Вы тут

«Гісторыю малой радзімы трэба шукаць у архівах»


Такое меркаванне выказаў кандыдат гістарычных навук, дацэнт кафедры гісторыі Беларусі, археалогіі і спецыяльных гістарычных дысцыплін факультэта гісторыі, камунікацыі і турызму Гродзенскага дзяржаўнага ўніверсітэта імя Янкі Купалы Аляксей ЗАГІДУЛІН. Тэмы цікавасці да ўнікальных рэгіянальных аб’ектаў, выхавання любові ў маладога пакалення да тых месцаў, дзе яны нарадзіліся, абмяркоўвалі падчас круглага стала “Вывучэнне малой радзімы: вопыт, праблематыка, перспектывы”. Ён праходзіў у межах XXII Міжнароднай спецыялізаванай выставы “СМІ ў Беларусі" і па ініцыятыве Міністэрства інфармацыі быў арганізаваны сумесна газетай “Звязда” і “Настаўніцкай газетай”.


– На факультэце мы рэгулярна праводзім экскурсіі як са студэнтамі, так і з навучэнцамі школ, гімназій і ліцэя, якія з’яўляюцца філіяламі кафедр нашага ўніверсітэта, – кажа Аляксей Загідулін. – Гэта як традыцыйныя экскурсіі, да ліку якіх адносяцца “Праваслаўныя храмы Гродзенскай епархіі”. Так і “незаезжаныя” маршруты, напрыклад “Фарты і ДОТы Гродзенскай крэпасці ў пачатку Другой сусветнай вайны”, экскурсія на радзіму Кастуся Каліноўскага ў Свіслацкі раён, фальварак Якушоўка, і іншыя. Мы ладзім і экскурсіі-экспедыцыі, калі студэнтам ставяцца пэўныя даследчыя задачы.

На кафедры гісторыі Беларусі, археалогіі і спецыяльных гістарычных дысцыплін за  апошнія некалькі год у выніку даследчых экспедыцый выйшла некалькі зборнікаў. Сярод іх “Могілкі трансгранічных рэгіёнаў” – у ім сабраныя матэрыялы па некрапалістыцы.

– Яшчэ адзін адметны зборнік – “Маршруты па штэтлах”. Кіраўніком гэтага праекта быў Сяргей Піваварчык, – адзначае гісторык. – Мае калегі  вывучылі 20 мястэчак Гродзеншчыны, а таксама 20 мястэчак польскага і 20 мястэчак украінскага прыгранічча. Гэты зборнік змяшчае даследаванні па яўрэйскай культуры і з’яўляецца добрым дапаможнікам для экскурсаводаў, бо настальгічны турызм цяпер набірае папулярнасць.

Адметна, што на гістарычным факультэце Гродзенскага ўніверсітэта працуе студэнцкі гісторыка-краязнаўчы гурток. Яго ўдзельнікі актыўна займаюцца даследаваннямі і штогод выдаюць свой зборнік “Рэха мінуўшчыны”.

– Мы арыентуем студэнтаў пісаць дыпломныя работы, скіраваныя на гісторыю іх малой радзімы. Натуральна, што ім даводзіцца звяртацца да архіваў і працаваць з гістарычнымі крыніцамі, – дадае Загідулін. –  Сапраўды па некаторых тэмах літаратуры мала ці няма зусім. Але гісторыя малой радзімы вартая таго, каб спрабаваць рабіць у ёй новыя адкрыцці.

Ніна ШЧАРБАЧЭВІЧ

Фота Яўгена ПЯСЕЦКАГА

Выбар рэдакцыі

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».

Грамадства

Як працуюць сапёры?

Як працуюць сапёры?

Больш за ўсё «сюрпрызаў» з часоў Вялікай Айчыннай вайны было знойдзена ў Докшыцкім, Талачынскім, Асіповіцкім і Лагойскім раёнах.