Вы тут

Традыцыйная выстава «СМІ ў Беларусі» сёлета пройдзе ў новым фармаце


На выставе «СМІ ў Беларусі», якая сёлета традыцыйна пройдзе з 3 да 5 мая ў сталічным НВЦ «БелЭкспа», будзе прадстаўлена каля чатырох соцень перыядычных выданняў, радыё- і тэлекампаній, інтэрнэт-рэсурсаў і інфармацыйных агенцтваў, аператараў кабельнага тэлебачання і выдавецтваў.


Цікавасць да выставы праявілі госці з Расіі, Украіны, Польшчы, Латвіі, Казахстана, Турцыі і іншых краін, якія таксама прадставяць свае экспазіцыі. У прыватнасці, сярод удзельнікаў будуць СМІ Кастрамской, Бранскай абласцей і Ямала-Ненецкай аўтаномнай акругі Расіі. Дэлегацыю апошняй ўзначаліць віцэ-губернатар Ірына Сакалова, якая правядзе шэраг сустрэч, у тым ліку з міністрам інфармацыі Аляксандрам Карлюкевічам і кіраўніцтвам Мінгарвыканкама.

Акрамя таго, у мерапрыемстве возьмуць удзел сродкі масавай інфармацыі Кастрамской вобласці, з якой у нашай краіны даволі цесныя сувязі. На цяперашні момант рэалізуецца пагадненне паміж урадам Рэспублікі Беларусь і Адміністрацыяй Кастрамской вобласці аб гандлёва-эканамічным, навукова-тэхнічным і сацыяльна-культурным супрацоўніцтве. У інфармацыйнай сферы двухбаковыя адносіны ладзяцца на аснове мемарандума аб супрацоўніцтве ў галіне друку і інфарматызацыі, падпісаным у чэрвені 2017 года. Апроч узаемнага асвятлення розных мерапрыемстваў у сродках масавай інфармацыі на пастаяннай аснове вядзецца абмен вопытам у сферы падрыхтоўкі спецыялістаў у галіне кнігавыдання, паліграфіі, СМІ. Напрыклад, у чэрвені 2017 года прадстаўнікі журналісцкай супольнасці Беларусі прынялі ўдзел ва Усерасійскім фестывалі тэлевізійнай, радыё і друкаванай журналістыкі «Мая правінцыя» ў Кастраме.

Як заўсёды, наведвальнікаў выставы чакае насычаная праграма мерапрыемстваў, у прыватнасці прэзентацыі шматлікіх інфармацыйных і інтэрнэт-праектаў, аўтограф-сесіі, майстар-класы, флэш-акцыі. У прыватнасці, Выдавецкі дом «Звязда» прадставіць сумесна з «Настаўніцкай газетай» праект «Мая малая радзіма», у яго межах пройдзе круглы стол з краязнаўцамі, этнографамі і іншымі спецыялістамі. А вось «Сталічнае тэлебачанне», якое рыхтуе да новага сезона цалкам абноўлены дызайн і шэраг новых праграм, часткова прэзентуе іх на выставе. Акрамя гэтага, па словах намесніка генеральнага дырэктара ЗАТ «Сталічнае тэлебачанне» Кірыла Казакова, госці выставы атрымаюць унікальны шанц трапіць на тэлеканал у якасці вядучых ці карэспандэнтаў.

— Удзельнікі нашых інтэрактыўных конкурсаў могуць паспрабаваць сябе ў ролі вядучых, і калі нам яны падыдуць, мы запросім іх на працу на тэлеканал, — адзначыў Кірыл Казакоў.

Цырымонія адкрыцця выставы адбудзецца 3 мая, 4 мая ўпершыню будзе аб'яўлены Днём рэгіянальнай прэсы, а 5 мая стане Днём для дзяцей і моладзі. На спецыяльнай дзіцячай пляцоўцы забаўляць маленькіх гледачоў будуць не толькі дзіцячыя выданні, але і інфармацыйнае агенцтва БелТА, холдынг «СБ. Беларусь сегодня». спецыяльны канцэрт для юнай аўдыторыі рыхтуе газета «Комсомольская правда».

Увечары 3 мая ўрачыста ўзнагародзяць пераможцаў 14-га нацыянальнага конкурсу «Залатая Літара».

— Нягледзячы на тое, што многія друкаваныя СМІ ператварыліся ў мультымедыйныя цэнтры і выйшлі ў інтэрнэт, цікавасць да конкурсу год ад году павышаецца, — адзначыла начальнік інфармацыйна-аналітычнага ўпраўлення Міністэрства інфармацыі Таццяна Хмель. — Мы атрымалі 260 работ, якія журы ацэніць у 23 намінацыях.

Алена КРАВЕЦ, Уладзіслаў Лукашэвіч

Загаловак у газеце: СМІ для ўсіх

Выбар рэдакцыі

Культура

У нядзелю яўрэі святкуюць Новы год дрэў

У нядзелю яўрэі святкуюць Новы год дрэў

На гэта свята асаблівым чынам спажываюць розную садавіну, запіваючы келіхамі добра разбаўленага віна.

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».