Сі Цзіньпін сустрэўся з Кім Чэн Ынам і пагутарыў з Дональдам Трампам

Генеральны сакратар ЦК КПК, старшыня КНР Сі Цзіньпін 7-8 мая сустрэўся са старшынёй Працоўнай партыі Карэі, старшынёй Дзяржсавета КНДР Кім Чэн Ынам у горадзе Далянь правінцыі Ляанін (Паўночна-Усходні Кітай), перадае "Жэньмінь жыбаа" анлайн".

Член Пастаяннага камітэта Палітбюро ЦК КПК, член Сакратарыята ЦК КПК Ван Хунін таксама ўдзельнічаў у адпаведных мерапрыемствах. Сі Цзіньпін правёў перамовы з Кім Чэн Ыном і зладзіў прывітальны банкет у яго гонар. Вышэйшыя кіраўнікі дзвюх партый і дзвюх дзяржаў таксама разам прагуляліся і прысутнічалі на абедзе. У цёплай сяброўскай атмасферы яны правялі ўсёабдымны і паглыблены абмен думкамі наконт адносін паміж КНР і КНДР і па важных пытаннях, што ўяўляюць узаемную цікавасць. 

"Я рады яшчэ раз сустрэцца і прыкласці сумесныя намаганні для садзейнічання здароваму і стабільнаму развіццю двухбаковых адносін, забеспячэння доўгачасовага парадку і доўгатэрміновай стабільнасці на Карэйскім паўвостраве, прасоўвання міру, стабільнасці і працвітання ў рэгіёне", - адзначыў Сі Цзіньпін.

Кім Чэн Ын заўважыў, што ў цяперашні ключавы перыяд хуткага развіцця рэгіянальнай сітуацыі ён паўторна прыбыў у Кітай для таго, каб сустрэцца і абмяняцца інфармацыяй з генеральным сакратаром, і разлічвае на ўзмацненне стратэгічных кантактаў і супрацоўніцтва з кітайскім бокам, прасоўванне паглыбленага развіцця двухбаковай дружбы і садзейнічанне міру і стабільнасці ў рэгіёне. Сі Цзіньпін выказаў гатоўнасць працаваць сумесна з Кім Чэн Ынам, працягваць кіраванне адпаведнымі ведамствамі двух бакоў у рэалізацыі дасягнутых лідарамі дзвюх краін дамоўленасцей, садзейнічаць бесперапыннаму развіццю адносін Кітая і КНДР на карысць абедзвюх краін і іх народаў, тым самым уносячы пазітыўны ўклад у мір і стабільнасць у рэгіёне. 

Кітайскі бок падтрымлівае КНДР у прыхільнасці дэнуклеарызацыі Карэйскага паўвострава, а таксама правядзенне паміж КНДР і ЗША дыялогу і кансультацый для вырашэння праблемы паўвострава і гатовы сумесна з усімі зацікаўленымі бакамі адыграць пазітыўную ролю для ўсебаковага прасоўвання працэсу мірнага вырашэння праблемы паўвострава шляхам дыялогу і ажыццяўлення доўгатэрміновай стабільнасці ў рэгіёне.

Кім Чэн Ын адзначыў, што ажыццяўленне дэнуклеарызацыі на Карэйскім паўвостраве з'яўляецца паслядоўнай і яснай пазіцыяй КНДР. Калі зацікаўленыя бакі адмовяцца ад варожай палітыкі ў дачыненні да КНДР і пагроз яе бяспекі, то ў КНДР знікне неабходнасць валодаць ядзернай зброяй, і дэнуклеарызацыі стане здзейснай. Кім Чэн Ын выказаў надзею на тое, што КНДР і ЗША змогуць праз дыялог усталяваць ўзаемны давер, і ўсе зацікаўленыя бакі будуць адказна прымаць паэтапныя і сінхронныя меры з мэтай усебаковага прасоўвання працэсу палітычнага ўрэгулявання пытання Карэйскага паўвострава і, у канчатковым рахунку, ажыццяўлення дэнуклеарызацыі і дасягнення працяглага міру на паўвостраве. 

Як перадае "Жэньмінь жыбаа" анлайн", старшыня КНР 8 мая правёў тэлефонную размову з прэзідэнтам ЗША Дональдам Трампам. Сі Цзіньпін адзначыў, што ў цяперашні час развіццё адносін Кітая і ЗША праходзіць важны этап. Ён паведаміў, што надае павышаную ўвагу развіццю міждзяржаўных адносін, шануе добрыя працоўныя сувязі з прэзідэнтам ЗША. 

Старшыня КНР выказаў надзею, што бакі добрасумленна рэалізуюць дасягнутыя ім і Дональдам Трампам на сустрэчы ў Пекіне кансенсусы, будуць падтрымліваць кантакты на высокім і іншых узроўнях, дзейнічаць у духу ўзаемапавагі, узаемнай выгады і ўзаемнага спрыяння, засяродзяцца на супрацоўніцтве і будуць трымаць на кантролі рознагалоссі, паспрыяюць здароваму і стабільнаму паступальнаму развіццю міждзяржаўных адносін. 

Гандлёва-эканамічнае супрацоўніцтва нязменна служыла стабілізатарам і рухавіком кітайска-амерыканскіх адносін. Як вядома, на мінулым тыдні Кітай і ЗША правялі ў Пекіне шчырыя, высокаэфектыўныя і канструктыўныя кансультацыі па гандлёва-эканамічных пытаннях. Дэлегацыі бакоў будуць падтрымліваць кантакты, імкнуцца адшукаць аптымальны спосаб урэгулявання наяўных пытанняў, дасягнуць узаемавыгадных вынікаў. 

Кіраўнікі дзвюх дзяржаў таксама абмяняліся думкамі наконт абстаноўкі на Карэйскім паўвостраве. Сі Цзіньпін зноў пацвердзіў пазіцыю кітайскага боку па адпаведнай праблеме. Ён падкрэсліў, што кітайскі бок падтрымлівае сустрэчу лідараў ЗША і КНДР, выказаўшы надзею, што бакі пойдуць насустрач адзін аднаму, усталююць узаемадавер'е, будуць дзейнічаць паэтапна, урэгулююць супярэчнасці з дапамогай сустрэч і кансультацый, улічаць разумную заклапочанасць паўночнакарэйскага боку ў галіне бяспекі, сумесна прасунуць працэс палітычнага ўрэгулявання праблемы Карэйскага паўвострава.