26 Верасень, серада

Вы тут

Сусвет дзяўчыны з ружовымі валасамі


Згодна з умовамі нашага творчага конкурсу, прыём «проб пяра» ад юных і маладых няштатных аўтараў завершаны. Пакуль у рэдакцыі разглядаюцца апошнія паступіўшыя па часе работы (а па нязменнай ужо шматгадовай традыцыі некаторыя з пачаткоўцаў адправілі іх ледзьве не ў самы апошні тэрмін), «Чырвонка. Чырвоная змена» працягвае друкаваць найлепшыя матэрыялы, што былі дасланыя раней. Канчатковыя вынікі конкурсу будуць падведзены пазней, тады ж мы назавём і імёны пераможцаў. Таму сачыце за дадаткам!

Пакуль жа хочам павіншаваць усіх удзельнікаў нашага творчага спаборніцтва. Спадзяёмся, што і навічкі-дэбютанты, і сталыя ўдзельнікі конкурсу, якія бяруць у ім удзел на працягу апошніх двух-трох гадоў, атрымалі для сябе карысны досвед, а хто збіраецца паступаць на факультэт журналістыкі — умацаваліся ва ўласным выбары, паспытаўшы прафесійнага «хлеба» на нашай імправізаванай «кухні», пляцоўцы для самавыяўлення беларускамоўных маладых творцаў пад назвай «Я — малады. І мне не ўсё роўна!»


Вось як бывае: ты ходзіш у школу і нават не падазраеш, што зусім побач вучацца крэатыўныя і творчыя равеснікі. Вучаніцу адзінаццатага класа маладзечанскай СШ № 2 Анастасію Васілеўскую я заўважыла зусім нядаўна. Маю ўвагу прыцягнуў не столькі ярка-ружовы колер валасоў дзяўчыны, колькі яе цікаўны і ўпэўнены позірк.


Здаецца, што навуку і мастацтва цяжка сумясціць. Але мая сённяшняя гераіня разбурыла гэты стэрэатып, атрымаўшы другое месца ў рэспубліканскім конкурсе дзіцячых малюнкаў «РRОнавуку». У намінацыі «Касмічнае падарожжа» журы высока ацаніла Насціну работу, выкананую ў графічным стылі. А прапанавала паўдзельнічаць у конкурсе настаўніца матэматыкі, якая даведалася аб незвычайным таленце сваёй вучаніцы.

Маляваннем Насця захапляецца ўжо дзевяць гадоў. У дзяцінстве галоўнымі персанажамі ўвесь час былі лялькі. Малявала вельмі шмат і літаральна на ўсім, да чаго магла дацягнуцца, таму бацькі вырашылі аддаць дачку ў мастацкую школу.

— Маляванне дапамагае аддацца эмоцыям і пачуццям, а яшчэ гэта выдатны спосаб пераносіць уражанні на паперу, — з захапленнем расказвае дзяўчына. — А на творчасць мяне натхняюць работы фатографаў, такіх як Томас Хепкер і Гары Груер. У асноўным усе мае малюнкі выкананы ў стылі графікі і рэалізму.

Кажуць, што таленавіты чалавек таленавіты ва ўсім. Вось і Насця не выключэнне. Акрамя малявання яна захапляецца харэаграфіяй, з'яўляецца ўдзельніцай розных танцавальных конкурсаў і фестываляў. Перавагу дзяўчына аддае такім папулярным кірункам, як Hір Hор і Tесhnо.

Таксама Насця вучыцца ў музычнай школе, іграе на двух інструментах: гітары і ўкулеле (гэта маленькая гавайская гітара). Са слоў дзяўчыны, незвычайнае гучанне апошняй з'яўляецца выдатным сродкам ад стрэсу і стомленасці, паляпшае настрой, і без гэтага атрыбута не абыходзіцца ні адна вечарынка.

Яшчэ Анастасія імкнецца перадаць свой унутраны свет, складаючы вершы і апавяданні. У дзявятым класе стала пераможцай раённага конкурсу «Слова — маладым» у намінацыі «Гэта мяне хвалюе».

— Ужо тады я цікавілася сацыялогіяй і ўзаемаадносінамі паміж людзьмі, — прыгадвае Насця. — А цяпер мяне гэта яшчэ больш хвалюе, бо я стала дарослай, і некаторыя мае погляды на жыццё змяніліся.

Адзінаццацікласніца марыць стаць архітэктарам.

— Я б хацела спраектаваць вялізныя будынкі ў стылі рацыяналізму: арт-прасторы, бібліятэкі, бізнес-цэнтры, — дзеліцца суразмоўніца.

Цяпер яна не толькі актыўна малюе, распрацоўвае чарцяжы, але і старанна рыхтуецца да выпускных іспытаў. Школьніца ўдала сумяшчае хобі і вучобу, а веды засвойвае хутка і лёгка.

— Адзінае, чаго мне не хапае, гэта большай свабоды для творчасці і рэалізацыі ўсіх праектаў, якія прыходзяць у галаву. Ну, і колькасці гадзін у сутках, іх занадта мала для мяне, — жартуе дзяўчына.

Мне спадабалася яе мэтанакіраванасць. Яна ўжо шмат чаго дамаглася, але пастаянна ставіць перад сабой усё новыя задачы. У найбліжэйшай будучыні Анастасія Васілеўская плануе паступіць ва ўніверсітэт, адкрыць персанальную выстаўку і перамагчы на чэмпіянаце па танцах «BІZОN» у Мінску.

Карына Міклушыс, вучаніца 10 класа СШ № 2 г. Маладзечна

Пра аўтара

— Я хачу стаць журналістам, — расказала пра сябе Карына, якой нядаўна споўнілася 16 гадоў. — Асноўныя крытэрыі ў выбары будучай прафесіі — цікаўнасць і камунікабельнасць. Мне падабаецца кантактаваць з людзьмі, даведвацца пра іх інтарэсы, звычкі, густы і мары. Таму ў мяне і не зусім звычайнае хобі — посткросінг (абмен паштоўкамі). Дзякуючы гэтаму захапленню я знайшла сяброў у розных кутках свету, напрыклад, у Паўночна-Афрыканскай Рэспубліцы, Балгарыі, Германіі. У мяне вялікія планы, а найбліжэйшыя з іх — паступленне на факультэт журналістыкі. Для дасягнення гэтай мары я прыкладаю намаганні ўжо цяпер.

Дадаць каментар

Выбар рэдакцыі

Палітыка

Уладзімір Андрэйчанка расказаў пра найбольш значныя законапраекты

Уладзімір Андрэйчанка расказаў пра найбольш значныя законапраекты

 «Толькі агульнымі намаганнямі мы зможам супрацьстаяць няпростым выклікам часу».

Грамадства

Як у Беларусі абясшкоджваюць боепрыпасы

Як у Беларусі абясшкоджваюць боепрыпасы

​Колішняя Беларуская ваенная акруга лічылася адной з самых магутных у СССР.

Грамадства

Шчырая размова з вядомым педагогам пра бацькоўскія сумненні і страхі

Шчырая размова з вядомым педагогам пра бацькоўскія сумненні і страхі

«Калі ў вас адкрыўся рот, каб накрычаць на дзіця, спыніцеся хоць на секунду…» 

Грамадства

Чым здзівіў сёлета «Кліч Палесся»

Чым здзівіў сёлета «Кліч Палесся»

Этнафэст стаў вядомым далёка за межамі Беларусі.