Вы тут

Калі ты — «Здольная»


Унікальны праект дае магчымасць беларускам займацца спортам незалежна ад узросту і фізічнай падрыхтоўкі.

Два гады таму каманда аднадумцаў запусціла ўнікальны для нашай краіны сацыяльна-спартыўны праект, каб кожная беларуска ведала, на што яна здольная: пераадолець унутраныя бар'еры, выйсці за рамкі стэрэатыпаў, стаць больш упэўненай у сабе і палюбіць актыўны лад жыцця. Праект так і назвалі — «Здольная». Сёння на бясплатныя трэніроўкі прыходзяць самыя розныя жанчыны. Хтосьці з іх апошні раз займаўся спортам шмат гадоў таму, мабыць нават у школе, хтосьці — нарадзіў дзіця і не можа яго ні з кім пакінуць. Але «Здольная» — яна для ўсіх.


Стаць моцнай і ўпэўненай у сабе

— Ідэя праекта з'явілася ў мяне падчас вучобы ў магістратуры ў Вялікабрытаніі, — расказвае стваральніца праекта «Здольная» Ганна БАНДАРЭНКА. — Тады я пазнаёмілася з мясцовым праектам Thіs Gіrl Саn, мэта якога — матываваць брытанак быць больш актыўнымі. Да гэтага я завяршыла прафесійную футбольную кар'еру, і мне вельмі хацелася зрабіць нешта сацыяльна значнае для беларусак.

Каб правільна сфармуляваць канцэпцыю і місію «Здольнай», спатрэбіўся час. Першы год каманда арганізоўвала бясплатныя трэніроўкі па футболе, рэгбі, амерыканскім футболе, асобных відах адзінаборстваў. Але праз нейкі час прыйшло ўсведамленне: праект не проста далучае беларусак да здаровага ладу жыцця. Дзякуючы спорту жанчыны адчуваюць сябе больш моцнымі, прыгожымі, упэўненымі ў сабе і шчаслівымі.

— Калі ёміста сказаць, пра што наш праект, — працягвае Ганна, — то ён пра тое, што кожная жанчына павінна мець магчымасць займацца любой спартыўнай актыўнасцю незалежна ад узросту, матэрыяльнага дабрабыту, наяўнасці дзяцей, а таксама ўзроўню фізічнай падрыхтоўкі. На жаль, праблема, якую мы вырашаем, не ляжыць на паверхні. Але калі задумацца крыху больш, то, напэўна, у асяроддзі кожнага ёсць знаёмая, якой не па кішэні абанемент у дарагі фітнес-клуб або няма з кім пакінуць дзіця, каб рэгулярна трэніравацца.

Як далучыцца да праекта?

«Здольная» чакае ўсіх ахвотных ад 18 гадоў. Для таго каб далучыцца да трэніровак, трэба запоўніць анлайн-форму рэгістрацыі на заняткі на сайце zdоlnаjа.bу.

Акрамя таго, як адзначае стваральніца праекта, «Здольная» — у тым ліку і аб гендарнай роўнасці:

— Вельмі шкада, што нават цяпер словазлучэнне «гендарная роўнасць» у некаторых беларусаў выклікае скрыўленую грымасу. Але паглядзім фактам у вочы. Як правіла, сярэднестатыстычная беларуска зарабляе на 33 % менш за мужчын, а таксама ўдвая больш заклапочана працай па доме і выхаваннем дзяцей, таксама на яе плечы кладзецца ўвага да дарослых членаў сям'і. Мы хацелі б даваць магчымасць жанчынам удзельнічаць у даступных спартыўных занятках па інтарэсах, не звяртаючы ўвагі на тое, што на трэніроўку яны могуць прыйсці з дзецьмі, або тое, што апошні раз яны бегалі ў школе на ўроках фізкультуры.

На футбол — з дзецьмі

Сёння большасці жанчын у праекце ад 18 да 35 гадоў, самай жа старэйшай з удзельніц — крыху больш за 40. У асноўным усе яны ніколі не займаліся спортам прафесійна.

— Нярэдкая карціна — убачыць на занятках і мам з дзецьмі, — дзеліцца Ганна. — Гэта асобная катэгорыя ўдзельніц праекта, да якіх неабходна асаблівая ўвага. Некаторыя дзеці займаюцца разам з мамамі, меншых жа падчас трэніроўкі могуць даглядаць валанцёры. Але, на жаль, сёння ў праекта няма адпаведнай інфраструктуры: дзіцячага пакоя або прафесійнай няні.

Дарэчы, большасць трэнераў «Здольнай» — жанчыны. Яны самі адгукнуліся на аб'яву Ганны ў інтэрнэце і вырашылі далучыцца да праекта. Такім чынам удалося запусціць канкрэтныя актыўнасці: каратэ, футбол, рэгбі, бадмінтон.

Апошнія некалькі месяцаў «Здольная» сфакусавана на адным кірунку — футболе. Па выніках унутранага даследавання, гэта самы папулярны від фізічнай актыўнасці ў праекце.

— Часам мы праводзім «адкрытыя трэніроўкі» і па іншых відах спорту. Напрыклад, не так даўно былі заняткі па рэгбі, а яшчэ ўлетку мы запрасілі ў Мінск каманду па ролер-дэрбі з Санкт-Пецярбурга, каб пазнаёміць беларусак з гэтым драйвовым відам спорту.

Пакуль праект дзейнічае толькі ў Мінску, аднак, як прызнаецца Ганна, яна разумее яго вялікую важнасць і патрэбнасць менавіта ў рэгіёнах, дзе не так развіта спартыўная інфраструктура:

— Маштабавацца ў рэгіёны — гэта доўгатэрміновыя планы. Я буду вельмі рада водгуку энергічных людзей, якія хацелі б пачаць рэгіянальныя ініцыятывы пад крылом «Здольнай».

Танцавальны флэшмоб супраць гвалту

Амаль за два гады існавання праекта «Здольная» ўдалося арганізаваць і правесці больш за 100 заняткаў, а таксама рэалізаваць шэраг сумесных ініцыятыў. Адзін з прыкладаў — танцавальны флэшмоб супраць гендарнага гвалту Оnе Bіllіоn Rіsіng («Адзін мільярд паўсталых»).

— Ідэя арганізаваць флэшмоб з'явілася сумесна з ГА «Радзіслава», — расказвае Ганна, — бо яны ўжо праводзілі падобнае мерапрыемства два гады таму. На жаль, з прычыны арганізацыйных складанасцяў мы не змаглі прыцягнуць вялікую колькасць удзельніц, але нам удалося запрасіць прадстаўнікоў СМІ і такім чынам расказаць аб існуючай праблеме вялікай колькасці чытачак. Мы паспрабавалі данесці, што ў Беларусі ёсць спецыялізаваныя арганізацыі, закліканыя дапамагаць жанчынам, якія знаходзяцца ў няпростым становішчы.


Водгукі ўдзельніц

Ганна ЛАНЕЦ (футбол):

— Я даўно хацела паспрабаваць пагуляць у футбол і, калі даведалася, што праект арганізуе трэніроўку, вырашыла: а чаму б і не? І да гэтага часу не шкадую. Калі пачула, што ідзе набор у каманду па міні-футболе і ўзровень навыкаў гульні не важны, вырашыла далучыцца. Зараз я ўваходжу ў склад каманды «Здольная» па футболе.

Самае галоўнае, што атрымала дзякуючы праекту, — гэта адчуванне, што я магу! Мяне вельмі натхняюць жанчыны, якія прыходзяць на трэніроўкі, якія гуляюць са мной у камандзе, іх сіла і адкрытасць, узаемадапамога і падтрымка. Гэта напаўняе мяне сілай.

Кацярына ГРАЧОВА (рэгбі):

— Аб «Здольнай» я даведалася праз сацыяльныя сеткі яшчэ да пачатку паўнавартаснай працы праекта. Вельмі чакала, калі пачнецца запіс на трэніроўкі, нават перыядычна пыталася ў арганізатараў, ці не прапусціла яго. Так я трапіла на адкрытую трэніроўку па жаночым рэгбі ў клуб, за які гуляю ўжо больш за год (РК «Гражданачка». — Аўт.). Сёння я не ўяўляю сябе без трэніровак, сяброў па камандзе, гэтай асаблівай энергіі, якую даюць заняткі спортам. Што асабліва прыемна, праз некаторы час пасля таго, як я пачала займацца рэгбі, мяне запрасілі на адкрытую лекцыю ад праекта «Здольная» ў якасці прадстаўніка гендарна-маркіраванага віду спорту. Было цудоўна падзяліцца з іншымі дзяўчатамі сваім вопытам і, магчыма, падштурхнуць кагосьці не спалохацца зрабіць крок, каб знайсці спорт па душы.

Ганна БАГІНО

Фота з архіва праекта «Здольная»

Выбар рэдакцыі

Грамадства

Як сучасныя палешукі рыхтуюцца да свята Уваскрэсення Хрыстовага

Як сучасныя палешукі рыхтуюцца да свята Уваскрэсення Хрыстовага

Аўтар «Звязды» расказвае на прыкладзе сваёй сям'і.

Культура

ЗЕНА: Ад сцэны не стамляюся!

ЗЕНА: Ад сцэны не стамляюся!

Графік у артысткі вельмі насычаны.

Грамадства

Звыклыя выключнасці. Ці можна зразумець «лічбавае племя»?

Звыклыя выключнасці. Ці можна зразумець «лічбавае племя»?

Даследаванне «Пакаленне «Z» у пытаннях і адказах» было прадстаўлена падчас навуковага стэндапа, арганізаванага для навучэнцаў профільных педагагічных класаў у БДПУ.

Грамадства

Ежа ці сімвал? Самы час зацікавіцца роспісам яек

Ежа ці сімвал? Самы час зацікавіцца роспісам яек

Карэспандэнт «Звязды» схадзіла на майстар-клас па стварэнні «пісанак».