Вы тут

Сон на вуллях і водары хатняй кулінарыі


Прыемна, што ў нашай краіне актыўна развіваецца турызм, а з асаблівай паспяховасцю — аграэкатурызм. І адзін з лідараў у гэтым сэнсе — Валожынскі рэгіён. У 2009 годзе тут з'явіўся лакальны брэнд — зялёны маршрут «Валожынскія гасцінцы» — была прыдумана арыгінальная, цэльная канцэпцыя. Ужо ў 2012-2013 гадах запрацаваў размечаны і добраўпарадкаваны веламаршрут «Валожынскія гасцінцы». І калі першапачаткова яго даўжыня складала 150 кіламетраў, то цяпер гэта ўжо каля 300 кіламетраў! З 2016 года Валожынскім райвыканкамам зарэгістраваны спажывецкі кааператыў па развіцці аграэкатурызму. Аналагічных структур у нашай краіне пакуль больш няма. Яго мэта — аб'ядноўваць людзей вакол рэгіянальнага брэнда.


У бе­ла­рус­кай тра­ды­цый­най вы­печ­цы ча­сам вы­ка­рыс­тоў­ва­лі дух­мя­ныя рас­лі­ны.

Такім чынам, праект «Валожынскія гасцінцы» досыць насычаны. Ён ахоплівае як аграсядзібы, так і рамеснікаў, пчаляроў, фермераў і многіх іншых апантаных спецыялістаў і аматараў. Калі звярнуцца да мовы лічбаў, то ў межах кааператыва прадстаўлены кантактны заапарк, распрацавана і праводзіцца пяць экскурсій, пяць конных маршрутаў, восем водных маршрутаў, можна набыць на любы густ восем асартыментных груп прадукцыі — мядовую, хлеб і хлебабулачныя вырабы, розныя сувеніры — тут праводзіцца 10 майстар-класаў. Усяго ж у кааператыў уваходзяць 15 аграсядзіб і фермерскіх гаспадарак.

Дзякуючы больш чым 12 000 еўра, выдзеленых на ініцыятыву «Развіццё інфраструктуры зялёнага маршруту «Валожынскія гасцінцы» ў Валожынскім раёне», які рэалізуецца спажывецкім кааператывам па развіцці аграэкатурызму «Валожынскія гасцінцы», за апошні час у раёне з'явілася некалькі знакавых аб'ектаў.

Усё гэта адбываецца ў межах праекта «Садзейнічанне развіццю на мясцовым узроўні ў Беларусі», што фінансуецца Еўрапейскім саюзам і рэалізуецца Праграмай развіцця ААН (ПРААН). Думаецца, тым цікавінкам, якія адна за адной з'явіліся на Валожыншчыне, многія маглі б пазайздросціць!

Так, у сядзібе «Марцінова Гусь» у вёсцы Малая Люцінка, што на Валожыншчыне, адкрылася міні-пякарня, дзе цяпер можна пакаштаваць старадаўнія беларускія прысмакі. Побач з пякарняй працуе і «Аптэчка прыемная», дзе ўладкавана музейна-лекцыйнае памяшканне для дэгустацый і лекцый. Там плануюць расказваць пра даўнюю культуру хлебапячэння і выкарыстання традыцыйных для нашай краіны араматычных раслін у розных аспектах паўсядзённага жыцця — у выпечцы, у хатняй парфумерыі, у народнай медыцыне, у прыгатаванні напояў. «Звязда» ўжо пісала і пра пляцоўку для бёрдвотчынгу, якая з'явілася на беразе Сакаўшчынскага вадасховішча. Яна знаходзіцца побач з сядзібай «За масточкам», што ў вёсцы Замасцяны. На пляцоўцы ў спакойнай абстаноўцы, скарыстаўшыся спецыяльным абсталяваннем, можна паназіраць за птушкамі, у тым ліку за самымі рэдкімі відамі — лебедзем-клікуном і шызай чайкай. Карэспандэнту «Звязды» было надзвычай цікава наведаць і музей коннага пасажырскага і гужавога транспарту, што з'явіўся ў вёсцы Белакорац на ўскрайку Налібоцкай пушчы. Адметна, што гэта далёка не ўсё, чым можа здзівіць Валожыншчына!..

Ке­лі­хі і куб­кі, скан­стру­я­ва­ныя па ўзо­рах ра­дзі­ві­лаў­скіх экс­па­зі­цый, гра­ві­ра­ва­ныя Ва­сі­лём Руб­цо­вым яшчэ ўруч­ную.

Асабліва прывабнай для турыстаў стала і творчая майстэрня «Іслач» у мястэчку Ракаў. На іх узбраенні з'явіліся лазерны гравёр і свідравальны станок для шкла. Крыху іншы, абноўлены выгляд набыў і сам будынак майстэрні, і тэрыторыя вакол яго.

У гэтым адметным кутку турысты змогуць азнаёміцца з экспазіцыяй посуду эпохі Радзівілаў, з тэхналогіяй нанясення гравіроўкі на яе. Можна нават паспрабаваць нанесці пэўны ўзор ці надпіс сваімі рукамі. Інтэрактыўныя майстар-класы гравіроўкі па шкле — адзін з прыёмаў крэатыўнай эканомікі, які выкарыстоўвае ўладальнік майстэрні Васіль Рубцоў.

Новае абсталяванне дапамагае прыгожа маркіраваць шкляныя сувеніры (як і многія іншыя) адметнымі эмблемамі, знакамі. Важна, што ў мясцовай падарункавай прадукцыі цяпер з'явяцца пазнавальныя вобразы.

Адметная цікавінка з'явілася ў вёсцы Міжрэчча, што непадалёк ад Ракава. Там прапануюць «Сон на вуллях». Што ж гэта такое і як можна заснуць побач з пчоламі?.. Аказваецца, не толькі можна, але яшчэ і вельмі карысна для здароўя! Але працуе ўсё, натуральна, па асаблівай тэхналогіі. Пабудаваны драўляны домік, у сцены якога ўбудаваны вуллі, чатыры, з кожнага боку. Над вуллямі абсталяваныя спальныя месцы — драўляныя ляжанкі, якія маюць трохміліметровыя шчылінкі для лепшага паветраабмену з вуллямі. Чалавек кладзецца на ляжанку, часцей за ўсё засынае.

На­ве­даць апі-до­мік у «Мя­до­вай ка­ра­ле­ве» мож­на бу­дзе толь­кі ў кан­цы чэр­ве­ня, ка­лі пча­лі­ныя сем'і кры­ху раз­рас­туц­ца.

Такі сон з пчоламі аднаўляе сілы і энергію лепш, чым начны 8-гадзінны сон.

Для здаровага сну створана сукупнасць станоўчых фактараў: водар воску, мёду, пылку і праполісу, мікравібрацыі і раўнамернае гудзенне пчол, тэмпература вулля, іанізацыя паветра. Гэты арыгінальны від адпачынку будзе цікавы ўсім, хто вядзе здаровы лад жыцця, імкнецца адпачыць у спакоі пасля насычанага і тлумнага гарадскога жыцця, зарадзіцца энергіяй і сілай прыроды.

Апі-домік размяшчаецца ў экалагічна чыстым раёне з добрымі пад'язнымі шляхамі, навокал знаходзіцца шмат гістарычных і прыродных цікавінак. Таму яго стваральнікі мяркуюць, што дзякуючы яму не толькі да іх, але і на іншыя аб'екты «Валожынскіх гасцінцаў» завітае шмат вандроўнікаў. А тыя, хто ўжо бываў на Валожыншчыне, безумоўна, і так вяртаюцца сюды зноў і зноў. Таму што да добрага прызвычайваешся хутка, тым больш нікога не могуць пакінуць абыякавым месцы са станоўчай, цёплай энергетыкай і надзвычай гасціннымі людзьмі.

Ніна ШЧАРБАЧЭВІЧ

Валожынскі раён

Загаловак у газеце: Месцы сілы на Валожыншчыне

Выбар рэдакцыі

Грамадства

На Гомельшчыне актыўна развіваюць валанцёрскі рух

На Гомельшчыне актыўна развіваюць валанцёрскі рух

Форма сацыяльнай актыўнасці падлеткаў.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».