыялізаваныя школы і адзінаццаць дзіцячых садкоў для дзяцей з парушэннямі зроку. І цяпер мы збіраем неабходныя рэсурсы, плануем наведаць усе такія спецыялізаваныя ўстановы. Будзем вельмі рады, калі да нас далучацца тыя, хто, як і мы, бачыць сэнс у такога рода асветніцкай дзейнасці. Мы і самі будзем працягваць пошукі такіх людзей, праводзіць сустрэчы з людзьмі з бізнесу, знаходзячы сярод іх аднадумцаў, разам з якімі зможам працягнуць дадзеную дабрачынную акцыю з адукацыйнай місіяй.

Варта дадаць, што сярод «гукавых» кніг, якія падарылі самым юным слухачам, былі беларускія народныя і аўтарскія казкі, аўдыяспектаклі і песні для дзяцей малодшага ўзросту, творы Янкі Маўра «Палескія рабінзоны» і «У краіне райскай птушкі». Старэйшыя школьнікі атрымалі магчымасць пачуць такія творы Уладзіміра Караткевіча, як «Каласы пад сярпом тваім», «Дзікае паляванне караля Стаха», «Чорны замак Альшанскі», зборнік вершаў «Быў. Ёсць. Буду», а таксама творы Івана Мележа «Людзі на балоце», «Подых навальніцы», «Дзве душы» Максіма Гарэцкага, паэтычную спадчыну Янкі Купалы, Якуба Коласа, Максіма Багдановіча ды многае іншае.

Алесь Квіткевіч адзначае, што ў цэлым попыт на аўдыякнігі цяпер павялічваецца. Шмат хто любіць слухаць іх у машыне — асабліва падчас доўгіх падарожжаў — ці проста едучы ў грамадскім транспарце. Хтосьці, робячы хатнія справы, слухае літаратуру замест музыкі. Ёсць людзі, якім проста зручней слухаць, чым чытаць.

Вялікую цікавасць да беларускай літаратуры ў аўдыяфармаце праяўляюць таксама нашы суайчыннікі з-за мяжы. Для іх гэта асабліва актуальна, бо яны часцяком не маюць магчымасці чуць родную мову ў сваім асяроддзі. І тады аўдыякніга прыходзіць ім на дапамогу. У выніку слухачы і аматары жывога беларускага слова часта звяртаюцца ў «Прастору бай» з пытаннем, калі выйдуць новыя творы ў запісе? Таму ў гэтай культурніцкай прасторы задумваюцца над тым, каб увесці падпіску на аўдыякнігі, што будзе вельмі зручна для многіх.

Ніна ШЧАРБАЧЭВІЧ

Загаловак у газеце: Слухаючы літаратуру

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.