26 Верасень, серада

Вы тут

Раім схадзіць


Выстава «Пад туфлікам у Музы. З гісторыі абутку», фотавыстава «У імя міласэрнасці», аўтафестываль «Граблі», веласіпедны карнавал «Viva ровар!» — афіша «Звязды» з 7 па 13 мая.


Выстава «Пад туфлікам у Музы. З гісторыі абутку»

Дзе: Нацыянальны гістарычны музей Рэспублікі Беларусь (вул. К. Маркса, 12)

Калі: з 7 мая па 10 чэрвеня, 11:00-19:00

Колькі каштуе: удакладняць у касе

Сёння гісторыя абутку налічвае 30 000 гадоў. Яна відазмянялася разам з патрэбамі грамадства, паказвала прыналежнасць гаспадара да пэўнага сацыяльнага класа, адлюстроўвала яго дабрабыт. У кожнай эпохі свая пара чаравічкаў. У наш час абутак працягвае іграць важную ролю ў іміджы чалавека, незалежна ад таго, сочыць ён за модай ці не.

На выставе ў вас ёсць унікальная магчымасць убачыць абутак, які насілі ў Беларусі на працягу ХХ стагоддзя. Фондавыя калекцыі Нацыянальнага гістарычнага музея і яго філіялаў поўныя рэдкімі экзэмплярамі: ад лапцей і валёнкаў да бальных туфляў.

Акрамя таго, на выставе прадстаўлены сучасныя ўзоры дызайнерскай думкі: фантастычныя туфлі Лэдзі Гага і іншыя незямныя рэчы, створаныя рэкардсменам кнігі рэкордаў Гінеса, вядомым дызайнерам Янжэм Нядвецкім, а таксама эксклюзіўная калекцыя, пашытая ўручную спецыяльна для праекта «Пад туфлікам у Музы» майстрамі аднаго з самых вядомых люксавых брэндаў абутку ў Беларусі кампаніі Studio Sutoria, цікавыя ўзоры рэтра-калекцыі «Прыгажосць ХХ стагоддзя» вядомага беларускага стыліста Таццяны Анюковай, абутак для гульні ў боўлінг цэнтра Madison і многае іншае.


Фотавыстава «У імя міласэрнасці»

Дзе: Музей гісторыі беларускага кіно (вул. Свярдлова, 4)

Калі: з 8 па 13 мая

Колькі каштуе: 8 мая ўваход вольны; з 9 па 13 мая — па квітку ў музей (кошт квітка: ад 2 да 3,5 руб.)

На фотавыставе прадстаўлены архіўныя здымкі Беларускага Таварыства Чырвонага Крыжа, Міжнароднага Камітэта Чырвонага Крыжа, Інфармацыйнага агенцтва Расіі ТАСС і сучасныя працы швейцарскага фатографа Стэфана Маўрэра, якія адлюстроўваюць прыклады сапраўднага гуманізму і самаахвярнасці медыцынскіх сясцёр міласэрнасці і валанцёраў Беларускага Чырвонага Крыжа.

Асаблівае месца на выставе займаюць фатаграфіі медыцынскіх сясцёр міласэрнасці — лаўрэатаў медаля імя Флорэнс Найтынгейл, вышэйшай міжнароднай узнагароды для медыцынскіх сясцёр. Медаль прысуджаецца раз у два гады за выключную адданасць справе міласэрнасці, гуманнасць і ўзорную прафесійную дзейнасць. У Беларусі шэсць медыцынскіх сясцёр узнагароджаны гэтым медалём за мужнасць і самаадданасць у гады Вялікай Айчыннай вайны, а пяць — за служэнне адзінокім пажылым і цяжкахворым людзям у мірны час.

Акрамя гэтага, у выставачнай зале будзе праходзіць паказ дакументальнага фільму «Зима пройдет» аб Ніне Мікалаеўне Блізнюк — дзеючай медыцынскай сястры міласэрнасці Мінскай гарадской арганізацыі Чырвонага Крыжа, узнагароджанай медалём імя Флорэнс Найтынгейл. Фільм удзельнічаў у міжнародных фестывалях дакументальнага кіно ў Аўстрыі, Арменіі, Германіі, Італіі, Польшчы, Партугаліі і ўзнагароджаны Крыштальнай статуэткай на Міжнародным Хрысціянскім фестывалі дакументальнага кіно «За лепшае ўвасабленне гуманітарных каштоўнасцяў чалавецтва».


Аўтафестываль «Граблі»

Дзе: СК «Лагойск»

Калі: 12 мая, 12:00

У рамках фестывалю вас чакаюць: картынг-траса, тату-салоны, барбершопы, адмысловы дзіцячы пакой, зоны адпачынку, зоны продажаў, зоны грамадскага харчавання, зоны разнастайных экстрэмальных відаў спорту і, канешне, велізарная колькасць шыкоўных аўтамабіляў.


Веласіпедны карнавал «Viva ровар!»

Дзе: Парк Перамогі (пр-т Пераможцаў)

Калі: 12 мая, 13:30

Колькі каштуе: бясплатна

Міжнародны веласіпедны карнавал пройдзе ў Мінску 12 мая. Рэгістрацыя ўдзельнікаў ужо ідзе — заявіць пра свой намер паўдзельнічаць у яркім мерапрыемстве можна на адмысловым сайце.

Удзельнічаць могуць усе жадаючыя старэйшыя за 14 гадоў, дзяцей чакаюць на свяце ў суправаджэнні бацькоў. Пры гэтым ніякіх узносаў не прадугледжана, удзел у велакарнавале бясплатны.

Арганізатары мерапрыемства падкрэсліваюць, што будуць рады бачыць любыя віды веласіпедаў, у тым ліку тандэм, двухпавярховы веласіпед, веласіпед-амфібію, веласіпед з прычэпам для пасажыраў і іншыя нестандартныя віды двухколавага транспарту.

З велапарада мерапрыемства і пачнецца. Яркая калона праедзе па праспекце Пераможцаў ля парка Перамогі. Пры гэтым, падкрэсліваюць арганізатары, велапарад не з'яўляецца гонкай або велапрабегам. Калона будзе рухацца з невялікай хуткасцю — каля 12 км/г. Затым у парку Перамогі пройдзе фестываль.


Канцэрты каля Вялікага тэатра

Фота belcanto.ru.

Дзе: плошча перад Вялікім тэатрам оперы і балета (пл. Парыжскай Камуны)

Калі: з 6 мая па 17 чэрвеня, 17:10-17:40

Колькі каштуе: бясплатна

Кожную нядзелю, з 6 мая па 17 чэрвеня, на пляцоўцы перад Вялікім тэатрам оперы і балета будзе гучаць аркестр культурнай установы.

З 17:10 да 17:40 аркестр будзе іграць праграмы, аснову якіх складзе, канешне, вядомая класічная музыка. Кіраваць аркестрам будуць Іван Касцяхін і Алег Лясун.


Мінскі тыдзень дызайну

Фота 1prof.by.

Дзе: Плошча Свабоды (Мінск)

Калі: з 1 па 10 мая, 9:00

Галоўная тэма мерапрыемства грунтуецца на важнай для нашай гісторыі даце — 500-годдзі ўсшэсця на пасад Рэчы Паспалітай міланскай прынцэсы Боны Сфорцы, якая стала жонкай караля і вялікага князя Жыгімонта. Дзякуючы гэтай падзеі і, канешне, уплыву Боны Сфорцы, праз некалькі гадоў на тэрыторыю сучаснай Польшчы, Беларусі, Літвы, Украіны былі запрошаныя італьянскія навукоўцы, майстры, архітэктары, настаўнікі і музыканты. Нашы продкі прынялі дзівосную і найстаражытную сусветную культуру, навучыліся, часткова адаптавалі і ўзбагацілі ўласныя творчыя сілы. Гэта гістарычная дата дае магчымасць праз паўтысячы гадоў адзначыць італьянскі ўплыў на нашу культуру. 

У рамках фестывалю запланаваны паказ экспазіцый у гістарычным цэнтры Мінска — Верхнім горадзе: на вуліцах, у дворыках і на набярэжнай Свіслачы.

Плануецца ўстаноўка аб'ектаў дызайну, гарадской мэблі, творчых інсталяцый, скульптур, карцін, а таксама выставы праектаў.

 

Дадаць каментар

Выбар рэдакцыі

Палітыка

Уладзімір Андрэйчанка расказаў пра найбольш значныя законапраекты

Уладзімір Андрэйчанка расказаў пра найбольш значныя законапраекты

 «Толькі агульнымі намаганнямі мы зможам супрацьстаяць няпростым выклікам часу».

Грамадства

Як у Беларусі абясшкоджваюць боепрыпасы

Як у Беларусі абясшкоджваюць боепрыпасы

​Колішняя Беларуская ваенная акруга лічылася адной з самых магутных у СССР.

Грамадства

Шчырая размова з вядомым педагогам пра бацькоўскія сумненні і страхі

Шчырая размова з вядомым педагогам пра бацькоўскія сумненні і страхі

«Калі ў вас адкрыўся рот, каб накрычаць на дзіця, спыніцеся хоць на секунду…» 

Грамадства

Чым здзівіў сёлета «Кліч Палесся»

Чым здзівіў сёлета «Кліч Палесся»

Этнафэст стаў вядомым далёка за межамі Беларусі.