Вы тут

Урачыстасці з нагоды Дня Перамогі пройдуць у беларускіх ВНУ


7 мая ва ўнутраным дворыку Белдзяржуніверсітэта ( вул. Бабруйская, 5а)  у 11 гадзін распачнецца акцыя, на якую запрошаны ветэраны Вялікай Айчыннай вайны, якія раней працавалі ва ўніверсітэце.


У гэты дзень унутраны дворык будзе аформлены ў стылі ваенных гадоў. Маскіровачная сетка, брызентавая палатка, матацыкл-МТ і баявая машына пяхоты створаць атмасферу таго часу. Імправізаванай сцэнай стане кузаў легендарнай “палутаркі”, з якой больш як 70 гадоў таму выступалі на фронце артысты перасоўных тэатраў і канцэртных брыгад. Сваімі выступленнямі акцёры і музыканты ўздымалі баявы дух салдат.

Праграмай прадугледжана музычна-паэтычная пастаноўка “Каб памяталі ...”, прысвечаная Хатынскай трагедыі. Музычныя кампазіцыі прагучаць у выкананні Народнай харавой капэлы і вакальнай студыі БДУ. Акампанаваць будзе духавы аркестр Мінскага гарадскога ўпраўлення МНС. Акрамя таго, студэнты БДУ выступяць з паэтычнымі і празаічнымі творамі аб крывавых падзеях 40-х гадоў.

У рамках мерапрыемства адбудуцца ўрачысты марш курсантаў ваеннага факультэта БДУ і ўскладанне кветак да мемарыяльнага знака ў памяць студэнтам і выкладчыкам БДУ, якія загінулі ў час Вялікай Айчыннай вайны. Да вайны ў структуру БДУ ўваходзілі 6 факультэтаў і 33 кафедры. Тады ў ВНУ налічвалася 1400 студэнтаў, 151 навуковы работнік, 210 чалавек адміністрацыйна-тэхнічнага персаналу і 90 вучэбна-дапаможнага. У  першыя дні вайны каля 450 студэнтаў і выкладчыкаў добраахвотнікамі пайшлі на фронт. Эвакуявацца паспелі толькі 620 чалавек. Большасць выкладчыкаў і студэнтаў, што засталіся ў горадзе, сталі актыўнымі ўдзельнікамі падпольнага і партызанскага руху. З ліку студэнтаў і супрацоўнікаў БДУ дванаццаці прысвоена званне Героя Савецкага Саюза. Сёння ў ВНУ засталося 18 ветэранаў Вялікай Айчыннай вайны.

У Беларускім дзяржаўным педагагічным універсітэце 7 мая пройдзе акцыя “Мы памятаем! Мы ганарымся!” Яе ўдзельнікі (навучэнцы педагагічных класаў, студэнты і работнікі БДПУ) аб’яднаюцца пад лозунгам “Чытайце самі, чытайце разам з намі!”. Яны будуць чытаць вершы і прозу аб Вялікай Айчыннай вайне і творы, напісаныя ў гады ваеннага ліхалецця.

Плануецца, што ў акцыі прымуць удзел таксама малалетнія вязні нямецка-фашысцкіх лагераў: першы дэкан фізічнага факультэта з 1974 па 2003 года, прафесар кафедры фізікі і методыкі выкладання фізікі фізіка-матэматычнага факультэта Уладзімір Якавенка (працуе ў БДПУ 56-ты год), метадыст музычна-педагагічнага факультэта (цяпер — факультэта эстэтычнай адукацыі) Галіна Андрашына  (працавала ў БДПУ 43 гады), старшыня Савета ветэранаў БДПУ Валерый Алавянікаў  і іншыя.  Мерапрыемства пройдзе ў вучэбным корпусе №1 (вул.Савецкая ,18, пачатак у 14  гадзін).

Акрамя таго ў рамках акцыі пройдзе выстаўка кніг і матэрыялаў “Подзвіг народа вечны…”, прэзентацыя фатаграфій ваенных гадоў. У чытальнай зале бібліятэкі будзе працаваць тэматычная фотазона “За Радзіму” (калекцыя экспанатаў ваенных гадоў, сабраная супрацоўнікамі БДПУ).

Надзея НІКАЛАЕВА

Выбар рэдакцыі

Культура

У нядзелю яўрэі святкуюць Новы год дрэў

У нядзелю яўрэі святкуюць Новы год дрэў

На гэта свята асаблівым чынам спажываюць розную садавіну, запіваючы келіхамі добра разбаўленага віна.

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».