Вы тут

Журналісты Паднябеснай сустрэліся з Міністрам інфармацыі Беларусі


Чацвёрты дзень візіту ў Беларусь прадстаўнікоў кітайскіх СМІ завяршыўся сустрэчай з Міністрам інфармацыі Аляксандрам Карлюкевічам. У агульнай гутарцы браў удзел Надзвычайны і Паўнамоцны Пасол КНР у Беларусі Цуй Цімін.


- Журналістыка садзейнічае ўсталяванню не толькі знешнепалітычных і знешнеэканамічных кантактаў, але і дапамагае развіццю народнай дыпламатыі, разуменню розных народаў, набліжэнню краін па духу, па сэрцу, па сваіх памкненнях, - пракаментаваў значэнне прэс-тура беларускі міністр. - Мы рады, што некалькі дзясяткаў кітайскіх журналістаў па традыцыі вандруюць па нашай краіне, знаёмяцца з самымі рознымі аб’ектамі: і з вытворчымі, і са славутасцямі. Апошняе не выпадкова, бо сёлета праходзіць Год турызму Беларусі ў КНР і Міністэрства спорту і турызму шмат робіць для  прадстаўлення нашай краіны ў Кітаі. Гэты тур - адна з частак агульнай праграмы.

Прэс-тур па Беларусі для кітайскіх СМІ арганізоўваецца Нацыянальным прэс-цэнтрам Беларусі, Міністэрствам інфармацыі, Міністэрствам замежных спраў, Пасольствам Рэспублікі Беларусь у КНР другі год запар. Гэта дазваляе казаць пра нараджэнне новай традыцыі.

- Паміж Кітаем і Беларуссю ўсталёўваецца добрая традыцыя, калі прадстаўнікі розных СМІ Кітая, рэгіянальных і цэнтральных, знаёмяцца з культурай, звычаямі і эканамічным станам Беларусі. Яны бачаць на свае вочы, што ў цэнтры Еўропы ёсць сапраўды прыгожая, стабільная краіна, з добрымі ладам жыцця, дзе жыве адукаваны народ, - сказаў на сустрэчы з Міністрам інфармацыі Беларусі і кітайскімі журналістамі Надзвычайны і Паўнамоцны Пасол КНР у Беларусі Цуй Цімін. - Самае важнае: беларускі народ сапраўды па-сяброўску ставіцца да Кітая. Нашы адносіны зараз знаходзяцца ў найлепшым перыядзе, у нашым супрацоўніцтве ёсць канкрэтныя поспехі. Кітайскія журналісты маюць магчымасць упэўніцца ў гэтым непасрэдна. Мы будзем працягваць развіваць усебаковую дружбу ў агульных інтарэсах. Такія мерапрыемствы – вельмі карысныя крокі ў  гэтым працэсе. Я вельмі ўдзячны за гэта і беларускаму ўраду, і беларускаму паслу ў Кітаі, і Міністэрству інфармацыі Беларусі.

Аляксандр Карлюкевіч у сваю чаргу дадаў, што ў Міністэрства інфармацыі існуе даўняе пагадненне з кітайскім бокам: у 2005 годзе была падпісаная дамова з Дзяржаўнай канцылярыяй КНР  пра медыйнае супрацоўніцтва, у 2015 годзе заключаны дагавор ў галіне кнігавыдання і  паліграфіі, ажыццяўляецца вялікая праграма, якая часткова прадстаўленая ў рамках сёлетняга прэс-туру.  “Думаю, перш за ўсё, кітайскія журналісты звярнуць увагу на тыя сумесныя праекты, рэалізацыя якіх досыць паспяхова праходзіць у нас у краіне: гэта і індустрыяльны парк Вялікі камень, і шэраг прадпрыемстваў з удзелам кітайскіх інвестыцый. Прэс-тур дае магчымасць больш шырока развіваць эканамічныя адносіны паміж нашымі краінамі”, - падкрэсліў Міністр інфармацыі Беларусі.

Вольга МЯДЗВЕДЗЕВА

Фота Ганны ЗАНКАВІЧ

Выбар рэдакцыі

Культура

У нядзелю яўрэі святкуюць Новы год дрэў

У нядзелю яўрэі святкуюць Новы год дрэў

На гэта свята асаблівым чынам спажываюць розную садавіну, запіваючы келіхамі добра разбаўленага віна.

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».